ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ

6/09/2023 at 1:41 PM

ନୂଆଦିଲ୍ଲୀ: ଏସିଆ କପରେ ଆଜିଠୁ ସୁପର-୪ ମୁକାବିଲା ଆରମ୍ଭ ହେବ। ସୁପର-୪ରେ ପହଞ୍ଚିବା ୪ ଦଳ ହେଉଛନ୍ତି ଭାରତ, ପାକିସ୍ତାନ, ଶ୍ରୀଲଙ୍କା ଓ ବାଂଲାଦେଶ। ସୁପର-୪ର ପ୍ରଥମ ମୁକାବିଲା ଆଜି ବାଂଲାଦେଶ ଓ ପାକିସ୍ତାନ ମଧ୍ୟରେ ଲାହୋରରେ ଖେଳାଯିବ।

ଏସିଆ କପରେ ମୋଟ୍ ୬ଟି ଦଳ ଅଂଶଗ୍ରହଣ କରିଥିଲେ। ନେପାଳ ଓ ଆଫଗାନିସ୍ତାନ ଗ୍ରୁପ ପର୍ଯ୍ୟାୟରୁ ବିଦାୟ ନେଇଛନ୍ତି। ଗ୍ରୁପ-ଏରୁ ପାକିସ୍ତାନ ଓ ଭାରତ ଏବଂ ଗ୍ରୁପ-ବିରୁ ଶ୍ରୀଲଙ୍କା ଓ ବାଂଲାଦେଶ ପରବର୍ତ୍ତୀ ପର‌୍ୟ୍ୟାୟରେ ପହଞ୍ଚିଛନ୍ତି। ଏବେ ୪ଟି ଦଳକୁ ନେଇ ସୁପର-୪ ମୁକାବିଲା ଖେଳାଯିବ। ଏଥିରୁ ଶୀର୍ଷ ୨ ଦଳ ଫାଇନାଲକୁ ଉନ୍ନୀତ ହେବେ। ସୁପର-୪ରେ ସେପ୍ଟେମ୍ବର ୧୦ରେ ଭାରତ ଓ ପାକିସ୍ତାନ ମଧ୍ୟରେ ବଡ଼ ମୁକାବିଲା ଖେଳାଯିବ।

ସୁପର-୪ର ଖେଳସୂଚୀ
ସେପ୍ଟେମ୍ବର ୬- ପାକିସ୍ତାନ ବନାମ ବାଂଲାଦେଶ, ଲାହୋର
ସେପ୍ଟେମ୍ବର ୯- ଶ୍ରୀଲଙ୍କା ବନାମ ବାଂଲାଦେଶ, କଲୋମ୍ବୋ
ସେପ୍ଟେମ୍ବର ୧୦- ଭାରତ ବନାମ ପାକିସ୍ତାନ, କଲୋମ୍ବୋ
ସେପ୍ଟମେ୍ବର ୧୨- ଭାରତ ବନାମ ଶ୍ରୀଲଙ୍କା, କଲୋମ୍ବୋ
ସେପ୍ଟେମ୍ବର ୧୪- ପାକିସ୍ତାନ ବନାମ ଶ୍ରୀଲଙ୍କା, କଲୋମ୍ବୋ
ସେପ୍ଟେମ୍ବର ୧୫- ଭାରତ ବନାମ ବାଂଲାଦେଶ, କଲୋମ୍ବୋ
ସେପ୍ଟେମ୍ବର ୧୭- ଫାଇନାଲ୍, କଲୋମ୍ବୋ

ତେବେ ସବୁଠୁ ବଡ଼ କଥା ସୁପର-୪ର ପ୍ରଥମ ମ୍ୟାଚ୍ ପାକିସ୍ତାନରେ ଖେଳାଯିବା ପରେ ଅବଶିଷ୍ଟ ମ୍ୟାଚ୍ ଶ୍ରୀଲଙ୍କାର ରାଜଧାନୀ କଲୋମ୍ବୋର ଆର ପ୍ରେମଦାସା ଷ୍ଟାଡିୟମରେ ଖେଳାଯିବ। ତେବେ ପାଲ୍ଲିକଲ ପରି କଲୋମ୍ବାରେ ମଧ୍ୟ ବର୍ଷାର ଅଧିକ ସମ୍ଭାବନା ରହିଛି। ତେଣୁ ମ୍ୟାଚ୍ ଧୋଇ ଯିବାର ଆଶଙ୍କା ରହିଛି।