ରାଜାରାମ ଷଡଙ୍ଗୀ

29/06/2023 at 2:48 PM

ସମ୍ବଲପୁର: ଓଡିଶାର ଗଣତନ୍ତ୍ର ଦିନକୁ ଦିନ ଭୁଷୁଡିବାରେ ଲାଗିଛି । ଅମଲାତନ୍ତ୍ର ରାଜୁତି ବଢୁଛି। ବିରୋଧି ଦଳ ବି ଏହାର ବିରୋଧ କରୁଛି । ଅନେକ ଗଣମାଧ୍ୟମରେ ଏହା ଶିରୋନାମା ପାଲଟିଛି। ଶାସକ ଦଳ କିନ୍ତୁ ଏଥିରେ ପୁରା ଚୁପ୍।ନିଜ ବ୍ୟକ୍ତିଗତ ସ୍ୱାର୍ଥ ପାଇଁ ମୁହଁ ଖୋଲିବାକୁ ଡରୁଛନ୍ତି । ନିଜକୁ ଅତି ଟାଣୁଆ ଓ ବାହୁବଳି ଭାବୁଥିବା ନେତାବି ନିଜକୁ ଭୟ କରି ଓଡିଶା ଗଣତନ୍ତ୍ରକୁ ଏକ ଭୟଙ୍କର ପରିସ୍ଥିତିରେ ପକାଇଦେବା ଭଳି ନିଜର ଅକ୍ଷମତାର ପରିଚୟ ଦେଇସାରିଲେଣି । ଏଇ ଗତ କିଛି ଦିନ ହେବ ଅମଲାତନ୍ତ୍ର ଶାସନ ଯୋଗୁଁ ସାଧାରଣରେ ଏକ କୋକୁଆ ଭୟବି ସୃଷ୍ଟି ହେଉଥିବା ଅନୁଭବ କରାଯାଉଛି।କିଛି ତେଲିଆ ଓ ବୋଲକରାରାଙ୍କୁ କବ୍ଜା କରି ଓଡିଶାର ବିକାଶ ଅର୍ଥକୁ ମଧ୍ୟ ବରବାଦ କରି ମାରି ଖାଇ ଖୁଆଇବାର ଏକ ମସ୍ତବଡ ଷଡଯନ୍ତ୍ର ରଚନା କରାଯାଇ ଏକ ଅମଲାତନ୍ତ୍ର ଗୋଷ୍ଟି ମୁଖ୍ୟମନ୍ତ୍ରୀଙ୍କ ପ୍ରତିନିଧିତ୍ୱ କରୁଥିବା ଓ ଏହାକୁ ଅତି ତୀବ୍ର ବେଗରେ ଆଗକୁ ବଢାଉଥିବା ଭଲି ଅନେକ ଦୃଷ୍ଟାନ୍ତ ସାମ୍ନାକୁ ଆସିଲାଣି । ଅଥଚ ମୁଖ୍ୟମନ୍ତ୍ରୀଙ୍କ ଏହା ନଜର ବାହାରେ କି ସ୍ୱଚ୍ଛତା ଭଳି ବିବାଦବି ମୁଣ୍ଡ ଟେକିଲାଣି । ଦିନକୁ ଦିନ ଗଣତନ୍ତ୍ରର ବିଧି ବ୍ୟବସ୍ଥା କ୍ଷୁର୍ଣ୍ଣ ହେବାକୁ ବସିଲାଣି। ବିଜୁ ଲଗାସି ବହୁ ତଲକୁ ଖସି ଗଲାଣି । ଦିନେ ଯେଉଁ ବିଜୁ ବାବୁ ଅମଲାତନ୍ତ୍ରକୁ ଉଠବସ୍ କରାଉଥିଲେ ଆଜି ସେହି ଅମଲାତନ୍ତ୍ର ଶାସକ ମାନେ ନେତା ଓ କର୍ମୀଙ୍କୁ ଉଠବସ୍ କରାଉଛନ୍ତି । ଏଥିରୁ ମୁଖ୍ୟମନ୍ତ୍ରୀବି