ଓଡ଼ିଶା ଡଟ୍ ନ୍ୟୁଜ୍6/03/2025 at 12:11 PM
ଭୁବନେଶ୍ବର: ଆସନ୍ତାକାଲି ଥିଲା ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ଜୟନ୍ତୀ । ,ଥିପାଇଁ ରାଜ୍ୟ ସରକାର ରାଜ୍ୟସ୍ତରୀୟ ବିଜୁ ଜୟନ୍ତୀ କାର୍ଯ୍ୟକ୍ରମ କରିଥିଲେ । ଏଥିରେ ବିଶିଷ୍ଟ ଅତିଥି ଭାବେ ଯୋଗ ଦେବାକୁ ବିରୋଧୀ ଦଳ ନେତା ନବୀନ ପଟ୍ଟନାୟକଙ୍କୁ ମୁଖ୍ୟମନ୍ତ୍ରୀ ମୋହାନ ମାଝୀ ନିମନ୍ତ୍ରଣ କରିଥିଲେ । ହେଲେ ନବୀନ କାର୍ଯ୍ୟକ୍ରମକୁ ଆସି ନଥିଲେ । ଏହାକୁ ନେଇ ବିରୋଧୀ ଦଳ ନେତାଙ୍କୁ କଡ଼ା ସମାଲୋଚନା କରିଛନ୍ତି ମୁଖ୍ୟମନ୍ତ୍ରୀ । ନବୀନ କାର୍ଯ୍ୟକ୍ରମକୁ ନଆସି ପାପ କରିଛନ୍ତି ବୋଲି କହିଛନ୍ତି ମୋହନ ।
ରାଜ୍ୟ ସରକାରଙ୍କ ପକ୍ଷରୁ ଭୁବନେଶ୍ୱର ଜୟଦେବ ଭବନଠାରେ ବିଜୁ ଜୟନ୍ତୀ କାର୍ଯ୍ୟକ୍ରମ ଆୟୋଜିତ ହୋଇଥିଲା । ଏଥିରେ ଯୋଗଦେଇ ମୁଖ୍ୟମନ୍ତ୍ରୀ ମୋହନ ମାଝୀ କହିଛନ୍ତି, ‘ରାଜ୍ୟସ୍ତରୀୟ ବିଜୁ ଜୟନ୍ତୀ ସମାରୋହକୁ ନ ଆସି ନବୀନ ପାପ କରିଛନ୍ତି । ତାଙ୍କୁ ନିମନ୍ତ୍ରଣ କରିଥିଲୁ, ସେ ଆସିଥିଲେ ଉତ୍ସବ ପୂର୍ଣ୍ଣାଙ୍ଗ ହୋଇଥାନ୍ତା । ଏହାକୁ ନେଇ ରାଜନୀତି କରିବା କଥା ନୁହେଁ ।’
ଏହାସହ ବିଜୁ ବାବୁଙ୍କ ଅଧୁରା ସ୍ବପ୍ନ ‘ଗାଁକୁ କାମ ମାକୁ ସମ୍ମାନ’ କଥା ଉଠାଇ ମଧ୍ୟ ପୂର୍ବ ସରକାର ଉପରେ ଖୁବ ବର୍ଷିଛନ୍ତି ମୋହନ । ସେ କହିଛନ୍ତି, ଯେଉଁମାନେ ବିଜୁ ବାବୁଙ୍କ ଅଧୁରା ସ୍ୱପ୍ନ ପୂରଣ କରିବାକୁ ପ୍ରଚାର କରୁଥିଲେ, ତାହାକୁ ବାସ୍ତବରେ କାର୍ଯ୍ୟକାରୀ କରିପାରିଲେ ନାହିଁ । ବିଜୁ ବାବୁଙ୍କ ସ୍ବପ୍ନ ପୂରଣ କେବଳ ରାଜନୀତିରେ ରହିଗଲା । ହେଲେ ବିଜେପି ସରକାର ଏହାକୁ ବାସ୍ତବିକତା ରୂପ ଦେବାକୁ ଯାଉଛି । ଓଡ଼ିଶା ପାଇଁ ବିଜୁ ବାବୁ ଯେଉଁ ସ୍ବପ୍ନ ଦେଖିଥିଲେ ତାକୁ ଆମ ସରକାର ପୂରଣ କରିବ ।
ଭୁବନେଶ୍ବର ଜୟଦେବ ଭବନରେ ଆୟୋଜିତ ରାଜ୍ୟସ୍ତରୀୟ ବିଜୁ ଜୟନ୍ତୀ ଉତ୍ସବରରେ ନବୀନ ପଟ୍ଟନାୟକ ବିଶିଷ୍ଟ ଅତିଥି ଭାବେ ଯୋଗଦେବାର ଥିଲା । କିନ୍ତୁ ନବୀନ ନଆସିବାରୁ ଉତ୍ସବରୁ ତାଙ୍କ ଚୌକି କାଢି ନିଆଯାଇଥିଲା । ନବୀନ ଉତ୍ସବକୁ ଆସି ନଥିବା ବେଳେ କେବଳ ବିଜେଡିର ବରିଷ୍ଠ ନେତା ପ୍ରଫୁଲ୍ଲ ଘଡ଼େଇ ଯୋଗ ଦେଇଥିଲେ ।ମାର୍ଚ୍ଚ ୫ ତାରିଖରେ ବିଜୁ ପଟ୍ଟନାୟକ ଜନ୍ମଦିନକୁ ୩ ଦଶନ୍ଧି ଧରି ପଞ୍ଚାୟତିରାଜ ଦିବସ ଭାବେ ପାଳନ କରାଯାଉଥିଲା । କିନ୍ତୁ ବିଜେପି ସରକାର ଚଳିତ ବର୍ଷ ବିଜୁ ଜୟନ୍ତୀକୁ ପଞ୍ଚାୟତିରାଜ ଦିବସ ନ ପାଳିବାକୁ ଘୋଷଣା କରିଥିଲେ । କେବଳ ଏହି ଦିନକୁ ରାଜ୍ୟସ୍ତରୀୟ ବିଜୁ ଜୟନ୍ତୀ କାର୍ଯ୍ୟକ୍ରମ ପାଳନ କରିବାକୁ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ନିର୍ଦ୍ଦେଶ ଦିଆଯାଇଥିଲା ।
ଏହି ଦିନରେ ସରକାରୀ ଛୁଟି ମଧ୍ୟ ବାତିଲ କରାଯାଇଥିଲା । ଯାହାକୁ ନେଇ ବିଜେଡି ନେତାଙ୍କ ମଧ୍ୟରେ ଦେଖିବାକୁ ମିଳିଥିଲା କଡ଼ା ପ୍ରତିକ୍ରିୟା । ଏହାରି ମଧ୍ୟରେ ମୁଖ୍ୟମନ୍ତ୍ରୀ ମୋହନ ନବୀନଙ୍କୁ ରାଜ୍ୟ ସ୍ତରୀୟ ବିଜୁ ଜୟନ୍ତୀ ଉତ୍ସବରେ ଯୋଗ ଦେବାକୁ ନିମନ୍ତ୍ରଣ କରିଥିଲେ । ଏହି କାର୍ଯ୍ୟକ୍ରମକୁ ନବୀନ ଯାଉଛନ୍ତି ନା ନାହିଁ ତା’ ଉପରେ ଥିଲା ସମସ୍ତଙ୍କ ନଜର । ମାତ୍ର ନବୀନ ସମାରୋହରେ ଯୋଗ ଦେଇ ନଥିଲେ ।