ବଲାଙ୍ଗୀରରେ ପୁଲିସର ବଡ଼ଧରଣର ଚଢ଼ାଉ: ୨୧ କିଲୋରୁ ଅଧିକ ଗଞ୍ଜେଇ ସହ ଦେଶୀ ପିସ୍ତଲ ଜବତ, ଦୁଇ ଗିରଫ ।
ବଲାଙ୍ଗୀର,୬।୧୧: ବଲାଙ୍ଗୀର ସହରରେ ଅପରାଧ ଏବଂ ନିଶା କାରବାର ବିରୋଧରେ ପୁଲିସ ଏକ ବଡ଼ଧରଣର ସଫଳତା ହାସଲ କରିଛି। ସହରର ନୂଆ ବସ୍ଷ୍ଟାଣ୍ଡ ପଛପଟ ରାଜୀବ ନଗର ଅଞ୍ଚଳରେ ଚାଲିଥିବା ଏକ ବେଆଇନ ଗଞ୍ଜେଇ କାରବାରକୁ ପଣ୍ଡ କରି ଟାଉନ ଥାନା ପୁଲିସ ୨୧ କିଲୋଗ୍ରାମରୁ ଅଧିକ ଗଞ୍ଜେଇ ଏବଂ ଅସ୍ତ୍ରଶସ୍ତ୍ର ଜବତ କରିବା ସହ ଦୁଇ ଜଣ ଅଭିଯୁକ୍ତଙ୍କୁ ଗିରଫ କରିଛି।
ପୁଲିସ ସୂତ୍ରରୁ ପ୍ରକାଶ ଯେ, ରାଜୀବ ନଗର ଅଞ୍ଚଳରେ କିଛି ଦୁର୍ବୃତ୍ତ ବେଆଇନ ଭାବେ ଗଞ୍ଜେଇ ମହଜୁଦ ରଖି ବିକ୍ରି ପାଇଁ ଯୋଜନା କରୁଥିବା ନେଇ ବିଶେଷ ସୂତ୍ରରୁ ଖବର ମିଳିଥିଲା। ଏହାପରେ ପୁଲିସ ପ୍ରଶାସନ ପକ୍ଷରୁ ଏକ୍ଜିକ୍ୟୁଟିଭ ମାଜିଷ୍ଟ୍ରେଟଙ୍କ ଉପସ୍ଥିତିରେ ଉକ୍ତ ସ୍ଥାନରେ ଜୋରଦାର ଚଢ଼ାଉ କରାଯାଇଥିଲା।
ଏହି ଚଢ଼ାଉ ସମୟରେ ପୁଲିସ ୨୧ କିଲୋ ୫୦୦ ଗ୍ରାମ ଗଞ୍ଜେଇ, ଗୋଟିଏ ଦେଶୀ ପିସ୍ତଲ ଏବଂ ଦୁଇଟି ମୋବାଇଲ୍ ଫୋନ୍ ଜବତ କରିବାରେ ସଫଳ ହୋଇଛି। ଏହି ଘଟଣାରେ ସଂପୃକ୍ତ ଥିବା ଦୁଇ ଜଣ ଅଭିଯୁକ୍ତ ରାଜୀବ ନଗରର ଜିତେନ୍ଦ୍ର ସାହୁ ଏବଂ ସଦର ଥାନା ଅଞ୍ଚଳର ବକ୍ସିଉଡାରର ମୌସମ ତ୍ରିପାଠୀଙ୍କୁ ଗିରଫ କରାଯାଇଛି। ସୂଚନାଯୋଗ୍ୟ ଯେ, ଧୃତ ଅଭିଯୁକ୍ତ ମୌସମ ତ୍ରିପାଠୀ ଜଣେ ହାର୍ଡେନ୍ କ୍ରିମିନାଲ୍ ହୋଇଥିବା ବେଳେ ତାଙ୍କ ନାଁରେ ପୂର୍ବରୁ ଏନ୍.ଡି.ପି.ଏସ୍. (NDPS) ମାମଲା ରହିଛି।
ଉଭୟ ଅଭିଯୁକ୍ତଙ୍କ ବିରୁଦ୍ଧରେ ଏନ୍.ଡି.ପି.ଏସ୍. ଆକ୍ଟ ଏବଂ ଆର୍ମସ୍ ଆକ୍ଟ ଅନୁସାରେ ମାମଲା ରୁଜୁ କରାଯାଇ ଆଜି କୋର୍ଟ ଚାଲାଣ କରାଯାଉଛି। ଏହି ଗଞ୍ଜେଇ ଏବଂ ଅସ୍ତ୍ରଶସ୍ତ୍ରଗୁଡ଼ିକ କେଉଁଠାରୁ ଏବଂ କିପରି ଅଣାଯାଇଥିଲା, ଏହାର ମୂଳ ଉତ୍ସ (Source) ଖୋଜିବା ପାଇଁ ପୁଲିସ ପକ୍ଷରୁ ଅଧିକ ତଦନ୍ତ ଜାରି ରହିଛି ଏବଂ ଆବଶ୍ୟକ ପଡ଼ଲେ ଅଭିଯୁକ୍ତ ମାନଙ୍କୁ ରିମାଣ୍ଡରେ ଅଣାଯିବ ବୋଲି ଜଣାପଡ଼ିଛି।
