ଓଡ଼ିଶା ଡଟ୍ ନ୍ୟୁଜ୍

8/09/2024 at 5:58 PM

ନୟାଗଡ଼: ଦଶପଲ୍ଲାର ବିଜେପି ନେତା ରାଘବ ମଲ୍ଲିକଙ୍କୁ ବିଜେଡି ନେତା ବସନ୍ତ କୁମାର ସାହୁ ହତ୍ୟା ଧମକ ଦେଇଥିବା ଅଭିଯୋଗ । ଏନେଇ ରାଘବ ବାଣୀଗୋଚ୍ଛା ଥାନାରେ ଅଭିଯୋଗ କରିଛନ୍ତି ।
ଅଭିଯୋଗ ଅନୁସାରେ, ଦଶପଲ୍ଲା ବ୍ଲକର ପୂର୍ବତନ ଅଧ୍ୟକ୍ଷ ବସନ୍ତଙ୍କର ବାଣୀଗୋଚ୍ଛାରେ ଏକ ଢାବା ରହିଛି । ଏହି ଢାବାରେ ବେଆଇନ ଭାବେ ମଦ କାରବାର ଚାଲିଥିବା ନେଇ ଅଭିଯୋଗ ଆଣିଥିଲେ ଗତ ବିଧାନସଭା ନିର୍ବାଚନରେ ବିଜେପି ଟିକେଟରେ ପ୍ରାର୍ଥୀ ହୋଇଥିବା ରାଘବ । ଏହାସହ ଢାବାଟି ବେଆଇନ ଭାବେ ନିର୍ମାଣ ହୋଇଥିବା ଅଭିଯୋଗ କରି ଏହାକୁ ଉଚ୍ଛେଦ କରିବାକୁ ପ୍ରଶାସନ ନିକଟରେ ଦାବି କରିଥିଲେ । ଏଥିରେ ଉତ୍କ୍ଷିପ୍ତ ହୋଇ ବସନ୍ତ ଫୋନ୍ କରି ରାଘବଙ୍କୁ ହତ୍ୟା କରିବାକୁ ଧମକ ଦେଇଥିବା ଅଭିଯୋଗ ହୋଇଛି ।
ରାଘବ କହିଛନ୍ତି, ବସନ୍ତ ମୋତେ ଫୋନ୍ କରି ପଚାରିଥିଲେ, ତୁ କେଉଁଠି ଅଛୁ । ତତେ ମୁଁ ଗୋଡ଼େଇ ଗୋଡ଼େଇ ହାଣିବି । ସେ ମୋତେ ଅଶ୍ଲୀଳ ଭାଷାରେ ଗାଳିଗୁଲଜ କରିବା ସହିତ ହତ୍ୟା ଧମକ ଦେଇଥିଲେ । ଏମିତିକି ମୁଁ ତାଙ୍କର କ’ଣ କରିପାରିବି ବୋଲି କହିଥିଲେ । ହତ୍ୟା ଧମକ ପାଇବା ପରେ ଗତ ୬ ତାରିଖରେ ମୁଁ ବାଣୀଗୋଚ୍ଛା ଥାନାରେ ଏଫଆଇଆର ଦେଇଛି । ତାଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯାଉ । ସେହିପରି ସେ (ବସନ୍ତ କୁମାର ସାହୁ) ସରକାରୀ ଜମିକୁ ଜବରଦଖଲ କରିଛନ୍ତି । ସେ ନେଇ ମଧ୍ୟ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଉ ବୋଲି କହିଛନ୍ତି ।
ରାଘବଙ୍କ ଅଭିଯୋଗ ନେଇ ବସନ୍ତ ସାହୁ କି ପୋଲିସର ପ୍ରତିକ୍ରିୟା ମିଳିପାରିନି ।