ଏଣିକି ଜାତୀୟ ସଙ୍ଗୀତ ପୂର୍ବରୁ ବାଜିବ ଜାତୀୟ ଗୀତ ‘ବନ୍ଦେ ମାତରମ୍’; ସରକାରଙ୍କ ନୂଆ ନିୟମ
ନୂଆଦିଲ୍ଲୀ,୧୧|୨: ଏଣିକି ଜାତୀୟ ସଙ୍ଗୀତ ପୂର୍ବରୁ ବାଜିବ ଜାତୀୟ ଗୀତ ”ବନ୍ଦେ ମାତରମ୍” | ଏନେଇ ନୂତନ ନିର୍ଦ୍ଦେଶାବଳୀ ଜାରି କରିଛନ୍ତି କେନ୍ଦ୍ର ସରକାର। ନୂଆ ନିୟମ ଅନୁଯାୟୀ, ଜାତୀୟ ଗୀତ “ବନ୍ଦେ ମାତରମ୍” ସମସ୍ତ ସରକାରୀ କାର୍ଯ୍ୟକ୍ରମ, ସରକାରୀ ସ୍କୁଲ କାର୍ଯ୍ୟକ୍ରମ ଓ ଅନ୍ୟାନ୍ୟ ଆନୁଷ୍ଠାନିକ ସମାବେଶରେ ବାଜିବ। ଏବଂ ଏହି ସମୟ ମଧ୍ୟରେ ସମସ୍ତେ ସମ୍ମାନ ଜାତୀୟ ଗୀତକୁ ସମ୍ମାନ ଜଣାଇ ଠିଆ ହେବା ବାଧ୍ୟତାମୂଳକ ହେବ। ଜାତୀୟ ଗୀତ ବାଜିବା ବେଳେ ସେହି ସମୟରେ ସମ୍ମାନ ଦେବା ଏବଂ ଜାତୀୟ ଭାବନାର ସ୍ପଷ୍ଟ ବାର୍ତ୍ତା ଦେବା ପାଇଁ ଧ୍ୟାନର ସହିତ ଠିଆ ହେବାକୁ ପଡ଼ିବ।
ନୂତନ ନିୟମ ଅନୁସାରେ, ଛଅଟି ପଦ ବିଶିଷ୍ଟ ବନ୍ଦେ ମାତରମ୍ ର ପୂର୍ଣ୍ଣ ସଂସ୍କରଣ ଏଣିକି ୩ ମିନିଟ୍ ୧୦ ସେକେଣ୍ଡ ପାଇଁ ବଜାଯିବ। ଏଥିରେ ଦୁର୍ଗାଙ୍କ ସମେତ ତିନି ହିନ୍ଦୁ ଦେବୀଙ୍କର ଉଲ୍ଲେଖ ଅଛି। ଏପର୍ଯ୍ୟନ୍ତ, ମୂଳ ଗୀତ “ବନ୍ଦେ ମାତରମ୍” ର ଛଅଟି ପଦ ମଧ୍ୟରୁ କେବଳ ପ୍ରଥମ ଦୁଇଟି ପଦକୁ ଗାନ କରାଯାଉଥିଲା।
ତ୍ରିରଙ୍ଗା ଉତ୍ତୋଳନ, କାର୍ଯ୍ୟକ୍ରମରେ ରାଷ୍ଟ୍ରପତିଙ୍କ ଆଗମନ, ଜାତି ଉଦ୍ଦେଶ୍ୟରେ ତାଙ୍କର ଭାଷଣ ଏବଂ ଅଭିଭାଷଣ ପୂର୍ବରୁ ଏବଂ ପରେ, ଏହା ସହିତ ରାଜ୍ୟପାଳମାନଙ୍କ ଆଗମନ ଏବଂ ଭାଷଣ ପୂର୍ବରୁ ଏବଂ ପରେ ”ବନ୍ଦେ ମାତରମ୍”କୁ ବଜାଇବା ଅନେକ ସରକାରୀ କାର୍ଯ୍ୟକ୍ରମ ଅବସରରେ ବାଧ୍ୟତାମୂଳକ କରାଯାଇଛି।
