ଓଡ଼ିଶା ଡଟ୍ ନ୍ୟୁଜ୍

7/08/2024 at 1:00 PM

ବୌଦ୍ଧ: ସାପ କାମୁଡ଼ା ବ୍ୟକ୍ତିଙ୍କୁ ମେଡିକାଲ ଆଣିଲେ । ଅବସ୍ଥା ଗୁରୁତର ଥିବାରୁ ଡାକ୍ତର ବୁର୍ଲା ମେଡିକାଲକୁ ରେଫର କରିଦେଲେ । ହେଲେ ଡାକ୍ତରୀ ଚିକିତ୍ସା ଉପରେ ପରିବାର ଲୋକଙ୍କ ପାଇଲାନି ଭରସା । ଆହତଙ୍କୁ ବୁର୍ଲା ନେବା ବଦଳରେ ନେଇଗଲେ ଗୁଣିଆ ପାଖକୁ । ଗୁଣିଆର ମନ୍ତୁରା ପାଣି ସାଙ୍ଗକୁ ଝଡ଼ାଫୁଙ୍କା ଦେଲାନି କାମ । ଅକାଳରେ ଚାଲିଗଲା ଜଣେ ବ୍ୟକ୍ତି ଜୀବନ । ଏପରି ଘଟଣା ଘଟିଛି ବୌଦ୍ଧ ଜିଲ୍ଲା ପୁରୁଣା କଟକ ଥାନା ପାଟଦୋହଲି ଗାଁରେ । ମୃତ ବ୍ୟକ୍ତି ଜଣଙ୍କ ହେଲେ ହେମାନନ୍ଦ ପ୍ରଧାନ ।

ଗତକାଲି ରାତିରେ ହେମାନନ୍ଦ ଘରେ ଶୋଇଥିବା ବେଳେ ଏକ ବିଷାକ୍ତ ସାପ ତାଙ୍କୁ କାମୁଡ଼ି ଦେଇଥିଲା । ପରେ ସାପଟିକୁ ଗ୍ରାମବାସୀ ଧରି ଏକ ହାଣ୍ଡିରେ ପୂରାଇ ରଖିଥିଲେ । ହେମାନନ୍ଦଙ୍କୁ ବୌଦ୍ଧ ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ ପରିବାର ଲୋକେ । ଅବସ୍ଥା ଗୁରୁତର ହେବାରୁ ହେମାନନ୍ଦଙ୍କଙ୍କୁ ଡାକ୍ତର ବୁର୍ଲା ରେଫର୍ କରିଥିଲେ ।

ପରିବାର ଲୋକ ହେମାନନ୍ଦଙ୍କୁ ବୁର୍ଲା ନେବା ବଦଳରେ ଘରକୁ ଫେରାଇ ଆଣିଥିଲେ । ଘରେ ଗୁଣିଆ ଡାକି ଝଡ଼ାଫୁଙ୍କା କରିଥିଲେ । ଶେଷରେ ହେମାନନ୍ଦଙ୍କ ମୃତ୍ୟୁ ଘଟିଥିଲା ।