ସ୍ତ୍ରୀର ମୋବାଇଲ ମାଡ଼ରେ ଗଲା ସ୍ୱାମୀଙ୍କ ଜୀବନ ! ବଲାଙ୍ଗୀରରେ ସ୍ତ୍ରୀ ନାମରେ ହତ୍ୟା ଅଭିଯୋଗ, ଲକ୍ଷ୍ମୀଜୋର ଥାନାରେ ମାମଲା ରୁଜୁ ।

ତରଣୀସେନ ମେହେର

ବଲାଙ୍ଗୀର,୧୨।୭: ପାରିବାରିକ କଳହରୁ ସୃଷ୍ଟି ହୋଇଥିବା ଏକ ଅଭାବନୀୟ ଘଟଣାରେ ସ୍ତ୍ରୀର ମାଡ଼ରେ ସ୍ୱାମୀଙ୍କ ମୃତ୍ୟୁ ଘଟିଥିବା ପରି ଏକ ସାଙ୍ଘାତିକ ଅଭିଯୋଗ ସାମ୍ନାକୁ ଆସିଛି। ବଲାଙ୍ଗୀର ସହରର ଚିମନିଭାଟି ପଡ଼ା ଅଞ୍ଚଳରେ ଘଟିଥିବା ଏହି ଘଟଣା ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି। ସ୍ତ୍ରୀଙ୍କ ମୋବାଇଲ୍ ଆଘାତରେ ଗୁରୁତର ହୋଇ ଚିକିତ୍ସିତ ହେଉଥିବା ସ୍ୱାମୀଙ୍କର ଆଜି ମୃତ୍ୟୁ ଘଟିଛି। ମୃତକଙ୍କ ପରିବାର ପକ୍ଷରୁ ଏହାକୁ ଏକ ସୁଚିନ୍ତିତ ହତ୍ୟାକାଣ୍ଡ ଦର୍ଶାଇ ସ୍ଥାନୀୟ ଲକ୍ଷ୍ମୀଜୋର ଥାନାରେ ଏକ ଲିଖିତ ଅଭିଯୋଗ କରାଯାଇଛି।
ମିଳିଥିବା ସୂଚନା ମୁତାବକ, ମୃତ ସ୍ୱାମୀ ସ୍ୱପ୍ନେଶ୍ୱର ମିଶ୍ର ଓ ତାଙ୍କ ସ୍ତ୍ରୀ ଅନାମିକା ଶତପଥୀଙ୍କ ମଧ୍ୟରେ କୌଣସି ପାରିବାରିକ ବିବାଦକୁ ନେଇ ଗତ ଦୁଇ ଦିନ ତଳେ ଉଗ୍ର ରୂପ ଧାରଣ କରିଥିଲା। ଏଥିରେ ଉତ୍କ୍ଷିପ୍ତ ହୋଇ ଅନାମିକା ଏକ ମୋବାଇଲ୍ ଫୋନ୍ ସାହାଯ୍ୟରେ ସ୍ୱପ୍ନେଶ୍ୱରଙ୍କୁ ଆକ୍ରମଣ କରିଥିଲେ। ମୋବାଇଲ୍ ମାଡ଼ରେ ସ୍ୱପ୍ନେଶ୍ୱର ଗୁରୁତର ଆହତ ହୋଇ ଲହୁଲୁହାଣ ହୋଇପଡ଼ିଥିଲେ। ତାଙ୍କୁ ତୁରନ୍ତ ଡାକ୍ତରଖାନାରେ ଭର୍ତ୍ତି କରାଯାଇଥିଲା। କେବଳ ସେତିକି ନୁହେଁ, ଗତ ଜୁନ୍ ୨୧ ତାରିଖରେ ମଧ୍ୟ ବସଷ୍ଟାଣ୍ଡ ନିକଟରେ ଉଭୟଙ୍କ ମଧ୍ୟରେ ଝଗଡ଼ା ହୋଇଥିଲା ଏବଂ ସେତେବେଳେ ମଧ୍ୟ ଅନାମିକାଙ୍କ ଆକ୍ରମଣରେ ସ୍ୱପ୍ନେଶ୍ୱରଙ୍କ ମୁଣ୍ଡ ଫାଟିଯାଇଥିଲା, ଯେଉଁଥିପାଇଁ ତାଙ୍କ ମୁଣ୍ଡରେ ୫ଟି ଷ୍ଟିଚ୍ ବା ସିଲେଇ ପଡ଼ିଥିଲା।
