ପ୍ରଜ୍ଞା ପଟ୍ଟନାୟକ

2/05/2023 at 3:10 PM

ଭୁବନେଶ୍ୱର: ନିକଟରେ ଛତିଶଗଡରେ ମାଓବାଦୀ ଆକ୍ରମଣରେ ଦଶ ଜଣ ପୋଲିସ କର୍ମଚାରୀ ଏବଂ ଅନ୍ୟ ଜଣେ ପ୍ରାଣ ହରାଇଥିଲେ। ଏହାକୁ ଦୃଷ୍ଟିରେ ରଖି ରାଜ୍ୟର ୩ ଜିଲ୍ଲାରେ ହାଇ ଆଲର୍ଟ ଜାରି କରାଯାଇଥିଲା। ଏପ୍ରିଲ ୨୬ ରେ ଘଟିଥିବା ଘଟଣା ପରେ ଏବେ ଆଉ ଦୁଇଟି ଜିଲ୍ଲାକୁ ୱାର୍ଣ୍ଣିଂ ଜାରି କରାଯାଇଛି।

ପୂର୍ବରୁ ମାଲକାନଗିରି, ନବରଙ୍ଗପୁର ଏବଂ ନୁଆପଡା ଜିଲ୍ଲାରେ ହାଇ ଆଲର୍ଟ ଜାରି କରାଯାଇଥିଲା। ଏବେ ନକ୍ସଲ ଆକ୍ରମଣକୁ ରୋକିବା ଲାଗି ଏବଂ ମାଓବାଦୀଙ୍କ ପ୍ରବେଶକୁ ରୋକିବା ପାଇଁ ଛତିଶଗଡ ସୀମାବର୍ତ୍ତୀ ଜିଲ୍ଲା ବରଗଡ ଏବଂ କଳାହାଣ୍ଡି ଜିଲ୍ଲାରେ ହାଇ ଆଲର୍ଟ ଜାରି କରାଯାଇଛି। ଏଡିଜି ଅମିତାଭ ଠାକୁରଙ୍କ କହିବା ଅନୁଯାୟୀ, ବରଗଡ ଏବଂ କଳାହାଣ୍ଡି ଜିଲ୍ଲାରେ ଏହି ସତର୍କ ସୂଚନା ଜାରି କରାଯାଇଛି ଏବଂ ଦେଖାଯାଇଛି ଯେ ପ୍ରାୟ ୯୦% ମାଓବାଦୀ ଛତିଶଗଡରୁ ଓଡିଶାରେ ପ୍ରବେଶ କରୁଛନ୍ତି।

ମାଓବାଦୀଙ୍କ ଅନୁପ୍ରବେଶକୁ ନେଇ ଯାଞ୍ଚ ପ୍ରକ୍ରିୟା କଡାକଡି ହୋଇଛି। ଓଡିଶା ପୋଲିସ ମଧ୍ୟ ଏହାକୁ ନେଇ ସତର୍କତା ଅବଲମ୍ବନ କରୁଛି। ନବରଙ୍ଗପୁର, ମାଲକାନଗିରି, ନୁଆପଡା, ବରଗଡ ଏବଂ କଳାହାଣ୍ଡିର ସୀମାନ୍ତ ଜିଲ୍ଲା ପାଇଁ ସତର୍କ ସୂଚନା ଜାରି କରାଯାଇଛି ବୋଲି ସେ କହିଛନ୍ତି। ସୀମାନ୍ତ ଅଞ୍ଚଳରେ କମ୍ବିଂ ଅପରେସନ୍ ମଧ୍ୟ ବୃଦ୍ଧି କରାଯାଇଛି।