ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ16/10/2023 at 2:19 PM
ସମ୍ବଲପୁର: ମୌସୁମୀ ପ୍ରତ୍ୟାବର୍ତ୍ତନନର ପ୍ରକ୍ରିୟା ଆରମ୍ଭ ହୋଇଛି। ବର୍ଷା କମି ସରିବାରୁ ନଦୀମାନଙ୍କରେ ଜଳ ପ୍ରବାହ କମିଛି। ତେଣୁ ଛତିଶଗଡ କଲମାରେ ଗେଟ୍ ବନ୍ଦ କରିଛି। ସୋମବାର କଲମାରେ ୫୬ଟି ଗେଟ୍ ବନ୍ଦ କରିଥିବା ବେଳେ ୧୦ଟି ଗେଟ୍ ଖୋଲା ରଖିଛି । ଫଳରେ ହୀରାକୁଦ ଜଳଭଣ୍ଡାରକୁ ପାଣି ପ୍ରବାହ କମିବାରେ ଲାଗିଛି ।
ସୂଚନା ଅନୁଯାୟୀ, ସୋମବାର ପର୍ଯ୍ୟାୟକ୍ରମରେ କଲମା ଉପରେ ଥିବା ସରାଡିହ ବ୍ୟାରେଜର ୭୭ଟି ଗେଟ୍ ବନ୍ଦ କରିଥିବା ବେଳେ ୪ଟି ଗେଟ୍ ଖୋଲା ରଖିଛି ଛତିଶଗଡ । ଉଭୟ କଲମା ଓ ସରାଡିହରେ ଗେଟ୍ ପକାଇବା ପରେ ଜଳ ପ୍ରବାହ ହ୍ରାସ ପାଇ ୧୧ ହଜାର ୮୬୮ କ୍ୟୁସେକ୍ରେ ପହଞ୍ଚିଛି । ସେପଟେ ହୀରାକୁଦର ଜଳସ୍ତର ମଧ୍ୟ ହ୍ରାସ ପାଇ ୬୨୮.୯୫ ଫୁଟରେ ରହିଛି। ହୀରାକୁଦରେ ମଧ୍ୟ ସମସ୍ତ ଗେଟ୍ ବନ୍ଦ ରହିଛି। ସୂଚନାଯୋଗ୍ୟ, ଚଳିତ ବର୍ଷ ହୀରାକୁଦ ଜଳଭଣ୍ଡାରେ ଜଳସ୍ତର ନିଜର ସର୍ବୋଚ୍ଚ ଜଳଧାରଣ କ୍ଷମତା 630 ଫୁଟରେ ପହଞ୍ଚିଥିଲା।