ସ୍ୱପ୍ନେଶ୍ୱରଙ୍କ ସ୍ୱାସ୍ଥ୍ୟାବସ୍ଥା ଲଗାତାର ବିଗିଡ଼ିବାରେ ଲାଗିଥିଲା। ଆଜି ସକାଳେ ତାଙ୍କ ଅବସ୍ଥା ଅତ୍ୟନ୍ତ ସଙ୍କଟାପନ୍ନ ହେବାରୁ ସ୍ଥାନୀୟ ଡାକ୍ତର ତାଙ୍କୁ ତୁରନ୍ତ ବୁର୍ଲା ବଡ଼ ଡାକ୍ତରଖାନା (VSSUT) ସ୍ଥାନାନ୍ତର କରିବାକୁ ପରାମର୍ଶ ଦେଇଥିଲେ। ମାତ୍ର ବୁର୍ଲା ମେଡିକାଲରେ ପହଞ୍ଚିବା ପରେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଲଗାତାର ଶାରୀରିକ ନିର୍ଯାତନା ଏବଂ ମୁଣ୍ଡ ଓ ଶରୀରର ଭିତର ଅଂଶରେ ଗଭୀର ଆଘାତ ଲାଗିବା ଯୋଗୁଁ ତାଙ୍କର ମୃତ୍ୟୁ ହୋଇଥିବା ସନ୍ଦେହ କରାଯାଉଛି।
ଏହି ସମ୍ବେଦନଶୀଳ ଘଟଣାକୁ ନେଇ ମୃତ ସ୍ୱପ୍ନେଶ୍ୱରଙ୍କ ବାପା ପ୍ରଫୁଲ୍ଲ କୁମାର ମିଶ୍ର (ଜଣେ ଅବସରପ୍ରାପ୍ତ ରାଜସ୍ୱ ନିରୀକ୍ଷକ) ଗଣମାଧ୍ୟମ ସମ୍ମୁଖରେ ନିଜର କୋହଭରା ପ୍ରତିକ୍ରିୟା ରଖିଛନ୍ତି। ସେ ଅଭିଯୋଗ କରିଛନ୍ତି ଯେ, ବୋହୂ ଅନାମିକା ସବୁବେଳେ ତାଙ୍କ ପୁଅକୁ ନିର୍ଯାତନା ଦେଇ ଆସୁଥିଲେ। ପୁଅର ମୃତ୍ୟୁ ପରେ ସେ ଲକ୍ଷ୍ମୀଜୋର ଥାନାକୁ ଏଫ୍‌ଆଇଆର୍ ଦେବାକୁ ଆସିଥିବା ବେଳେ ପୋଲିସ ପ୍ରଥମେ ମାମଲା ରୁଜୁ କରିବାରେ ଟାଳଟୁଳ ନୀତି ଅବଲମ୍ବନ କରିଥିଲା। ପୂର୍ବରୁ ହୋଇଥିବା ବିବାଦର ଆପୋଷ ସମାଧାନ ହୋଇସାରିଛି କହି ଥାନା ଅଧିକାରୀ ମାମଲାକୁ ହାଲୁକା ଭାବେ ନେଉଥିଲେ। ମାତ୍ର ଗଣମାଧ୍ୟମ ଏବଂ ଉଚ୍ଚ ପଦାଧିକାରୀଙ୍କ ହସ୍ତକ୍ଷେପ ଭୟରେ ପୋଲିସ ଶେଷରେ ମାମଲା ଗ୍ରହଣ କରିଛି।
ଏବେ ଲକ୍ଷ୍ମୀଜୋର ଥାନା ପୋଲିସ ଏହି ଘଟଣାରେ ଏକ ମାମଲା ରୁଜୁ କରି ଶବ ବ୍ୟବଚ୍ଛେଦ ରିପୋର୍ଟକୁ ଅପେକ୍ଷା କରିଛି। ରିପୋର୍ଟ ଆସିବା ପରେ ମୃତ୍ୟୁର ପ୍ରକୃତ କାରଣ ସ୍ପଷ୍ଟ ହେବ ।