ବେଙ୍ଗାଲୁରୁ: କାଲି ହୋଇପାରେ କର୍ଣ୍ଣାଟକ ମନ୍ତ୍ରୀମଣ୍ଡଳ ସମ୍ପ୍ରସାରଣ। ରିପୋର୍ଟ ଅନୁଯାୟୀ, ୨୭ ମେ ଶନିବାର ଦିନ କର୍ଣ୍ଣାଟକ ମନ୍ତ୍ରୀମଣ୍ଡଳ ସମ୍ପ୍ରସାରଣ ହୋଇପାରେ ଏବଂ ମୋଟ ୨୪ ଜଣ ବିଧାୟକ ମନ୍ତ୍ରୀ ଭାବରେ ଶପଥ ଗ୍ରହଣ କରିପାରନ୍ତି। ଏହାପୂର୍ବରୁ କର୍ଣ୍ଣାଟକର ମୁଖ୍ୟମନ୍ତ୍ରୀ ସିଦ୍ଧରମୈୟା ଏବଂ ଉପମୁଖ୍ୟମନ୍ତ୍ରୀ ଡି.କେ ଶିବକୁମାର ଗୁରୁବାର ଦିନ ଦିଲ୍ଲୀରେ କଂଗ୍ରେସର ବରିଷ୍ଠ ନେତାଙ୍କ ସହ କ୍ୟାବିନେଟ ସମ୍ପ୍ରସାରଣ ସମ୍ପର୍କରେ ଆଲୋଚନା କରିଛନ୍ତି।
ଉଭୟ ନେତା କଂଗ୍ରେସର କର୍ଣ୍ଣାଟକ ଦାୟିତ୍ୱରେ ଥିବା ରଣଦୀପ ସୁରଜେୱାଲା, ଦଳର ସାଧାରଣ ସମ୍ପାଦକ (ସଂଗଠନ) କେସି ବେଣୁଗୋପାଳଙ୍କୁ ଭେଟିଥିଲେ। ଏହା ପରେ ସେ ତାଙ୍କ ବାସଭବନରେ କଂଗ୍ରେସ ସଭାପତି ମଲ୍ଲିକାର୍ଜୁନ ଖଡଗେଙ୍କ ସହ ପୃଥକ ବୈଠକ କରିଥିଲେ। ଏହା ପରେ ସୁରଜୱାଲା ସିଦ୍ଧରମୈୟା ଏବଂ ଶିବକୁମାରଙ୍କ ସହ ଏକ ବୈଠକ କରି କ୍ୟାବିନେଟରେ ଅନ୍ତର୍ଭୁକ୍ତ ନାମଗୁଡିକ ଉପରେ ଆଲୋଚନା କରିଥିଲେ।
ସୂଚନାଯୋଗ୍ୟ ଯେ କର୍ଣ୍ଣାଟକ ବିଧାନସଭା ନିର୍ବାଚନରେ କଂଗ୍ରେସର ବିଜୟ ପରେ ସିଦ୍ଧରମୈୟା ଏବଂ ଡି.କେ ଶିବକୁମାର ଯଥାକ୍ରମେ କର୍ଣ୍ଣାଟକର ସିଏମ୍ ଏବଂ ଡେପୁଟି ସିଏମ୍ ଭାବରେ ଶପଥ ଗ୍ରହଣ କରିଥିଲେ। ତେବେ ମନ୍ତ୍ରୀମାନଙ୍କୁ ଏପର୍ଯ୍ୟନ୍ତ ସେମାନଙ୍କ ପୋର୍ଟଫୋଲିଓ ବଣ୍ଟନ କରାଯାଇ ନାହିଁ। ପୂର୍ବରୁ ପ୍ରାୟ ୨୮ ଜଣ ବିଧାୟକଙ୍କୁ କ୍ୟାବିନେଟରେ ଅନ୍ତର୍ଭୁକ୍ତ କରିବାର ଯୋଜନା ଥିଲା, କିନ୍ତୁ କଂଗ୍ରେସ ହାଇକମାଣ୍ଡ କେବଳ ଆଠ ଜଣ ମନ୍ତ୍ରୀଙ୍କ ପ୍ରଥମ ତାଲିକାକୁ ଅନୁମୋଦନ କରିଥିଲେ। ସୂତ୍ରରୁ ପ୍ରକାଶ ଯେ ପ୍ରଥମ କ୍ୟାବିନେଟ ସମ୍ପ୍ରସାରଣରେ କେବଳ ସେହି ବରିଷ୍ଠ ବିଧାୟକଙ୍କ ନାମ ଅନୁମୋଦନ କରାଯାଇଛି।