ରାଜାରାମ ଷଡଙ୍ଗୀ

6/07/2024 at 9:48 PM

ସମ୍ବଲପୁର:ଯୁଯୁମୁରା ବ୍ଲକ ଅନ୍ତର୍ଗତ ନୂଆଁ ବରଙ୍ଗାମାଲ ପଞ୍ଚାୟତର ସରକାରୀ ପ୍ରାଥମିକ ବିଦ୍ୟାଳୟ କଳ୍ପା ଇକୋ କ୍ଲବ ପକ୍ଷରୁ ୭୫ ତମ ବନ ମହୋତ୍ସବ ପାଳିତ ହୋଇଛି ।
ସମ୍ପୃକ୍ତ ବିଦ୍ୟାଳୟର ଭାରପ୍ରାପ୍ତ ଇକୋ କ୍ଲବ ଶିକ୍ଷକ ଡଃ. ପ୍ରଦୀପ କୁମାର ପଣ୍ଡାଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ବିଭିନ୍ନ ଅନୁଷ୍ଠାନର ବ୍ୟକ୍ତି ବିଶେଷ ” ମାଆଁ ପାଇଁ ଗଛଟିଏ ” ଅଭିଯାନରେ ସାମିଲ ହୋଇ ଚାରା ରୋପଣ କରିଥିଲେ ।
ବନ ବିଭାଗର ସଦର ବନାଞ୍ଚଳର ଭୀମଖୋଜ ବନପାଳ ଶ୍ରୀମତୀ ରୋଶନୀ ନାଏକ ମୁଖ୍ୟ ବକ୍ତା ଭାବରେ ଯୋଗଦେଇ ସାମ୍ପ୍ରତିକ ପରିସ୍ଥିତିରେ ବୃକ୍ଷର ଆବଶ୍ୟକତା ଓ ଜଙ୍ଗଲ ସୁରକ୍ଷା ବିଷୟରେ ଆଲୋଚନା କରିବା ସହିତ ମାଆଁ ପାଇଁ ଗଛଟିଏ ଲଗାଇବା ଓ ତା’ର ଯତ୍ନ ନେବା ପାଇଁ ପରାମର୍ଶ ଦେଇଥିଲେ । ମୁଖ୍ୟ ଅତିଥି ଭାବରେ ପଡ଼ିଆବାହାଲ ବନାଞ୍ଚଳ ଅନ୍ତର୍ଗତ ବଡ଼ସାହିର ବନପାଳ ଶ୍ରୀମତୀ ମମତା ଲୁହା ମଣିଷ ଜୀବନରେ ବୃକ୍ଷର ଆବଶ୍ୟକତା ଉପରେ ଆଲୋକପାତ କରିଥିଲେ । ସମ୍ମାନିତ ଅତିଥି ଭାବରେ ନୂଆଁ ବରଙ୍ଗାମାଲ ପଞ୍ଚାୟତର ନାଏବ ସରପଞ୍ଚ ଶ୍ରୀମତୀ ରାକ୍ଷୀ ପ୍ରଧାନ ଏହାକୁ ପ୍ରଶଂସା କରିବା ସହିତ ଏହା ବୃକ୍ଷ ରୋପଣର ଉଚିତ ସମୟ ବୋଲି କହିଥିଲେ । ସମ୍ମାନିତ ଅତିଥି ଗୋବର୍ଦ୍ଧନ ବଡ଼ମାଲର ଅଙ୍ଗନୱାଡ଼ି କର୍ମୀ ଶ୍ରୀମତୀ ସନ୍ଧ୍ୟା ରାଣୀ କାଣ୍ଡ ବୃକ୍ଷର ବିଭିନ୍ନ ଉପାଦେୟତା ଉପରେ ଆଲୋଚନା କରିଥିଲେ । ଅନ୍ୟତମ ସମ୍ମାନିତ ଅତିଥି ନୂଆ ବରଙ୍ଗାମାଲର ଆଞ୍ଚଳିକ ସାଧନ କେନ୍ଦ୍ର ସଂଯୋଜକ ମୋତିଲାଲ ଝାଙ୍କର ତାଙ୍କ ବକ୍ତବ୍ୟରେ ପୃଥିବୀ ପୃଷ୍ଠରେ ବୃକ୍ଷ ଭଗବାନଙ୍କ ବରଦାନ ବୋଲି କହିଥିଲେ । ଏଥିରେ ସ୍ଵାଗତ ଭାଷଣ ସମ୍ପୃକ୍ତ ବିଦ୍ୟାଳୟର ସହକାରୀ ଶିକ୍ଷକ ତଥା ଇକୋ କ୍ଲବର ଭାରପ୍ରାପ୍ତ ଶିକ୍ଷକ ଡଃ ପଣ୍ଡା ଦେଇଥିଲେ । ବିଦ୍ୟାଳୟର ଭାରପ୍ରାପ୍ତ ପ୍ରଧାନ ଶିକ୍ଷକ ନରେନ୍ଦ୍ର ଭୋଇ ଅତିଥି ପରିଚୟ ପ୍ରଦାନ କରିଥିଲେ ।