ମିଡିଆ ରିପୋର୍ଟ ଅନୁସାରେ, କେନ୍ଦ୍ର ସରକାର ଜାନୁଆରୀ ୨୮ ତାରିଖରେ ଏକ ନିର୍ଦ୍ଦେଶାବଳୀ ଜାରି କରିଥିଲେ। ଏହି ନିର୍ଦ୍ଦେଶାବଳୀରେ, ସରକାର କହିଛନ୍ତି ଯେ, ପଦ୍ମ ପୁରସ୍କାର ସମାରୋହ କିମ୍ବା ରାଷ୍ଟ୍ରପତି ଉପସ୍ଥିତ ଥିବା ଯେକୌଣସି କାର୍ଯ୍ୟକ୍ରମରେ “ବନ୍ଦେ ମାତରମ୍” ବାଜିବ।
ତଥାପି, ସିନେମା ହଲ୍ଗୁଡ଼ିକ ପାଇଁ ଏହି ନିୟମକୁ ବାଧ୍ୟତାମୂଳକ କରାଯାଇନାହିଁ | ଏଥିରୁ ସ୍ପଷ୍ଟ ହେଉଛି ଯେ, ସିନେମା ହଲ୍ଗୁଡ଼ିକରେ “ବନ୍ଦେ ମାତରମ୍” ବଜାଇବା କି ଫିଲ୍ମ ଆରମ୍ଭ ହେବା ପୂର୍ବରୁ ଆଗରେ ଠିଆ ହେବା ବାଧ୍ୟତାମୂଳକ କରାଯିବ ନାହିଁ। ଅଧିକାରୀଙ୍କ ଅନୁସାରେ,“ବନ୍ଦେ ମାତରମ୍”କୁ ସମ୍ମାନ ଦେବା ପାଇଁ ସ୍ପଷ୍ଟ ମାର୍ଗଦର୍ଶନ ପ୍ରଦାନ କରିବା ପାଇଁ ନୂତନ ନିର୍ଦ୍ଦେଶାବଳୀ ସୃଷ୍ଟି କରାଯାଇଛି।
ସୂଚନାଯୋଗ୍ୟ,ଭାରତର ଜାତୀୟ ଗୀତ,“ବନ୍ଦେ ମାତରମ୍”,୧୮୭୫ ମସିହାର ୭ ନଭେମ୍ବରରେ, ଅକ୍ଷୟ ନବମୀର ପବିତ୍ର ଅବସରରେ ବଙ୍କିମ ଚନ୍ଦ୍ର ଚାଟାର୍ଜୀଙ୍କ ଦ୍ୱାରା ଲେଖାଯାଇଥିଲା। ଏବଂ ଏହା ପ୍ରଥମ ଥର ପାଇଁ ୧୮୮୨ ମସିହାରେ ତାଙ୍କ ପତ୍ରିକା “ବଙ୍ଗଦର୍ଶନ”ରେ ତାଙ୍କ ଉପନ୍ୟାସ “ଆନନ୍ଦମଠ”ର ଏକ ଅଂଶ ଭାବରେ ପ୍ରକାଶିତ ହୋଇଥିଲା। ସେହିପରି ୧୮୯୬ ମସିହାରେ, ରବୀନ୍ଦ୍ରନାଥ ଟାଗୋର ଭାରତୀୟ ଜାତୀୟ କଂଗ୍ରେସ ଅଧିବେଶନରେ ମଞ୍ଚ ଉପରେ “ବନ୍ଦେ ମାତରମ୍”କୁ ପ୍ରଥମ ଥର ଗାଇଥିଲେ। ଏହା ପ୍ରଥମ ଥର ପାଇଁ ଜାତୀୟ ସ୍ତରରେ ସାର୍ବଜନୀନ ଭାବରେ ଗାନ କରାଯାଇଥିଲା।