ବାଦ ପଡିନାହାନ୍ତି । ନୀରବ ଦ୍ରଷ୍ଟା ସାଜିଛନ୍ତି ସିଏ । ସଚିବ ସ୍ତରରେ କଣ୍ଡକ୍ଟ ରୁଲର ଘୋର ଅବମାନନା ହେଉଥିବା ନେଇ ରାଜନୈତିକ,ସାମାଜିକ ଓ ବୁଦ୍ଧିଜୀବୀ ମହଳରେ ବଡ ତୁମ୍ବି ତୋଫାନ ସାଜିଥିଲେବି ମୁଖ୍ୟମନ୍ତ୍ରୀଙ୍କ ନୀରବତା ଏହାର କାରଣ କୁହାଯାଇ ପାରିବକି ? ଏବେ ଓଡିଶାର ମନ୍ତ୍ରୀ ଦୁର୍ବଳ ! ମନ୍ତ୍ରୀ ଯାହା କରିବା ଘୋଷଣା କରିବା କଥା ସଚିବ କରୁଛନ୍ତି। କିନ୍ତୁ ମନ୍ତ୍ରୀ ଅସହାୟ ପରି ମନେହେଉଛି।ପବ୍ଲିକ ଫୋରମରେ ସଚିବଙ୍କ ରାଜନୈତିକ ଘୋଷଣା ହଟଚମଟ୍ ସୃଷ୍ଟି କଲାଣି । ମୁଖ୍ୟମନ୍ତ୍ରୀଙ୍କ କ୍ଷମତାକୁ ସଂକୁଚିତ କରିଦେବା ଭଳି ଏକ ବଡ ଚକ୍ରାନ୍ତର ସୂତ୍ରପାତ ଘଟିବାକୁ ଯାଉଛି। ତେବେବି ସମଗ୍ର ଦେଶର ଆଦର୍ଶ ଓ ଶ୍ରେଷ୍ଟ ଶାସକତ ନୁହଁନ୍ତି ବରଂ ପ୍ରଶାସକ ଭାବେ ଏକାଦା ଚର୍ଚିତ ପ୍ରିୟ ମୁଖ୍ୟମନ୍ତ୍ରୀ ଏଭଳି ଅଭିଯୋଗ ଉପରେ କିଛି ନାଣନ୍ତି କି ନାହିଁ ତାହା ଆଶ୍ଚର୍ଯ୍ୟ ଲାଗୁଛି । ବିଜୁଙ୍କ ଆଦର୍ଶକୁ ଓ ଗଣତନ୍ତ୍ର ବିରୁଦ୍ଧରେ ଅମଲାତନ୍ତ୍ର ପ୍ରତିନିଧିତ୍ୱ ନେଇ ଓଡିଶାର ଭାଗ୍ୟ ଭବିଷ୍ୟତ କଣ ତାକୁ ନେଇ ଉଠିଛି ବଡ ପ୍ରଶ୍ନ । ପ୍ରଶାସନିକ ହସ୍ତକ୍ଷେପ ଯୋଗୁଁ ଦଳର ଜଣେ ସାଧାରଣ ସଂପାଦକଙ୍କ ଦଳରୁ ଇସ୍ତଫା ଦେବା ଓ ସିଧାସଲଖ ଜଣଙ୍କ ଉପରକୁ ଅଙ୍ଗୁଲି ଦେଖାଇ ଅଭିଯୋଗ ଆଣି ଦଳରୁ ବାହାରିବା କେତେବଡ ପ୍ରସଙ୍ଗ ତାହା ତର୍ଜମାର ବିଷୟ । ଏହା ପୁଣି ଜଣଙ୍କୁ ନେଇ ହେଉଛି । ଭି.