ଡଃ. ପଣ୍ଡା ବୃକ୍ଷର ବିଭିନ୍ନ ଦିଗ ଏବଂ ମଣିଷ ଓ ପଶୁପକ୍ଷୀ ମାନଙ୍କ ପାଇଁ ଏହାର ଆବଶ୍ୟକତା ଉପରେ ଆଲୋଚନା କରିବା ସହିତ ଜଙ୍ଗଲରୁ ଅବାଧ ବୃକ୍ଷ ଛେଦନ ଗ୍ରୀଷ୍ମ ଋତୁରେ ଉତ୍ତାପ ବୃଦ୍ଧିର ଅନ୍ୟତମ କାରଣ ବୋଲି କହିଥିଲେ। ଭବିଷ୍ୟତରେ ଏହିପରି ବୃକ୍ଷ କଟା ଲାଗି ରହିଲେ ପୃଥିବୀ ପୃଷ୍ଠରୁ ଜୀବସତ୍ତା ଲୋପ ପାଇଯିବ ବୋଲି ତାଙ୍କ ବକ୍ତବ୍ୟରେ ସେ ସୂଚାଇ ବନ ମହୋତ୍ସବ ଉପରେ ତାଙ୍କର ସ୍ଵରଚିତ କବିତା ପାଠ କରିଥିଲେ । ଶେଷରେ ବିଦ୍ୟାଳୟର ଛାତ୍ରୀମାନେ ପରିବେଶ ଉପରେ ଏକ ନୃତ୍ୟ ପରିବେଷଣ କରିଥିଲେ । ଏହା ପରେ ସମସ୍ତେ ବିଦ୍ୟାଳୟ ପରିସର ଭିତରେ ଓ ବାହାରେ ଅଁଳା , ଆମ୍ବ , କରଞ୍ଜ , କୃଷ୍ଣଚୂଡା , ଛତିଆନା , ପାଟଳୀ ଆଦି ବୃକ୍ଷ ରୋପଣ କରିଥିଲେ । ” ମାଆ ପାଇଁ ଗଛଟିଏ ” କାର୍ଯ୍ୟକ୍ରମରେ ଗଛ ଲଗାଇ ତା’ର ବିଶେଷ ଯତ୍ନ ନେବାକୁ ଶପଥ କରିଥିବା ଭାରପ୍ରାପ୍ତ ପ୍ରଧାନ ଶିକ୍ଷକ ନରେନ୍ଦ୍ର ଭୋଇ ଓ ସହକାରୀ ଶିକ୍ଷକ ଶ୍ରୀଯୁକ୍ତ ପ୍ରଦୀପ କୁମାର ପଣ୍ଡାଙ୍କୁ ସଦର ବନାଞ୍ଚଳର ଭିମଖୋଜ ବନପାଳ ଶ୍ରୀମତୀ ରୋଶନୀ ନାଏକ ମାନପତ୍ର ଦେଇ ସମ୍ମାନୀତ କରିଥିଲେ । ଏହି କାର୍ଯ୍ୟକ୍ରମରେ ଗୋବର୍ଦ୍ଧନ ବଡମାଳର ବନ ସୁରକ୍ଷା ସମିତି ପକ୍ଷରୁ ସଞ୍ଜୁ ବାରିକ , ପତଙ୍ଗ ସ୍ବେଚ୍ଛାସେବୀ ଅନୁଷ୍ଠାନ ପକ୍ଷରୁ ଗୋଲିନା ପାତ୍ର ଓ ମାମୁନୀ ନାଏକ ,ସଦର ବନାଞ୍ଚଳର ଭୀମଖୋଜ ବନରକ୍ଷୀ ଅନ୍ନପୂର୍ଣ୍ଣା ନେଗୀ ଓ ହେମବନ୍ତୀ ସିଂହ, ବିଦ୍ୟାଳୟର ମାତୃ କମିଟି , ବିଦ୍ୟାଳୟ ପରିଚାଳନା କମିଟି ଓ ଅଭିଭାବକ ମାନେ ସହଯୋଗ କରିଥିଲେ । ଶେଷରେ ବିଦ୍ୟାଳୟ ପରିଚାଳନା କମିଟିର ଅଧ୍ୟକ୍ଷ ମାର୍କାସ୍ ନାଗ୍‌ ଧନ୍ୟବାଦ ଅର୍ପଣ କରିଥିଲେ।