ପଞ୍ଜାବ ବଜେଟ୍ ୨୦୨୫-୨୬; ଆଜି ବିଧାନସଭାରେ ବଜେଟ୍ ଉପସ୍ଥାପନ କରିବେ ଅର୍ଥମନ୍ତ୍ରୀ ହରପାଲ ସିଂହ ଚିମା
ଚଣ୍ଡିଗଡ: ପଞ୍ଜାବରେ ଆମ ଆଦମୀ ପାର୍ଟି ନେତୃତ୍ୱାଧୀନ ସରକାର ଆଜି ଚତୁର୍ଥ ବଜେଟ୍ ଉପସ୍ଥାପନ କରିବ। ଅର୍ଥମନ୍ତ୍ରୀ ହରପାଲ ସିଂହ ଚିମା ଆଜି ସକାଳ ୧୧ଟାରେ ବିଧାନସଭାରେ ବଜେଟ୍ ଉପସ୍ଥାପନ କରିବେ।
ଏହା ପୂର୍ବରୁ ମୁଖ୍ୟମନ୍ତ୍ରୀ ଭଗବନ୍ତ ମାନ ମଧ୍ୟ ପଞ୍ଜାବ କ୍ୟାବିନେଟର ଏକ ବୈଠକ ଡାକିଥିଲେ। ତେବେ ଚଳିତ ବର୍ଷର ବଜେଟରେ ପଞ୍ଜାବ ସରକାର ନିଶାଦ୍ରବ୍ୟ ସେବନ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିପାରନ୍ତି।
ସୂଚନା ଅନୁଯାୟୀ, ଚଳିତ ବର୍ଷର ବଜେଟରେ ବିଶେଷକରି ନିଶାଦ୍ରବ୍ୟ ବ୍ୟବହାର ରୋକିବା ପାଇଁ ଅନେକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇପାରେ। ବଜେଟରେ ନିଶା ନିବାରଣ ଉପରେ ଏକ ବିଶେଷ ପଦକ୍ଷେପ ନିଆଯିବ। ବଜେଟରେ ପ୍ରଥମ ଥର ପାଇଁ ଡ୍ରଗ୍ସ ସେନସସ୍ ଉପରେ ମଧ୍ୟ ଆଲୋଚନା ହୋଇପାରେ। ତେବେ ପୂର୍ବରୁ ମଧ୍ଯ ଆମ ଆଦମୀ ପାର୍ଟି ସୁପ୍ରିମୋ ଅରବିନ୍ଦ କେଜରିୱାଲ ଏକ ରାଲିରେ ଡ୍ରଗ୍ସ ସେନସସ୍ ବିଷୟରେ କହିଥିଲେ। ସୀମା ପାରରୁ ଆସୁଥିବା ନିଶାଦ୍ରବ୍ୟକୁ ରୋକିବା ପାଇଁ ହୋମଗାର୍ଡଙ୍କୁ ନିଯୁକ୍ତ କରାଯାଇପାରେ।
ନିଶା ନିବାରଣ ପାଇଁ ଏକ ପୃଥକ ବଜେଟ୍ ଉପସ୍ଥାପନ କରାଯାଇପାରିବ। କେବଳ ଏତିକି ନୁହେଁ, ପଞ୍ଜାବ ସରକାର ଏମରଜେନ୍ସି ରେସପନ୍ସ ଭେହିକିଲ୍ ସଂଖ୍ୟା ବୃଦ୍ଧି କରିପାରିବେ। ଜରୁରୀକାଳୀନ ନମ୍ବର ୧୧୨କୁ ସୁଦୃଢ଼ କରିବା ପାଇଁ ବଜେଟରେ ଏକ ସ୍ୱତନ୍ତ୍ର ବ୍ୟବସ୍ଥା ମଧ୍ୟ ରହିବ। ପଞ୍ଜାବ ସରକାର ପୂର୍ବରୁ ‘ଡ୍ରଗ୍ସ ବିରୁଦ୍ଧରେ ଯୁଦ୍ଧ’ ଅଭିଯାନ ଆରମ୍ଭ କରିସାରିଛନ୍ତି।
