ସହରୀ ଉଦ୍ୟାନ ପ୍ରୋତ୍ସାହନ କର୍ମଶାଳା
ସମ୍ବଲପୁର: ଦୈନନ୍ଦିନ ଜୀବନରେ ଫଳ ଓ ପନିପରିବାର ଆବଶ୍ୟକତା ଉତ୍ତମ ଓ ନିରୋଗ ସ୍ୱାସ୍ଥ୍ୟ ପାଇଁ ଏକାନ୍ତ ଅପରିହାର୍ଯ୍ୟ ଅଟେ I ବୈଜ୍ଞାନିକ ଗବେଷଣାରୁ ଜଣାପଡିଛି ଯେ ଜଣେ ବୟସ୍କ ବ୍ୟକ୍ତି ପାଇଁ ଦିନକୁ ୪୦୦ ଗ୍ରାମ ପନିପରିବା ଆବଶ୍ୟକ, ଯାହାକି ବିଷହୀନ ଓ ଅଣରସାୟନିକ ହୋଇଥିବା ନିହାତି ଜରୁରୀ କାରଣ ଏବେ ମିଳୁଥିବା ଫଳ ଓ ପନିପରିବା ଗୁଡିକରେ ଏହି ବିଷର ଅଂଶ ରହି ଯିବାର ଦେଖାଯାଇଛି ଯାହାକି ବିଭିନ୍ନ ପ୍ରକାର ସ୍ୱାସ୍ଥ୍ୟଗତ ସମସ୍ୟାର ପ୍ରମୁଖ କାରଣ ବୋଲି ଗବେଷଣାରୁ ଜଣାଯାଇଛି I ତେଣୁ ବିଷମୁକ୍ତ, ତଟକା ଫଳ, ପନିପରିବା ପାଇଁ ନିଜ ଘରେ ଚାଷ କରିବା ଓ ଉତ୍ପାଦକୁ ନିଜେ ଉପଯୋଗ କରିବା ହିଁ ଏକମାତ୍ର ପନ୍ଥା I କିନ୍ତୁ, ସହରାଞ୍ଚଳରେ ସ୍ଥାନର ସ୍ୱଳ୍ପତା, କଂକ୍ରିଟ୍ ମୟ ସହରୀ ସ୍ଥାନ ହେତୁ ଏହା ସମ୍ଭବ ହୋଇପାରୁ ନାହିଁ I ଏହାକୁ ଦୃଷ୍ଟିରେ ରଖି କେନ୍ଦ୍ରୀୟ ଉଦ୍ୟାନ ପରୀକ୍ଷଣ କେନ୍ଦ୍ର, ଭୁବନେଶ୍ବର ଦ୍ୱାରା ପ୍ରସ୍ତାବିତ ଓଡିଶା ରାଜ୍ୟ ସରକାରଙ୍କ ବିତ୍ତ ପୋଷିତ ନାଵୋନ୍ମେସୀ ପ୍ରଯୋଜନା ଅନ୍ତର୍ଗତ ସହରାଂଚଳ ବାସୀଙ୍କ ପାଇଁ ବୈଜ୍ଞାନିକ ପଦ୍ଧତିରେ ଛାତ ଉପର ବଗିଚା ଓ ଘର ବଗିଚାକୁ ପ୍ରୋସ୍ଛାହନ ଦିଆଯାଉଛି I ଏହାର ସଠିକ ଉପଯୋଗ ଦ୍ୱାରା ସହରବାସୀ ଉପକୃତ ହୋଇପାରିବା ସହିତ ସହରାଂଚଳ ପରିବେଶ ମଧ୍ୟ ଉନ୍ନତ ହୋଇପାରିବ I ଏହି ପରିପେକ୍ଷୀରେ ପ୍ରକଳ୍ପର ବିଭିନ୍ନ ଉଦେଶ୍ୟ ଓ କାର୍ଯ୍ୟକାରିତା ଲୋକଙ୍କ ପାଖରେ ଉପଲବ୍ଧ କରିବା ଓ ଜନସଚେତନତା ସୃଷ୍ଟି କରିବା ନିମିତ୍ତ କର୍ମଶାଳା ମାନ ଅନୁଷ୍ଠିତ କରାଯାଉଛି I ସମ୍ୱଲପୁର ପାନ୍ଥନିବାସ ପରିସରରେ କେନ୍ଦ୍ରୀୟ ଉଦ୍ୟାନ ପରୀକ୍ଷଣ କେନ୍ଦ୍ର, ଭୁବନେଶ୍ବର ତରଫରୁ ସହରୀ ଅଞ୍ଚଳରେ ଉଦ୍ୟାନ ଭିଭିକ ଚାଷ ସମ୍ବନ୍ଧୀୟ ଏକ କର୍ମଶାଳା ଅନୁଷ୍ଠିତ ହୋଇଯାଇଅଛି I ଏହି କର୍ମଶାଳାରେ ସ୍ଥାନୀୟ ଅଞ୍ଚଳରେ ବୁଦ୍ଧିଜୀବୀ , ସ୍ୱାସ୍ଥ୍ୟ ପ୍ରତି ସଚେତନ ଥିବା ଲୋକ , ବରିଷ୍ଠ ନାଗରିକ, ମହିଳା ପ୍ରମୁଖ ଯୋଗ ଦେଇଥିଲେ I ଏହି କର୍ମଶାଳାଟି କେନ୍ଦ୍ରର ପ୍ରଧାନ ବୈଜ୍ଞାନିକ ତଥା ପରିଯୋଜନାର ପ୍ରଧାନ ଅନ୍ଵେଷକ ଡଃ. ପି. ଶ୍ରୀନିବାସ ଙ୍କ ଅଧ୍ୟକ୍ଷତାରେ ଆୟୋଜନ କରାଯାଇଥିଲା I ଡଃ. ପି. ଶ୍ରୀନିବାସ ସହରୀ ଅଞ୍ଚଳରେ ଛାତ ବଗିଚା ପାଇଁ ଆବଶ୍ୟକ ବିଭିନ୍ନ ଉପାଦାନ ଗୁଡ଼ିକ ଯେପରିକି କୋକପିଟ, ଗ୍ରୋ-ବ୍ୟାଗ, ଆର୍କା ଡିକୋମ୍ପୋଜର୍, ଆର୍କI ଶସ୍ୟ ପୋଷାକ ରସ, ଆର୍କI ଭେଜିଟେବୁଲ କିଟ, ଆର୍କI ମାଇକ୍ରୋବିଆଲ କନସରଟିଅମ ଇତ୍ୟାଦି ମାଧ୍ୟମରେ ଉନ୍ନତ ପଦ୍ଧତି ଚାଷ ସମ୍ବନ୍ଧରେ ବିଶେଷ ଭାବେ ଆଲୋକପାତ କରିଥିଲେ I ଏହା ସହ ଛାତର ସ୍ଥାୟୀତ୍ୱକୁ ଦୃଷ୍ଟିରେ ରଖି ପାଣି ନ ଜମିବା ପାଇଁ ଡ୍ରେନେଜ୍ ବ୍ୟବସ୍ଥାକୁ ସଠିକ ଭାବେ ପ୍ରସ୍ତୁତ କରିବାକୁ ପରାମର୍ଶ ଦେଇଥିଲେ I ଉଦ୍ୟାନ କୃଷି ଉପ ନିର୍ଦ୍ଦେଶକ ହିମାଂଶୁ ଶେଖର ସାହୁ ଛାତ ବଗିଚାରୁ ଉପଲବ୍ଧ ସତେଜ, କୀଟନାଶକ ମୁକ୍ତ ପନିପରିବା ପାଇବାର ଉପକାରିତା ବିଷୟରେ ବର୍ଣ୍ଣନା କରିଥିଲେ I ଏହି କାର୍ଯ୍ୟକ୍ରମରେ ୬୦ ଜଣ ପ୍ରଶିକ୍ଷଣIର୍ଥୀ ଯୋଗଦେଇ ସହରୀ ଉଦ୍ୟାନିକ ଚାଷ ପାଇଁ ଆଗ୍ରହ ପ୍ରକାଶ କରିବା ସହ ଏହିପରି ଅଭିନବ ଉଦ୍ୟମ ପାଇଁ ସଂସ୍ଥା ତଥା କତୃପକ୍ଷଙ୍କୁ ପ୍ରଶଂସା କରିଥିଲେ I ଯୋଗଦେଇଥିବା ବ୍ୟକ୍ତି ମାନଙ୍କୁ କେନ୍ଦ୍ରୀୟ ଉଦ୍ୟାନ ପରୀକ୍ଷଣ କେନ୍ଦ୍ର ତରଫରୁ ଛାତ ଉପରେ ଚାଷ କରିବା ନିମନ୍ତେ ପ୍ରୋତ୍ସାହନ କରିବା ପାଇଁ ସେହି କେନ୍ଦ୍ର ଉତ୍ପାଦିତ କିଛି ଉପଯୋଗୀ ସାମଗ୍ରୀ ବଣ୍ଟନ କରିଥିଲେ।
