ଅପମିଶ୍ରଣ ରୋକିବାକୁ FSSAIର ନୂଆ ଫର୍ମୁଲା; ସାରା ଦେଶରେ ହେବ ଦୁଗ୍ଧଜାତ ଦ୍ରବ୍ୟର ପରୀକ୍ଷା, ନକଲି ବିକ୍ରେତା ସାବଧାନ

ନୂଆଦିଲ୍ଲୀ: ଅପମିଶ୍ରିତ ଦୁଗ୍ଧ ଏବଂ ଦୁଗ୍ଧଜାତ ଦ୍ରବ୍ୟ ଉପରେ କଠୋର ପଦକ୍ଷେପ ନେବାକୁ ଯାଉଛି ଏଫ୍ଏସଏସଏଆଇ। FSSAI ଗୁରୁବାର ଦିନ ସୂଚନା ଦେଇଛି ଯେ ଅପମିଶ୍ରଣ ଦୁଗ୍ଧ ଏବଂ ଦୁଗ୍ଧଜାତ ଦ୍ରବ୍ୟ ଉପରେ କଟକଣା ଲଗାଇବା ପାଇଁ ଦେଶବ୍ୟାପୀ ଅଭିଯାନ ଚଳାଇବାକୁ ଯାଉଛି। ସେହିଭଳି କ୍ଷୀର ଏବଂ ଦୁଗ୍ଧଜାତ ଦ୍ରବ୍ୟ ଯେପରିକି ଦହି, ମାୱା, ଛେନା, ପନୀର, ଘିଅ, ବଟର, ଆଇସ୍କ୍ରିମ୍ ଇତ୍ୟାଦି ଭାରତର ବିଭିନ୍ନ ସ୍ଥାନରୁ ସଂଗ୍ରହ କରାଯାଇ ପରୀକ୍ଷା କରାଯିବ। ଏହି ନମୁନା ସଂଗ୍ରହ ରାଜ୍ୟ, ଜିଲ୍ଲା ଏବଂ ବ୍ଲକ ସ୍ତରରେ କରାଯିବ।

ରିପୋର୍ଟ ଅନୁଯାୟୀ, (FSSAI) କହିଛି ଯେ ଦୁଗ୍ଧ ଏବଂ ଦୁଗ୍ଧଜାତ ଦ୍ରବ୍ୟ ପରୀକ୍ଷା କରିବାର କାରଣ ହେଉଛି ଦୁଗ୍ଧ ହେଉଛି ଭାରତରେ ଲୋକଙ୍କ ଖାଦ୍ୟର ଏକ ଅବିଚ୍ଛେଦ୍ୟ ଅଙ୍ଗ। ସମସ୍ତ ବୟସ ବର୍ଗର ଲୋକମାନେ ଦେଶରେ କ୍ଷୀର ଏବଂ ଦୁଗ୍ଧ ଜାତୀୟ ପଦାର୍ଥ ଖାଇବାକୁ ପସନ୍ଦ କରନ୍ତି। ପରିବର୍ତ୍ତିତ ଜୀବନଶୈଳୀ ସହିତ ଲୋକମାନେ ଆଜିକାଲି ସ୍ବାସ୍ଥ୍ୟ ପ୍ରତି ଅଧିକ ସଚେତନ ହୋଇପଡିଛନ୍ତି। ଏହି କାରଣରୁ ଦେଶରେ କ୍ଷୀରର ବ୍ୟବହାର ମଧ୍ୟ ବୃଦ୍ଧି ପାଇଛି। ଏଭଳି ପରିସ୍ଥିତିରେ, ଅପମିଶ୍ରିତ କ୍ଷୀର ଏବଂ ଏହାର ଉତ୍ପାଦ ଉପରେ କଟକଣା ଲଗାଇବା ପାଇଁ FSSAI ଏହି ପଦକ୍ଷେପ ନେଇଥିବା ଜଣାପଡ଼ିଛି। ଏହି ସର୍ଭେରେ, FSSAI ଉଭୟ ଗୁଣବତ୍ତା ଏବଂ ନିରାପତ୍ତା ମାନର ମୂଲ୍ୟାଙ୍କନ କରିବ ଏବଂ ଅପମିଶ୍ରିତ କେନ୍ଦ୍ରଗୁଡ଼ିକୁ ଚିହ୍ନଟ କରିବ। ଏହା ପରେ ରିପୋର୍ଟ ଅନୁଯାୟୀ ଏକ ଗାଇଡଲାଇନ ଜାରି କରାଯିବ ଏବଂ ‌ନିୟମ ଉଲ୍ଲଂଘନ ହେଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।