ଓଡ଼ିଶା ଡଟ୍ ନ୍ୟୁଜ୍

10/10/2024 at 12:15 PM

ଢେଙ୍କାନାଳ: ବାପା ଆଗରେ ବ୍ରାହ୍ମଣୀ ନଦୀକୁ ଡେଇଁ ପଡ଼ିଲା ପୁଅ । ଏପରି ଦୁଃଖଦ ଘଟଣା ଘଟିଛି ଢେଙ୍କାନାଳ ଜିଲ୍ଲାର ଭୁବନ ଥାନା ଅନ୍ତର୍ଗତ କୀର୍ତ୍ତନପୁର ଗ୍ରାମରେ । ଏପର୍ଯ୍ୟନ୍ତ ଯୁବକଙ୍କ ପତ୍ତା ମିଳିନାହିଁ। ଅଗ୍ନିଶମ ବାହିନୀ ପହଞ୍ଚି ଖୋଜାଖୋଜି ଜାରି ରଖିଛନ୍ତି । ନିଖୋଜ ଯୁବକ ଜଣଙ୍କ ହେଲେ ପର୍ଶୁରାମ କମାର (୨୫) ।

ପର୍ଶୁରାମ ମାମୁ ଘରେ ରହୁଥିଲେ । ଗତକାଲି ସନ୍ଧ୍ୟାରେ ବାପାଙ୍କ ସହ ମାମୁ ଘରୁ ନିଜ ଘରକୁ ଆସୁଥିଲେ । ବାଜିରାଉତ ସେତୁ ଉପରେ ପର୍ଶୁରାମ ହଠାତ୍ ସାଇକେଲରୁ ଓହ୍ଲାଇ ନଦୀକୁ ଡେଇଁ ପଡ଼ିଥିଲେ ।

ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ନିଖୋଜ ଯୁବକଙ୍କୁ ଖୋଜାଖୋଜି କରିଥିଲେ ବି ତାଙ୍କ ସନ୍ଧାନ ମିଳି ନଥିଲା । ରାତି ଅଧିକ ହେବାରୁ ଉଦ୍ଧାର କାର୍ଯ୍ୟ ବନ୍ଦ ରହିଥିଲା । ଆଜି ସକାଳେ ଦମକଳ ବାହିନୀ ପହଞ୍ଚି ନିଖୋଜ ଯୁବକଙ୍କୁ ଖୋଜାଖୋଜି କରୁଛନ୍ତି । ହେଲେ ଏପର୍ଯ୍ୟନ୍ତ ତାଙ୍କର ପତ୍ତା ମିଳିନାହିଁ। କେଉଁ କାରଣ ପାଇଁ ପର୍ଶୁରାମ ନଦୀକୁ ଡେଇଁ ପଡ଼ିଲେ ଜଣାପଡ଼ିନାହିଁ । ନିଖୋଜ ଯୁବକଙ୍କ ବାପା କହିଛନ୍ତି, ଆମେ ବାପ ପୁଅ ସାଇକେଲରେ ଘରକୁ ଆସୁଥିଲୁ । ଆସିଲା ବେଳେ ପୋଲ ଉପରେ ସାଇକେଲ ରଖି ସେ ନଦୀକୁ ଡେଇଁ ପଡ଼ିଥିଲା । କ’ଣ ପାଇଁ ଏମିତି କଲା ଆମେ ଜାଣିନାହୁଁ ।