ସମ୍ବଲପୁର ଓରମାସ୍ ପକ୍ଷରୁ କ୍ରେତା-ବିକ୍ରେତା ସମ୍ମିଳନୀ ଅନୁଷ୍ଠିତ
ସମ୍ବଲପୁର:ଓରମାସ୍, ସମ୍ବଲପୁର ପକ୍ଷରୁ ଜିଲ୍ଲା ପରିଷଦ ସମ୍ମିଳନୀ କକ୍ଷରେ ଏକ କ୍ରେତା-ବିକ୍ରେତା ସମ୍ମିଳନୀ ର ସଫଳ ଆୟୋଜନ କରାଯାଇଥିଲା, ଯେଉଁଥିରେ କୃଷି ଓ ଅଣକୃଷି କାର୍ଯ୍ୟରେ ନିୟୋଜିତ ୮୦ ଜଣ ଏସ୍ଏଚ୍ଜି/ପିଜି/ଏଫ୍ପିଓ ସଦସ୍ୟ ଏକାଠି ହୋଇଥିଲେ। ଏହି ବୈଠକ ଗ୍ରାମୀଣ ଉଦ୍ୟୋଗୀମାନଙ୍କୁ ସେମାନଙ୍କ ଉତ୍ପାଦ ପ୍ରଦର୍ଶନ ଏବଂ ବଜାର ସଂଯୋଗ ସ୍ଥାପନ କରିବା ପାଇଁ ଏକ ଗୁରୁତ୍ୱପୂର୍ଣ୍ଣ ପ୍ଲାଟଫର୍ମ ପ୍ରଦାନ କରିଥିଲେ।
ଏଥିରେ ଆନନ୍ଦ ସୁପର ବଜାର, ଭିଲେଜ କ୍ରାଫ୍ଟ, ହିନ୍ଦୁସ୍ତାନ ସେଲ୍ସ, ପ୍ରଣାମ ଭେଞ୍ଚର୍ସ, ମୁନିକୋ, ସାକ୍ଷୀ ହସ୍ତତନ୍ତ ଓ ମେଟାକାନି ଆଗ୍ରୋ ଭଳି ୭ଟି ପ୍ରତିଷ୍ଠିତ କ୍ରେତା ଅଂଶଗ୍ରହଣ କରିଥିଲେ। ମାର୍କେଟିଂ ଟାଇ-ଅପ୍ ଗୁଡ଼ିକୁ ସୁଗମ କରାଯାଇଥିଲା, ଯାହା ଏସଏଚଜି ଏବଂ ଏଫପିଓ ସଦସ୍ୟମାନଙ୍କ ପାଇଁ ଉତ୍ତମ ବଜାର ପ୍ରବେଶସୁନିଶ୍ଚିତ କରିଥିଲା ।
ଏହି କାର୍ଯ୍ୟକ୍ରମକୁ ମୁଖ୍ୟ ଉନ୍ନୟନ ଅଧିକାରୀ ତଥା କାର୍ଯ୍ୟନିର୍ବାହୀ ଅଧିକାରୀ ପ୍ରସନ୍ନ ପାତ୍ର ଉଦ୍ ଘାଟନ କରିଥିଲେ। ଉଦ୍ୟାନ କୃଷି ଉପନିର୍ଦେଶକ ହିମାଂଶୁ ଶେଖର ସାହୁ, ଓରମାସର ସିଇଓ ଶ୍ରୀମନ୍ତ ହୋତା, ବିଏମ୍-ଟିଡିସିସି ଶ୍ରୀ ଅଜୟ ସାହୁ , ଡିପିଏମ୍-ଓଏଲ୍ଏମ୍ ସଞ୍ଜୟ କୁମାର ମହାପାତ୍ର, ଡିପିସି-ମିଶନ ଶକ୍ତି ଭାରତୀ ବେସ୍ରା, ଏଏଚ୍ଓ, ହସ୍ତତନ୍ତ ସୁପରଭାଇଜର ଓ ଡିପିସି-ଓଏଫ୍ଏସ୍ଡିପି ପ୍ରକଳ୍ପ ତୁଷାର କାନ୍ତ ପାଣିଗ୍ରାହୀ ପ୍ରମୁଖ ଉପସ୍ଥିତ ଥିଲେ ।
କ୍ରେତା-ବିକ୍ରେତା ବୈଠକର ଉଦ୍ଦେଶ୍ୟ ହେଉଛି ଗ୍ରାମୀଣ ଉଦ୍ୟୋଗକୁ ସୁଦୃଢ଼ କରିବା, ଆତ୍ମନିର୍ଭରଶୀଳତାକୁ ପ୍ରୋତ୍ସାହିତ କରିବା ଏବଂ ଉତ୍ପାଦକମାନଙ୍କୁ ସମ୍ଭାବ୍ୟ କ୍ରେତାଙ୍କ ସହ ଯୋଡ଼ି ଜୀବିକା ସୁଯୋଗ ବୃଦ୍ଧି କରିବା । ସମ୍ବଲପୁର ଓର୍ମାସ୍ ସ୍ବୟଂ ସହାୟକ ଗୋଷ୍ଠୀ ଓ ଏଫ୍ପିଓମାନଙ୍କୁ ସ୍ଥାୟୀ ବଜାର ସୁଯୋଗ ପ୍ରଦାନ କରି ସେମାନଙ୍କୁ ସଶକ୍ତ କରିବା ପାଇଁ ପ୍ରତିଶ୍ରୁତିବଦ୍ଧତା ଜାରି ରହିବ।
