ରାଜାରାମ ଷଡଙ୍ଗୀ

22/10/2023 at 9:07 AM

ସମ୍ବଲପୁର : ସାରା ପଶ୍ଚିମ ଓଡିଶାରେ ପାଳିତ ହେଉଛି ଭାଇ ଜିଉନ୍ତିଆ ଓଷା । ଭାଇମାନଙ୍କ ମଙ୍ଗଳ ତଥା ଦୀର୍ଘାୟୁ କାମନା କରି ଭଉଣୀମାନେ ଅତି ନିଷ୍ଠାର ସହ ଏହି ଓଷା ପାଳନ କରିଥାନ୍ତି । ସମ୍ବଲପୁର ଜିଲ୍ଲା ର ଗାଁ ରୁ ସହର ଯାଏଁ ଏହି ଉଷା ପାଳନ କରାଯାଉଛି । ଆଧୁନିତାର ଛାପ ମଧ୍ୟରେ ଭାଇ ଭଉଣୀଙ୍କ ପବିତ୍ର ସମ୍ପର୍କକୁ ନେଇ ଏହା ପାଳିତ ହୋଇଥାଏ ପ୍ରତି ବର୍ଷ ।
ଜିଲ୍ଲାର ମାନେଶ୍ଵର ବ୍ଲକ ଅନ୍ତର୍ଗତ ସାହାସପୁରରେ ମଧ୍ୟ ପାଳିତ ହୋଇଛି ଏହି ଓଷା । ନିଷ୍ଠାର ସହ ଏଠାରେ ପାଳିତ ହୁଏ ଅନେକ ପର୍ବପର୍ବାଣୀ । ତାରି ଭିତରେ ଆଶ୍ୱୀନ ମାସ ଶୁକ୍ଳପକ୍ଷ ଅଷ୍ଟମୀ ତିଥିରେ ଭଉଣୀ ମାନେ ପାଳନ କରୁଥିବା ଭାଇ ଜିଉନ୍ତିଆ ଓଷା ଅନ୍ୟତମ ।
ଶାକ୍ତ ପରମ୍ପରାକୁ ବହନ କରୁଥିବା ଏହି ଓଷା କୁ ଭଉଣୀ ମାନେ ଅତି ନିଷ୍ଠାର ସହିତ ପାଳନ କରିଥାନ୍ତି । ଭାଇ ମାନଙ୍କ ମଙ୍ଗଳ ଓ ଦୀର୍ଘାୟୁ କାମନା କରି କାୟ ମନବାକ୍ୟରେ ମାଁ ଦୁର୍ଗାଦେବୀଙ୍କ ଶରଣାପନ୍ନ ହୋଇଥାନ୍ତି ଭଉଣୀମାନେ । ବିଶ୍ୱାସ ରହିଛି ଏହା ଦ୍ୱାରା ଭାଇର ସମସ୍ତ ରିଷ୍ଟ ଖଣ୍ଡନ ହେବା ସହ ଦୀର୍ଘାୟୁ ହୋଇଥାନ୍ତି ।
ପ୍ରତିଟି ଭାଇ ମାନଙ୍କ ପାଇଁ ୧୦୮ଟି ଅକ୍ଷତ ଦୂବ, ୧୦୮ ଟି ଅକ୍ଷତ ଅରୁଆ ଚାଉଳକୁ ଏକାଠି କରି ସାତ ପ୍ରକାର ଫଳ ଓ ସାତ ପ୍ରକାର ଫୁଲକୁନେଇ ଜୁଉଁନ୍ତିଆକୁ ବିଡାବାନ୍ଧି ସମର୍ପଣ କରିଥାନ୍ତି ଦୁର୍ଗାଦେବୀଙ୍କ ନିକଟରେ । ତା ପରଦିନ ସକାଳେ ସମର୍ପିତ ଦୂବ,ଚାଉଳ ବିଡାକୁ ନେଇ ଭାଇ କୁ ବନ୍ଦାଇଥାନ୍ତି ।
ଦେବୀ ଦୁର୍ଗାଙ୍କୁ ପ୍ରତିଷ୍ଠା କରି ନୀତିନିୟମ ଅନୁସାରେ ପୂଜାର୍ଚ୍ଚନା କରାଯାଇଥାଏ । ସଂନ୍ଧ୍ୟାରେ ପୋଖରୀ କିମ୍ବା ନଦୀରେ ସ୍ନାନ କରି ବାଲୁକା ପୂଜା କରାଯାଇଥାଏ l ରାତିରେ ନିଜ ପଡାର ପୂଜା ମଣ୍ଡପରେ ସମସ୍ତ ବ୍ରତଧାରୀମାନେ ଏକତ୍ରିତ ହୋଇଥାନ୍ତି ଓ ଧୂପ, ଦୀପ ନୈବେଦ୍ୟ ଦେଇ ପୁରାଣ ପାଠ ସହ ମାଁ ଦୁର୍ଗାଙ୍କୁ ଆରଧାନା କରିଥାନ୍ତି ଭଉଣୀ ମାନେ ନିଜ ଭାଇ ର ମଙ୍ଗଳ ପାଇଁ।
ଏହି ପୂଜା ନିଷ୍ଠାର ସହ ପାଳନ କରିବା ପାଇଁ ଭଉଣୀ ମାନେ ଦିନଯାକ ନିର୍ଜଳା ଉପବାସ କରି ଦେବୀ ଦୁର୍ଗାଙ୍କ ପୂଜାର୍ଚ୍ଚନା କରିଥାନ୍ତି । ଗାଁ ରୁ ସହର ଯାଏଁ ଏହି ଓଷା ଏକ ଧାର୍ମିକ ଭାବନା ସୃଷ୍ଟି କରିବା ସହିତ ଭାଇ ଓ ଭଉଣୀ ର ନିବିଡ ସମ୍ପର୍କକୁ ଆହୁରି ସୁଦୃଢ କରୁଛି। ଏହି ଓଷା ସାମଜିକ ଓ ପାରିବାରିକ ବନ୍ଧନର ଭାବନାକୁ ଆହୁରି ମଜଭୁତ କରିଛି ।