ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ28/07/2025 at 7:23 AM
ଉପ-ରାଷ୍ଟ୍ରପତି ନିର୍ବାଚନରେ କାହାକୁ ସମର୍ଥନ କରିବ ବିଜେଡି? ଏହାକୁ ନେଇ ଏବେ ଦ୍ୱନ୍ଦ୍ୱରେ ପଡ଼ିଛି ଦଳ । ଦଳ କାହାକୁ ସମର୍ଥନ ଦେବ ତାକୁ ନେଇ ଦଳୀୟ ସ୍ତରରେ ଆଲୋଚନା ଆରମ୍ଭ ହୋଇଛି । ସଂଖ୍ୟା ଦୃଷ୍ଟିରୁ ଏନଡିଏର ବିଜୟ ପକ୍କା ହୋଇଥିବାବେଳେ ବିଜେଡିର ସମର୍ଥନ ପାଇଁ ଦିଲ୍ଲୀରେ ବି ଦୁଇ ମେଣ୍ଟ ଲବି ଆରମ୍ଭ କରିଛନ୍ତି ।
ଜଗଦୀପ ଧନଖଡଙ୍କ ଅଚାନକ ଇସ୍ତଫା ପରେ ଉପ ରାଷ୍ଟ୍ରପତି ନିର୍ବାଚନ ପାଇଁ ପ୍ରକ୍ରିୟା ଆରମ୍ଭ ହୋଇଛି। ବିଜେପି ନେତୃତ୍ବାଧୀନ ଏନଡିଏ ଓ କଂଗ୍ରେସ ନେତୃତ୍ବାଧୀନ ଇଣ୍ଡି ମେଣ୍ଟ ପ୍ରାର୍ଥୀ ଖୋଜା ଆରମ୍ଭ କରିଦେଇଛନ୍ତି । କିନ୍ତୁ ସବୁବେଳେ ସମଦୂରତ୍ବ କଥା କହୁଥିବା ବିଜେଡି କେଉଁ ମେଣ୍ଟକୁ ସମର୍ଥନ କରିବ ତା ଉପରେ ସମସ୍ତଙ୍କ ନଜର ରହିଛି । ରାଜ୍ୟସଭାରେ ବିଜେଡିର ୭ ଜଣ ସଦସ୍ୟ ଅଛନ୍ତି । ତେଣୁ କାହାକୁ ସମର୍ଥନ ଦିଆଯିବ ସେ ନେଇ ବିଜେଡି ମହଲରେ ଚର୍ଚ୍ଚା ଆରମ୍ଭ ହୋଇଛି । ଶନିବାର ଏ ନେଇ ଶଙ୍ଖ ଭବନରେ ବୈଠକ ବସିଛି କିନ୍ତୁ ଦଳ କାହାକୁ ସମର୍ଥନ ଦେବ ତାହା ସ୍ଥିର ହୋଇପାରିନି ।
ପୂର୍ବରୁ ଓ୍ୱାକଫ ବିଲ ସମେତ ବିଭିନ୍ନ ପ୍ରସଙ୍ଗରେ ବିଜେପିକୁ ସମର୍ଥନ ଦେଇଆସିଛି ବିଜେଡି। କିନ୍ତୁ ୱାକଫ ବିଲକୁ ନେଇ ଶେଷ ମୂହୂର୍ତ୍ତରେ ନାଟକୀୟ ଢଙ୍ଗରେ ନିଷ୍ପତ୍ତି ପରିବର୍ତ୍ତନ ଦଳକୁ ଅକଳ ପକାଇଥିଲା । ଦଳ ଭାଗ ଭାଗ ହୋଇଥିଲା । ଏବେ ପୁଣି ଏନଡିଏକୁ ସମର୍ଥନ ଦେଲେ ଏହା ଭୋଟରଙ୍କୁ ଭୁଲ ସନ୍ଦେଶ ଯାଇପାରେ ବୋଲି ବିଜେଡି ଆଭ୍ୟନ୍ତରୀଣ ମହଲରେ ଚର୍ଚ୍ଚା ଆରମ୍ଭ ହୋଇଛି । ଏଥିରୁ କଂଗ୍ରେସକୁ ଫାଇଦା ମିଳିପାରେ ବୋଲି ଏକ ଗୋଷ୍ଠୀ ଆଶଙ୍କା ପ୍ରକାଶ କରୁଛନ୍ତି । ଇଣ୍ଡି ମେଣ୍ଟକୁ ସମର୍ଥନ ଦେଲେ କଂଗ୍ରେସ ଆଡ଼କୁ ଢଳୁଥିବା ସନ୍ଦେଶ ଯିବ । ଏଭଳି ସ୍ଥିତିରେ ଦଳ ଏବେ ଦ୍ୱନ୍ଦ୍ୱାତ୍ମକ ସ୍ଥିତିରେ ଅଛି ।
ଏନଡିଏର ଲୋକସଭାରେ ୨୯୩ ଓ ରାଜ୍ୟସଭାରେ ୧୧୨ ସାଂସଦ ଅଛନ୍ତି ଏଭଳି ମୋଟ ୪୦୫ ସାଂସଦ ଅଛନ୍ତି । ଉପରାଷ୍ଟ୍ରପତି ନିର୍ବାଚନରେ ବିଜୟୀ ହେବାକୁ ହେଲେ ଆବଶ୍ୟକ ୩୯୪ ଭୋଟ୍ । ଏଭଳି ସ୍ଥଳେ ଏନଡିଏର ବିଜୟ ପକ୍କା ବୋଲି କୁହାଯାଉଛି । ଏନଡିଏ ଅଧିକ ବିଜୟ ବ୍ୟବଧାନ ଚାହୁଁଥିବାବେଳେ ଇଣ୍ଡି ମେଣ୍ଟ ବି ନିଜର ଶକ୍ତି ପ୍ରଦର୍ଶନ କରିବାକୁ ଅଣ୍ଟାଭିଡିଛି । ତେଣୁ ଏବେ ବିଜେଡି ଭୋଟ ଉପରେ ଏନଡିଏ ଓ ଇଣ୍ଡି ମେଣ୍ଟର ନଜର ରହିଛି ।