ସୌମିତ୍ରି ମେହେର24/12/2024 at 11:11 PM
ଉଲୁଣ୍ଡା : (ସୌମିତ୍ରି ମେହେର) ସୁବର୍ଣ୍ଣପୁର ଜିଲ୍ଲା ଉଲୁଣ୍ଡା ଥାନା ଅନ୍ତର୍ଗତ ଉଦେପଦର ଗ୍ରାମ ନିକଟ ବିଲ ଭିତରେ ଥିବା ଏକ ଗଛରୁ ଜଣେ ଯୁବକଙ୍କ ଝୁଲନ୍ତା ମୃତ ଦେହ ଉଦ୍ଧାର କରାଯାଇଛି । ଯୁବକ ଜଣକ ଏକ ଗାମୁଛା ସାହାଯ୍ୟରେ ବେକରେ ଫାଶି ଲଗାଇ ଉକ୍ତ ଗଛରେ ଝୁଲି ପଡିଥିବା ଜଣାପଡିଛି । ମୃତ ଯୁବକ ଖମ୍ବେଶ୍ୱରୀପାଲି ଗ୍ରାମର ଶିବ ଶଙ୍କର କୁଶଳ ଏବଂ ସେ ଉଦେପଦର ଗ୍ରାମରେ ବିବାହ କରିଥିବା ଜଣାପଡିଛି । ଶିବ ଶଙ୍କର ଉଦେପଦର ଗ୍ରାମରେ ବିବାହ କରିଥିବା ବେଳେ କୌଣସି ଘଟଣାକୁ ନେଇ ସ୍ତ୍ରୀ ସହିତ କଥା କଟାକଟି ହୋଇଥିଲା । ଫଳରେ ଶିବ ଶଙ୍କର ରାତିରେ ଘରୁ ବାହାରି ଯାଇଥିବା ମଙ୍ଗଳବାର ସକାଳୁ ଉକ୍ତ ଗଛରେ ତାଙ୍କ ଝୁଲନ୍ତା ମୃତଦେହ ସ୍ଥାନୀୟ ଲୋକ ଦେଖିବାକୁ ପାଇଥିଲେ । ଏନେଇ ଉଲୁଣ୍ଡା ପୁଲିସ ସୂଚନା ପାଇବା ପରେ ଥାନା ଅଧିକାରୀ ପଂଚାନନ ନାୟକଙ୍କ ସହିତ ଥାନା କର୍ମଚାରୀ ଘଟଣାସ୍ଥଳରେ ପହଂଚିବା ସହିତ ପ୍ରାଥମିକ ତଦନ୍ତ କରି ଶବ ଉଦ୍ଧାର କରିଥିଲେ । ଏନେଇ ଉଲୁଣ୍ଡା ଥାନାରେ ଏକ ଅପମୃତ୍ୟୁ ମାମଲା ରୁଜୁ କରିବା ସହିତ ବ୍ୟବଚ୍ଛେଦ ପାଇଁ ସୁବର୍ଣ୍ଣପୁର ଜିଲ୍ଲା ମୁଖ୍ୟ ଚିକିତ୍ସାଳୟକୁ ଶବ ପଠାଯାଇଥିଲା । ଏନେଇ ଉଲୁଣ୍ଡା ଥାନା ପୁଲିସ ଅଧିକ ତଦନ୍ତ କରୁଥିବା ଜଣାପଡିଛି ।