ବିଭୁତି ଭୂଷଣ ଜେନା18/01/2025 at 6:44 PM
କେନ୍ଦୁଝର ଜିଲ୍ଲା ଆନନ୍ଦପୁର ବିଧାନସଭା କ୍ଷେତ୍ରରେ ବିଜେଡି ପ୍ରାର୍ଥୀ ବିଧାୟକ ଭାବେ ଗଡ଼ ଦଖଲ କରିଛି l କିନ୍ତୁ ଦଳର କନ୍ଦଳ ଏବେ ପଦାରେ ପଡିଛି l ଗତ ଦୁଇ ଦିନ ପୂର୍ବେ ହାଟଡିହୀ ବ୍ଲକ ପରିସରରେ ୩୬ନଂ ଜୋନ ଜିଲା ପରିଷଦ ସଦସ୍ୟ କୌଶଲ୍ୟା ସେଠି ଏବଂ ଅକରୁଆ ଗ୍ରାମ ପଞ୍ଚାୟତର ବିଜେଡି ସମର୍ଥିତ ସରପଞ୍ଚ ହେମଲତା ବେହେରାଙ୍କ ମଧ୍ୟରେ କନ୍ଦଳ ଉଗ୍ର ରୂପ ନେଇଛି l ଅଭିଯୋଗ ଅନୁସାରେ ଅକରୁଆ ଗ୍ରାମ ପଞ୍ଚାୟତ ଠିକ ଭାବେ ଚାଲୁନଥିବା ନେଇ ଚଳିତ ମାସ ଗତ ଗତ ୧୫ ତାରିଖ ବୁଧବାର ପଞ୍ଚାୟତ ସମିତି ବୈଠକରେ ଜିଲା ପରିଷଦ ସଦସ୍ୟ ସେଠି ପ୍ରଶ୍ନ ଉଠାଇ ଥିଲେ l ପରବର୍ତ୍ତୀ ସମୟରେ ଉକ୍ତ ପ୍ରସଙ୍ଗକୁ ନେଇ ସରପଞ୍ଚ ବେହେରା ଏବଂ ଜିଲା ପରିଷଦ ସଦସ୍ୟ ସେଠି ମଧ୍ୟରେ ମୁହାଁମୁହିଁ ପରିସ୍ଥିତି ଏବଂ ଉତ୍ତେଜନା ବ୍ଲକ ପରିସରରେ ସୃଷ୍ଟି ହୋଇଥିଲା l ସେଠାରେ ଉପସ୍ଥିତ କିଛି ସରକାରୀ କର୍ମଚାରୀ, ଲୋକ ପ୍ରତିନିଧି ଏବଂ ସାଧାରଣ ଲୋକଙ୍କ ହସ୍ତକ୍ଷେପ ପରେ ପରିସ୍ଥିତି ନରମି ଥିଲା l କିନ୍ତୁ ପରେ ଜିଲା ପରିଷଦ ସଦସ୍ୟ ସେଠି ନନ୍ଦିପଦା ଥାନାରେ ସରପଞ୍ଚ ଏବଂ ତାଙ୍କ ସ୍ୱାମୀ ଚତୁର୍ଭୁଜ ସ୍ୱାଇଁଙ୍କ ନାମରେ ଏକ ଲିଖିତ ଅଭିଯୋଗ କରିଛନ୍ତି l ତାଙ୍କୁ ଜାତିଆଣ ଆକ୍ଷେପ ଏବଂ ଗାଳି ଗୁଲଜ କରାଯାଇଥିବା ଅଭିଯୋଗରେ ଦର୍ଶାଯାଇଛି l କେସ ନଂ ୧୩/୨୦୨୫ ରେ ପୋଲିସ ଏକ ମାମଲା ରୁଜୁ କରି ତଦନ୍ତ ଚାଲିଥିବା ଥାନା ଅଧିକାରୀ ରବୀନ୍ଦ୍ର ପାତ୍ର କହିଛନ୍ତି l ସରପଞ୍ଚ ବେହେରା କହିଛନ୍ତି ଯେ ଜିଲା ପରିଷଦ ସଦସ୍ୟ ସେଠି ପୂର୍ବରୁ ଏଠାରେ ସରପଞ୍ଚ ଥିଲେ l ତେଣୁ ପଞ୍ଚାୟତକୁ ନିଜ ଆୟତରେ ରଖି ହାକିମାତ କରିବା ପାଇଁ ଚେଷ୍ଟା କରୁଛନ୍ତି l ଫଳରେ ବିଭିନ୍ନ କ୍ଷେତ୍ରରେ ଅଯଥା ହସ୍ତକ୍ଷେପ, ଅଶାନ୍ତି କରି ନାନା ବ୍ୟାଘାତ ସୃଷ୍ଟି କରୁଛନ୍ତି l ପୂର୍ବରୁ ସେ ଏକ ଡ୍ରେନ କାର୍ଯ୍ୟରେ ଚଞ୍ଚକତା କରି ଅର୍ଥ ଉଠାଣ କରିଥିବା ନେଇ ଭିଜିଲାନ୍ସ ନିକଟରେ ଅଭିଯୋଗ ହୋଇଛି l ଭାତ ହାଣ୍ଡିରୁ ଗୋଟିଏ ଭାତ ଚିପିବା ପରି ଏଠାରେ ବିଜେଡି ଦଳର କନ୍ଦଳ ଶେଷରେ ପଦାରେ ପଡିଛି l ଏପରି କନ୍ଦଳକୁ ଦଳୀୟ ନେତା କିମ୍ବା କର୍ମୀ ମାନେ ଅଦ୍ୟାବଧି ସମାଧାନ କରିପାରି ନାହାଁନ୍ତି l ଯାହା ଫଳରେ ମାମଲା ଶେଷରେ ଥାନାରେ ପହଞ୍ଚିଛି l ବିଜେଡି ଦଳର ଜଣେ ବରିଷ୍ଠ କର୍ମୀ ନାମ ଗୋପନ ରଖିବା ସର୍ତ୍ତରେ କହିଛନ୍ତି ଯେ ଆମ ବିଧାୟକ ଠିକ ଭାବେ ଭୂମିକା ନିର୍ବାହ କରୁ ନାହାଁନ୍ତି l ଦଳୀୟ ସଂଗଠନକୁ ସକ୍ରିୟ ଏବଂ ମଜଭୁତ କରିବା ପାଇଁ କୌଣସି ଭୂମିକା ଗ୍ରହଣ କରୁ ନାହାଁନ୍ତି l ଆଗ ଧାଡ଼ିର ଛାମୁଆ ନେତା, କର୍ମୀଙ୍କୁ ଅଣଦେଖା କରି ଇଚ୍ଛା ଅନୁସାରେ ମନମୁଖି କାର୍ଯ୍ୟ କରୁଛନ୍ତି l ଫଳରେ ନିରୁତ୍ସାହ ଭାବନା ସୃଷ୍ଟି ହେଉଛି l ଏପରି ସ୍ଥିତିରେ ଦଳ ପାଇଁ ଏକ ଉଚିତ ଏବଂ ଉପଯୁକ୍ତ ମୁରବୀର ଆବଶ୍ୟକତା ଅଛି l ଅପର ପକ୍ଷେ ଦିନକୁ ଦିନ ଦଳ ଦୁର୍ବଳ ହେଉଥିବା ଏବଂ କର୍ମୀ ମାନେ ଆଗପରି ଆଉ ସକ୍ରିୟ ନଥିବା ଜଣାପଡିଛି l ଗତ ନିର୍ବାଚନରେ ଭାଜପା ସଂଖ୍ୟା ଗରିଷ୍ଠତା ହାସଲ କରି ସରକାର ଗଢିବା ପରେ ଭାଜପା କର୍ମୀ ମାନେ ଯଥେଷ୍ଟ ସକ୍ରିୟ ହୋଇଛନ୍ତି l ବିଭିନ୍ନ ସଭା, ସମିତି, ଉଦଘାଟନ, ଆଧାତ୍ମିକ ଉତ୍ସବରେ ଭାଜପା ନେତା ଏବଂ ମନ୍ତ୍ରୀ, ସାଂସଦ ମାନଙ୍କୁ ଅତିଥି ଭାବେ ଦେଖିବାକୁ ମିଳୁଛି l ନିକଟ ଅତୀତରେ ଭାଜପା ଦଳର ମନ୍ତ୍ରୀ ଏବଂ ସାଂସଦ ତରତରା ଠାରେ ଆୟୋଜିତ ଏକ ଖେଳ ଉତ୍ସବରେ ଅତିଥି ଭାବେ ଯୋଗ ଦେବା ଭଳି ଉଦାହରଣ ମଧ୍ୟ ରହିଛି l ଏତଦ ବ୍ୟତୀତ ବିଧାନସଭା କ୍ଷେତ୍ର ସ୍ତରୀୟ ଭାଜପା ନେତୃ ମଣ୍ଡଳୀର ବ୍ୟକ୍ତି ବିଶେଷ ମାନେ ବିଭିନ୍ନ କାର୍ଯ୍ୟକ୍ରମରେ ଅତିଥି ଭାବେ ଯୋଗ ଦେଉଥିବା ଦେଖିବାକୁ ମିଳୁଛି l ଫଳରେ ଲୋକ ମାନେ ଏବେ ଭାଜପା ପ୍ରତି ମୁହାଁଉଥିବା କହିଲେ ଅତ୍ୟୁକ୍ତି ହେବନି l