ଓଡ଼ିଶା ଡଟ୍ ନ୍ୟୁଜ୍

26/12/2024 at 11:26 AM

ସୋନପୁର: ସାଙ୍ଗ ସହ ଯାତ୍ରା ଦେଖିବାକୁ ଯାଇଥିଲେ । ଆଉ ଯାତ୍ରା ଦେଖିବା ସହ ମଜା ଉଠାଇଲେ । ଯାତ୍ରା ସରିବା ପରେ ବାଇକରେ ଘରୁକୁ ଫେରୁଥିଲେ । ହେଲେ ଜାଣି ନଥିଲେ ଏହି ଯାତ୍ରା ଥିଲା ତାଙ୍କ ଜୀବନର ଶେଷ ଯାତ୍ରା । ଘରକୁ ଫେରୁଥିବା ବେଳେ ବାଇକ ଧକ୍କାରେ ଚାଲିଗଲା ଜଣଙ୍କର ଜୀବନ । ଆଉ ଜଣେ ଗୁରୁତର ଅବସ୍ଥିରେ ଜୀବନ ସହ ସଂଗ୍ରାମ କରୁଛନ୍ତି । ଘଟଣା ଘଟିଛି ସୁବର୍ଣ୍ଣପୁର ଜିଲ୍ଲା ବିନିକା ଥାନା କମୀରା ଗାଁରେ । ମୃତକ ହେଲେ କୃଷ୍ଣ ତାଣ୍ଡି ଏବଂ ଗୁରୁତର ଜଣକ ହେଲେ ନରେଶ ବାରିକ ।

କମୀରା ଗାଁରେ ଗତ ରାତିରେ ଯାତ୍ରା ହେଉଥିଲା । ଯାତ୍ରା ଦେଖିବା ନିମନ୍ତେ କୃଷ୍ଣ ଏବଂ ନରେଶ ସେଠାକୁ ଯାଇଥିଲେ । ଯାତ୍ରା ଦେଖି ଉଭୟ ବାଇକରେ ଘରକୁ ଫେରୁଥିଲେ । ମାତ୍ର ରାମପୁର ଗାଁ ନିକଟରେ ସେମାନଙ୍କ ବାଇକ୍‌ ଭାରସାମ୍ୟ ହରାଇ ଏକ ଗଛରେ ପିଟି ହୋଇଯାଇଥିଲା । ଉଭୟଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ବିନିକା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା I ସେଠାରେ କୃଷ୍ଣଙ୍କ ମୃତ୍ୟୁ ଘଟିଥିବା ବେଳେ ନରେଶଙ୍କ ସ୍ବାସ୍ଥ୍ୟାବସ୍ଥା ଗୁରୁତର ରହିଥିଲା । ଏହାପରେ ତାଙ୍କୁ ବୁର୍ଲା ବଡ଼ ମେଡ଼ିକାଲକୁ ସ୍ଥାନାନ୍ତର କରାଯାଇଛି I ଖବର ପାଇ ବିନିକା ପୋଲିସ ପହଞ୍ଚି ତଦନ୍ତ ଆରମ୍ଭ କରିଥିବା ବେଳେ ଗାଡ଼ିକୁ ଜବତ କରିଛି । ଏହାସହ ଶବ ବ୍ୟବଚ୍ଛେଦର ବ୍ୟବସ୍ଥା କରିଛି ।