କେ ପାଣ୍ଡିଆନ ଏହାର ନାୟକ । ଏହି ନାୟକଙ୍କୁ ନେଇ ଓଡିଶା ଉଠୁଛୁ ଓ ପଡୁଛି । ବିଭିନ୍ନ ରାଜନୈତିକ ଦଳ ସହିତ ଭୁବନେଶ୍ବର ସାଂସଦ ଅପରାଜିତା ଷଡଙ୍ଗୀ, ଓଡିଶାର ପୁର୍ବତନ ପ୍ରଶାସନିକ ଅଧିକାରି ତଥା ବର୍ତ୍ତମାନର କଂଗ୍ରେସ ନେତା ବିଜୟ କୁମାର ପଟ୍ଟନାୟକଙ୍କ ଭଳି ପାଣ୍ଡିଆନଙ୍କ କାର୍ଯ୍ୟ କଳାପ ନେଇ କେନ୍ଦ୍ର ସରକାର ପାଖରେ ଅଭିଯୋଗ ଆଣି କାର୍ଯ୍ୟାନୁଷ୍ଠାନ ଦାବୀ କରିଥିବା ବେଳେ କେନ୍ଦ୍ରବି ଓଡିଶା ମୂଖ୍ୟ ଶାସନ ସବିବଙ୍କୁ ଏହାକୁ ନେଇ କାର୍ଯ୍ୟାନୁଷ୍ଠାନ ପାଇଁ ଚିଠି ଲେଖିବା ଭଳି ଘଟଣା ମଧ୍ୟ ସାମ୍ନାକୁ ଆସିଲାଣି । ଏହା ସତ ପାଣ୍ଡିଆନ କହୁଛନ୍ତି ସେ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ କାମ କରୁଛନ୍ତି,ଏପରିକି ଏହି ମର୍ମରେ ମୁଖ୍ୟମନ୍ତ୍ରୀଙ୍କ ଏକ ଓଡିଓ ବାର୍ତ୍ତା ମଧ୍ୟ ବରଗଡର ଏକ ପବ୍ଲିକ ଫୋରମରେ ଶୁଣାଇଥିଲେ । ଯଦି ଏହା ସତ ତେବେ ଏହାର କୌଣସି ସରକାରୀ ଆଦେଶ ଚିଠି ରହିଛି କି ? ଏଭଳି ପ୍ରଶ୍ନ ଆସିବା ସ୍ୱାଭାବିକ। ଯଦି ଚିଠି ନାହିଁ ତେବେ ଜଣେ ସଚିବ ହେଲିକେପ୍ଟରରେ ଯିବା ତାଙ୍କୁ ବର୍ଣ୍ଣାଢ୍ୟ ସମ୍ବର୍ଦ୍ଧନା ଦେବା ଭଳି କ୍ଷେତ୍ରରେ ଯେଉଁ ଆଡମ୍ବର ପୁର୍ଣ୍ଣ ବ୍ୟବସ୍ଥା କରାଯାଇ ଲୋକଙ୍କ ଆଦାୟରୁ ଓଡିଶାର ରାଜସ୍ୱ ଅର୍ଥରୁ କୋଟି କୋଟି ଟଙ୍କ ଖର୍ଚ କରାଯାଉଛି,ତା’ର କିଛି ଯଥାର୍ଥତା ରହିଛିକି?ଅନ୍ୟ ସଚିବ ଅବା ମୁଖ୍ୟ ଶାସନ ସଚିବଙ୍କୁ ମୁଖ୍ୟମନ୍ତ୍ରୀ କେବେ ଦିନେ ଏଭଳି ସୁବିଧା ଦେଇ ପାରିବେକି? ଯେଉଁ ରାଜ୍ୟରେ ମନ୍ତ୍ରୀଙ୍କୁ ଏ ସୁବିଧା କାଁ ଭାଁ ମିଳୁଥିବା ବେଳେ ସଚିବଙ୍କ ପାଇଁ ଏ ଅନୁକମ୍ପା କାହିଁକି । କଣ ସେ ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ବୋଲି ନା ଅନ୍ୟ ସଚିବ ମାନଙ୍କ ପାୱାର କାଟି ୫ ଟି