ପୋଲରେ ପିଟି ହୋଇ ୨୦ ଫୁଟ ତଳକୁ ଖସି ବାଇକ ଚାଳକଙ୍କ ମୃତ୍ୟୁ
ଗଜପତି: ମୋହନା ସ୍ଥିତ ଲେଡ଼ବନ୍ଧରେ ଥିବା ଏକ ପୋଲରେ ଦୁର୍ଘଟଣା ଘଟି ଜଣେ ବାଇକ ଚାଳକଙ୍କ ମୃତ୍ୟୁ ଘଟିଛି । ପୋଲ ବାଡ଼ାକୁ ଧକ୍କା ଦେଇ ବାଇକ୍ ଚାଳକ ୨୦ ଫୁଟ ତଳକୁ ଖସି ପଡ଼ି ମୃତ୍ୟୁବରଣ କରିଛନ୍ତି । ମୃତ ବାଇକ ଆରୋହୀଙ୍କର ପରିଚୟ ମିଳିନାହିଁ ।
ଗତକାଲି ରାତିରେ ପୋଲ ଉପରେ ବାଇକ ପଡ଼ିଥିବା ଦେଖି ସ୍ଥାନୀୟ ଲୋକଙ୍କର ସନ୍ଦେହ ହୋଇଥିଲା । ସେମାନେ ପୋଲିସ ଓ ମୋହନା ଅଗ୍ନିଶମ ବାହିନୀକୁ ଖବର ଦେଇଥିଲେ । ଅଗ୍ନିଶମ ବାହିନୀ ପହଞ୍ଚି ଯୁବକଙ୍କୁ ପୋଲ ତଳୁ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରିଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ପୋଲିସ ମୃତଦେହକୁ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇବା ସହ ଘଟଣାର ତଦନ୍ତ କରୁଛି । ଏଥିସହ ଦୁର୍ଘଟଣାଗ୍ରସ୍ତ ବାଇକକୁ ଜବତ କରିଛି ।
