ରାଜ୍ୟକୁ ଫେରିଲା ଶୀତ, ୧୫ଟି ସହରରେ ତାପମାତ୍ରା ୧୫ ଡିଗ୍ରୀ ତଳେ; କେନ୍ଦୁଝରରେ ସର୍ବନିମ୍ନ
ଭୁବନେଶ୍ୱର: ବାତ୍ୟା ମିଗଜୋମ ଯିବା ପରେ ରାଜ୍ୟକୁ ଫେରିଛି ଶୀତ। ସାରା ରାଜ୍ୟରେ ଏବେ ଶୀତ ଲହରି ଜାରି ରହିଛି। ରାଜ୍ୟର ୧୫ଟି ସହରରେ ତାପମାତ୍ରା ୧୫ ଡିଗ୍ରୀ ତଳେ ଥିବା କେନ୍ଦୁଝରରେ ସର୍ବନିମ୍ନ ତାପମାତ୍ରା ୯ ଡିଗ୍ରୀ ରେକର୍ଡ ହୋଇଛି । ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ ପ୍ରେସ୍ ବିଜ୍ଞପ୍ତି ଜରିଆରେ ଏହି ସୂଚନା ଦିଆଯାଇଛି ।
ପାଣିପାଗ ବିଭାଗ ଅନୁଯାୟୀ, ରବିବାର କେନ୍ଦୁଝରରେ ସର୍ବନିମ୍ନ ତାପମାତ୍ରା ୯ ଡିଗ୍ରୀ ରହିଥିଲା। ଏହାପରେ ଦାରିଙ୍ଗବାଡିରେ ପାରଦ ୧୦.୦୫ ଡିଗ୍ରୀ ରେକର୍ଡ ହୋଇଛି । ଏହିପରି ଫୁଲବାଣୀରେ ୧୦, କୋରାପୁଟରେ ୧୧.୦୪ ଡିଗ୍ରୀ, ବାରିପଦାରେ ତାପମାତ୍ରା ୧୨.୪ ଓ ଝାରସୁଗୁଡ଼ାରେ ୧୨.୬ ଡିଗ୍ରୀ ରେକର୍ଡ ହୋଇଛି । ଅନୁଗୁଳ ଓ ସୁନ୍ଦରଗଡ଼ରେ ପାରଦ ୧୩ ଡିଗ୍ରୀ ଏବଂ ଭବାନୀପାଟଣାରେ ୧୩.୬ ଡିଗ୍ରୀ ରହିଛି। ଟ୍ଵିନ ସିଟି ଭୁବନେଶ୍ୱର ଏବଂ କଟକରେ ତାପମାତ୍ରା ୧୫ ଡିଗ୍ରୀକୁ ଖସିବାରୁ ରାତିରେ ଅଧିକ ଶୀତ ଅନୁଭୂତ ହୋଇଛି।
ଆସନ୍ତା ୫ ଦିନ ଯାଏଁ ଆକାଶ ମେଘମୁକ୍ତ ରହିବ। ଫଳରେ ସମଗ୍ର ରାଜ୍ୟରେ ପାରଦ ଆହୁରି କମିପାରେ। ଜାଡ଼ରେ ଥରିବେ ରାଜ୍ୟବାସୀ। ଆଗାମୀ ଦୁଇ ଦିନ ଯାଏଁ ତାପମାତ୍ରା ଖସିବାର ସମ୍ଭାବନା ରହିଥିବା ଆଞ୍ଚଳିକ ପାଣିପାଗ ବିଭାଗ ସୂତ୍ରରୁ ପ୍ରକାଶ।