ସଚିବ ନାମରେ ଓଡିଶା ଜନସାଧାରଣଙ୍କୁ ଏକ ଭ୍ରାନ୍ତ ଧାରଣାରେ ପକାଇ ସଚିବ ଓ ମୁଖ୍ୟ ଶାସନ ସଚିବ ଭଳି ଗୁରୁତ୍ୱ ପୁର୍ଣ୍ଣ ପଦବୀ ଗୌଣ କରିବା ଭଳି ଏକ ଧାରଣା ସୃଷ୍ଟି କରିବା । ୫ଟି ଯେଉଁ ଉଦ୍ଦେଶ୍ଯରେ ହୋଇଥିଲା ତାହା ବର୍ତ୍ତମାନ ବିପରୀତ ଗତିରେ ଚାଲିଛି । ୫ ଟି ପରିକଳ୍ପନା ଯେମିତି ଏକ ଷଡଯନ୍ତ୍ର ରଚିବା ଭଳି ଏକ ଉପକ୍ରମ ଥିଲା ତାହା ବର୍ତ୍ତମାନ ସେଭଳି ଅନୁଭବ ହେଉଛି। ଏହାକୁ ନେଇ କେନ୍ଦ୍ର ଡିଓପିଟି ସଚିବଙ୍କ ନିକଟରେ ବି ଅଭିଯୋଗ ହେଲାଣି । ୫ଟି ସଚିବକୁ ନେଇ ଦଳ ଭିତରେ ଭୁକୁଞ୍ଚନ ହେଲାଣି । ବିନା ଚିଠିରେ ଯଦି ସଚିବ ବୁଲି ରାଜସ୍ୱ ହରାଇବେ ବିନା ଚିଠିରେ ଗାଁ ସରକାର କଣ ଶିଖିବ? ଜଣେ ମନ୍ତ୍ରୀ ଯେ କୌଣସି ସମୟରେ କିଛିନାଁ କିଛି ଘୋଷଣା କରି ପାରିବେ । କିନ୍ତୁ ଜଣେ ସଚିବ ଲୋଭନୀୟ ପ୍ରତିଶୃତି ବା ପ୍ରଲୋଭନର ଘୋଷଣା କରିପାରିବେକି । ନିୟମାନୁଯାୟୀ ହୋଇନଥିଲେ ମୁଖ୍ୟମନ୍ତ୍ରୀବି ଜଣେ ସଚିବ ଅବା ସରକାରୀ ଅଧିକାରୀଙ୍କୁ ନିଲମ୍ଭନ କରି ପାରିବା ଭଳି କ୍ଷମତା ରହିଛି । ଅନ୍ୟ ମାନଙ୍କ ପାଇଁ ଏହା ବ୍ୟବହାର ହେଉଥିବା ବେଳେ ଏ କ୍ଷେତ୍ରରେ ଏହା ଲାଗୁ ନହେବା କାରଣ କଣ ବୋଲି ସାଧାରଣରେ ଉଠୁଥିବା ଏହି ପ୍ରଶ୍ନକୁ ଚାବିଦେବାର ଉଦ୍ଦେଶ୍ଯ କଣ ହୋଇପାରେ ? ରାଜ୍ୟ ବିକାଶ ପାଇଁ ଯେ କୌଣସି ଘୋଷଣା ପୁର୍ବରୁ ଫାଇନାନ୍ସ କ୍ଲିଅରେନ୍ସ ହୋଇ ସଚିବ,ଶାସନ ସଚିବ,ବିଭାଗୀୟ ମନ୍ତ୍ରୀ ଓ ଅବଶ୍ୟକ ପଡିଲେ ମୁଖ୍ୟମନ୍ତ୍ରୀଙ୍କ ଅନୁମୋଦନ ପରେ ସରକାରୀ ଭାବେ ଘୋଷଣା କରାଯାଇପାରେ । କିନ୍ତୁ ଏହି ସବୁ ନିୟମ ଉଲଙ୍ଘନ କରି ଯଦି ଜଣେ ସଚିବ ସ୍ତରୀୟ ଅଧିକାରୀ କିଛି ଘୋଷଣା କରନ୍ତି ତେବେ ଏହାକୁ ଏକ ଦଣ୍ଡନୀୟ ଅପରାଧ ଭାବେ ଧରାଯିବ । ଏଥିପ୍ରତି ସରକାର ଯତ୍ନବାନ୍ ନାଁ ଯୋର ଯାର ମୂଲକ ତାର ନିତିରେ ଏହା ଚାଲିବ ? ଏଭଳି ହେଲେ ଓଡିଶା ପ୍ରତି ବିପଦ ରହିଛି ।ଏହି ବିପଦରୁ ଓଡିଶାକୁ ଯେଉଁ କେତେଜଣ ଆଗେଇ ଆସି ସ୍ୱାଭିମାନ କଥା ଉଠାଉଛନ୍ତି ସେମାନଙ୍କ ପାଇଁ ବହୁ କଷ୍ଟ ଭୋଗିବାକୁ ପଡିପାରେ କିନ୍ତୁ ଓଡିଶାର ଭବିଷ୍ୟତକୁ ଆଖି ଆଗରେ ରଖି ସାର୍ବଭୌମିକ ଗଣତନ୍ତ୍ର ପ୍ରତିଷ୍ଠା ପାଇଁ ଏମାନଙ୍କ ସଂଗ୍ରାମଯେ ଆଗାମୀ ପୀଢି ପାଇଁ ବିପଦ ମୁକ୍ତ ଏହା ସ୍ୱଷ୍ଟ। କିନ୍ତୁ ବର୍ତ୍ତମାନ ଯେଭଳି ଚାଲିଛି ଓ ସେ ଦିଗରେ ନୀରବଦ୍ରଷ୍ଠା ସାଜିବା ଅର୍ଥ “ମୋର କ’ଣ ଯାଉଛି” ଭଳି ସ୍ୱାର୍ଥପର ଭାବନାରେ ଓଡିଶାକୁ ଚୁରମାର୍ କରିବାରେ ନିଜକୁ ଭାଗିଦାରି କରିବା ଭଳି ହେବ ।
ଓଡିଶା ଗଣତନ୍ତ୍ର ପ୍ରତି ଏହା ଏକ ବଡ ବିପଦ ବୋଲି ଧରିନେବାକୁ ହେଲେ ମୁଖ୍ୟମନ୍ତ୍ରୀ ତୁରନ୍ତ ଏଥିରେ ହସ୍ତକ୍ଷେପ କରବା ଆବଶ୍ୟକ ରହିଛି । ଅବଶ୍ୟ ସଂସଦରେ ଏହି ବିଷୟକୁ ନେଇ ପ୍ରସଙ୍କ ଉଠାଇବାକୁ ନେଇ ବିରୋଧି ସଜବାଜ ହେଉଛି ।ତେବେ ଏଭଲି ସମସ୍ୟାକୁ ଉପଲବ୍ଧି କରିପାରିଲେ କେନ୍ଦ୍ର ସରକାର ପଶ୍ଚିମବଙ୍ଗ ଭଳି ଏ କ୍ଷେତ୍ରରେ କାର୍ଯାନୁଷ୍ଠାନ ଗ୍ରହଣ କରିପାରିବେ । କାରଣ ସର୍ବ ଭାରତୀୟ ପ୍ରଶାସନିକ ଅଧିକାରୀ ମାନେ କେନ୍ଦ୍ର ସରକାରଙ୍କ ନିୟନ୍ତ୍ରଣାଧିନ । ଏଣୁ ଓଡିଶାର ଗଣତନ୍ତ୍ରକୁ ଅକ୍ଷୁର୍ଣ୍ଣ ରଖିବା ଭଳି ଏକ ସମ୍ବେଦନ ଶୀଳ ପ୍ରସଙ୍ଗରେ କେନ୍ଦ୍ର ସରକାର ମଧ୍ୟ ନିଜ ଭୂମିକା ନିର୍ବାହ କରିବାର ଉତ୍ତର ଦାୟିତ୍ୱ ରହିଛି।