ଓଡ଼ିଶା ଡଟ୍ ନ୍ୟୁଜ୍

9/01/2025 at 11:47 AM

କଳାହାଣ୍ଡି: ବେଆଇନ୍ ମଦ ଭାଟି ଉପରେ ଚଢ଼ାଉ ଅବକାରୀ କର୍ମଚାରୀଙ୍କୁ ପଡ଼ିଲା ମହଙ୍ଗା । ଉତ୍ତ୍ୟକ୍ତ ଗ୍ରାମବାସୀ କର୍ମଚାରୀଙ୍କୁ ପିଟିଲେ ଗୋଡ଼ାଇ ଗୋଡ଼ାଇ । ଆକ୍ରମଣରେ ଦୁଇ ଅବକାରୀ କର୍ମଚାରୀ ଗୁରୁତର ଆହତ ହୋଇଛନ୍ତି । ସେମାନଙ୍କୁ ମେଡ଼ିକାଲରେ ଭର୍ତ୍ତି କରାଯାଇଛି ।  ଘଟଣା କଳାହାଣ୍ଡି ଜିଲ୍ଲା ସଦର ଥାନା ଅନ୍ତର୍ଗତ କନର୍ଲା ଗାଁରେ ଘଟିଛି ।

ଅଭିଯୋଗ ଅନୁସାରେ, କନର୍ଲା ଗାଁରେ ବେଆଇନ ମଦ କାରବାର ହେଉଥିବା ନେଇ ଅବକାରୀ ବିଭାଗ ପାଖରେ ଖବର ପହଞ୍ଚିଥିଲା । ଏହାପରେ ଅତର୍କିତ ଭାବେ ସଦର ଅବକାରୀ ଟିମ୍ କନର୍ଲା ଗାଁରେ ଚଢାଉ କରିଥିଲା । ତେବେ ଅବକାରୀ ବିଭାଗ ଆସିବା ଦେଖି ବେଆଇନ୍ ମଦ କାରବାରରେ ସଂପୃକ୍ତ ଲୋକେ ରୁଣ୍ଡ ହୋଇ ସେମାନଙ୍କ ଗାଡ଼ିକୁ ଆକ୍ରମଣ କରି ଭଙ୍ଗାରୁଜା କରିବା ସହ କର୍ମଚାରୀଙ୍କୁ ଗୋଡେଇ ଗୋଡେଇ ଆକ୍ରମଣ କରିଥିଲେ । ଏଥିରେ ଅବକାରୀ ବିଭାଗର ଦୁଇ କନଷ୍ଟେବଳ ଗୁରୁତର ଆହତ ହୋଇଥିବା ବେଳେ ଉଭୟଙ୍କୁ ଚିକିତ୍ସା ପାଇଁ ଭବାନୀପାଟଣା ମୁଖ୍ୟ ଡାକ୍ତରଖାନାରେ ଭର୍ତ୍ତି କରାଯାଇଛି ।

ଏ ସଂକ୍ରାନ୍ତରେ ଭବାନୀପାଟଣା ସଦର ଥାନାରେ ଅବକାରୀ ବିଭାଗ ପକ୍ଷରୁ ଏତଲା ଦିଆଯାଇଛି । ପୋଲିସ୍‌ ମାମଲାର ତଦନ୍ତ ଆରମ୍ଭ କରିଥିବା ବେଳେ କାହାକୁ ଗିରଫ କରିନି ।