ଜଗନ୍ନାଥ ନାଏକ

10/10/2023 at 7:31 PM

ଭବାନୀପାଟଣା, ୧୦/୧୦ (ଜଗନ୍ନାଥ ନାଏକ) : ଆଜି ସ୍ଥାନୀୟ ଜିଲ୍ଲାପାଳଙ୍କ ବାସଗୃହ ସମ୍ମିଳନୀ କକ୍ଷରେ ଜିଲ୍ଲାପାଳ ପି.ଅନ୍ବେଶା ରେଡ୍ଡିଙ୍କ ଅଧ୍ଯକ୍ଷତାରେ ଜିଲ୍ଲାସ୍ତରୀୟ ମତ୍ସ୍ୟ ଓ ପ୍ରାଣୀସମ୍ପଦ ମେଳା ତଥା କୃଷି ଯାନ୍ତ୍ରୀକରଣ ମେଳା ଆୟୋଜନ ପାଇଁ ଆୟୋଜକ କମିଟିର ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି । ଏହି ଉପଲକ୍ଷେ ପ୍ରଥମେ ସି.ଡି.ଭି.ଓ ଡଃ ହେମନ୍ତ ପ୍ରଧାନ ମତ୍ସ୍ୟ ଓ ପ୍ରାଣୀ ସମ୍ପଦ ଆୟୋଜନ ନିମନ୍ତେ କାର୍ଯ୍ୟ ପ୍ରସ୍ତୁତି ଯୋଜନାକୁ ପି.ପି.ଟି ମାଧ୍ୟମରେ ଦର୍ଶାଇଥିଲେ । ଗୃହିତ ପ୍ରସ୍ତାବ ଅନୁଯାୟୀ ଆସନ୍ତା 17.11.2023 ଏବଂ 18.11.2023 ଦୁଇଦିନ ସ୍ଥାନୀୟ କଳାହାଣ୍ଡି କୃଷି ବିଶ୍ବବିଦ୍ୟାଳୟ ପଡିଆରେ ଜିଲ୍ଲାସ୍ତରୀୟ ମତ୍ସ୍ୟ ଓ ପ୍ରାଣୀସମ୍ପଦ ମେଳା ଅନୁଷ୍ଠିତ ହେବ । ଜିଲ୍ଲାରେ ମତ୍ସ୍ୟ ଉତ୍ପାଦନ , କୁକୁଡା ଚାଷ ଓ ଅଣ୍ଡା ଉତ୍ପାଦନ , ଗୋପାଳନ ଓ ପ୍ରାଣୀସମ୍ପଦରେ ଅଧିକରୁ ଅଧିକ ଚାଷୀଙ୍କୁ ଅନ୍ତର୍ଭୁକ୍ତ କରିବା ଓ ଉତ୍ପାଦନ କୁ ବଢାଇବା , ସଚେତନତା ସହ ଏଥିରେ ଜୀବିକା ନିର୍ବାହ ପାଇଁ ଉପଯୁକ୍ତ ପରିବେଶ ସୃଷ୍ଟି କରିବା ପାଇଁ ରାଜ୍ୟସରକାରଙ୍କ ନିର୍ଦ୍ଦେଶ କ୍ରମେ ଜିଲ୍ଲା ପ୍ରଶାସନ ଓ ଜିଲ୍ଲା ମତ୍ସ୍ୟ ଓ ପ୍ରାଣୀସମ୍ପଦ ବିଭାଗ ଏହି ମେଳାର ଆୟୋଜନ କରୁଛି । ମତ୍ସ୍ୟ ଓ ପ୍ରାଣୀ ସମ୍ପଦରେ ବିଭିନ୍ନ ସ୍କିମରେ ଅନ୍ତର୍ଭୁକ୍ତ ହୋଇଥିବା ଏବଂ ଇଚ୍ଚୁକ ଥିବା ପ୍ରାୟ 700 ଜଣ ହିତାଧିକାରୀ ସମସ୍ତ ବ୍ଲକ ରୁ ଆସି ଏହି ମେଳା ରେ ଯୋଗ ଦେବେ । 8 ଜଣ ଚାଷୀଙ୍କୁ ଏହି ମେଳାରେ ସମ୍ବର୍ଦ୍ଧନ କରାଯିବ । ମେଳାରେ କୃଷି , ମତ୍ସ୍ୟ , ପ୍ରାଣୀ , ଉଦ୍ୟାନ , ଶିଳ୍ପ ଓ ବିଭିନ୍ନ ବିଭାଗୀୟ 25 ଟି ଷ୍ଟଲ , କଣ୍ଟ୍ରୋଲ ରୁମ , ରେଜିଷ୍ଟ୍ରସନ ରୁମ ଖୋଲିବା ସହ ବାୟୋଫ୍ଲକ ଟ୍ୟାଙ୍କ , କେଜ କଲଚର ଡେମୋ , ମୁଖ୍ୟମନ୍ତ୍ରୀ କୃଷି ଉଦ୍ୟୋଗ ଷ୍ଟଲ ଖୋଲାଯିବ ଏବଂ ଏଲ.ଇ.ଡି ସ୍କ୍ରିନ ମାଧ୍ୟମରେ ସମସ୍ତଙ୍କୁ ବିଭିନ୍ନ ସ୍କିମ ଉପରେ ସୂଚନା ଦିଆଯିବ । ଏହି ମେଲାରେ ଉନ୍ନତ କିସମର ଘୋଡା , ଗାଈ , ଛେଳି , ମେଣ୍ଢା ଓ କୁକୁଡା ପ୍ରଦର୍ଶନ କରାଯିବ । ଦୁଇ ଦିନ ଧରି ଏହି ମେଳାରେ ମତ୍ସ୍ୟ ଓ ପ୍ରାଣୀସମ୍ପଦ ବିଷୟରେ ବିଶେଷଜ୍ଞ ଦ୍ଵାରା ତାଲିମ ମଧ୍ୟ ଦିଆଯିବ ଓ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହେବ ।
ସେଭଳି କୃଷି ଯାନ୍ତ୍ରୀକ ମେଳା ଧରମଗଡ ଉପଖଣ୍ଡ ବିଜୁ କଲ୍ୟାଣ ମଣ୍ଡପ ଠାରେ ଆସନ୍ତା 7/12, 8/12 ଓ 9/12 ତିନି ଦିନ ଧରି ଏବଂ ଜିଲ୍ଲାସ୍ତରରେ ଆସନ୍ତା 19/12 ରୁ 23/12/2023 ପାଞ୍ଚ ଦିନ ଧରି ଅନୁଷ୍ଠିତ ହେବ । ଏଥିରେ ସମସ୍ତ ବ୍ଲକରୁ ଚାଷୀ ତଥା ହିତାଧିକାରୀଙ୍କୁ ନିମନ୍ତ୍ରଣ କରାଯିବ । ଗତବର୍ଷ ଭଳି କୃଷି ମହାବିଦ୍ୟାଳୟ ପଡିଆରେ ଏହି ମେଳାରେ ଚାଷୀଙ୍କୁ ସମ୍ବର୍ଦ୍ଧନା , କୃଷି ସମ୍ବନ୍ଧୀୟ ଯାନ୍ତ୍ରୀକ ଉପକରଣ ପ୍ରଦର୍ଶନ , କୃଷି ର ବିଭିନ୍ନ ସ୍କିମ ର ଷ୍ଟଲ ସହ ତାଲିମ , ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହେବ । ଉପସ୍ଥିତ ଜିଲ୍ଲା ଆୟୋଜକ କମିଟିର ସଭ୍ୟମାନଙ୍କୁ ଜିଲ୍ଲାପାଳ ଏହି ମେଳାର ବ୍ୟାପକ ପ୍ରଚାର ପ୍ରସାର,ଏଥିରେ ଅନ୍ତର୍ଭୁକ୍ତ ଚାଷୀଙ୍କୁ ମେଳା ପୂର୍ବରୁ ସଚେତନ କରି ସୁବିଧାରେ ମେଳା ସ୍ଥଳରେ ପହଞ୍ଚାଇବା ଓ ଅଧିକରୁ ଅଧିକ ଉଦ୍ଯୋଗୀ , ଚାଷୀ ଓ ହିତାଧିକାରୀ ବିଭିନ୍ନ ସ୍କିମ ରେ କିପରି ସାମିଲ ହେବେ ଓ ତାଙ୍କର ଆର୍ଥିକ ଅଭିବୃଦ୍ଧି ରେ ଏହା କିଭଳି ସହାୟକ ହେବ ତାହା ଉପରେ ଦ୍ରୁଷ୍ଟି ଦେବାକୁ ବିଶେଷ ଗୁରୁତ୍ବ ଦେଲେ। ଏହି କାର୍ଯ୍ୟରେ ସମସ୍ତ ସମ୍ପୃକ୍ତ ବିଭାଗ ସହଯୋଗ କରିବାକୁ ସି ଡି ଭି ଓ ଏବଂ ସି ଡି ଏ ଓ ଅନୁରୋଧ କରିଥିଲେ। ସଭାରେ ଉପ ଜିଲ୍ଲାପାଳ, ଧର୍ମଗଡ଼,କୃଷି ବିଜ୍ଞାନ କେନ୍ଦ୍ର ର ବୈଜ୍ଞାନିକ,ନିର୍ବାହୀ ଯନ୍ତ୍ରୀ (କୃଷି), ଡି ପି ସି( ମିଶନ ଶକ୍ତି), ଡି ଆଇ ପି ଆର୍ ଓ, ଡି ଡି ଏଚ , ଏଲ୍ ଡି ଏମ, ଜି ଏମ, ଡି ଆଇ ସି,ପି ଡି ୱାଟର ସେଡ୍, ମତ୍ସ୍ୟ ଓ କୃଷି ବିଭାଗର ଅଧିକାରୀ ଉପସ୍ଥିତ ଥିଲେ।