କଟକ: ଦୋଳମୁଣ୍ଡାଇରେ ଥିବା ସୁଟକେସ ଶୋ’ରୁମରେ ଭିଷଣ ଅଗ୍ନିକାଣ୍ଡ । ଜଳି ପୋଡ଼ି ପାଉଁଶ ହୋଇଗଲା ଲକ୍ଷ ଲକ୍ଷ ଟଙ୍କାର ସାମଗ୍ରୀ । ଅଗ୍ନିଶମ ବାହିନୀ ପହଞ୍ଚି ନିଆଁକୁ ଆୟତ୍ତ କରିବାକୁ ଉଦ୍ୟମ ଚଳାଇଛନ୍ତି । ଅଗ୍ନିକାଣ୍ଡରେ କେହି ମୃତାହତ ହୋଇ ନଥିବା ସୂଚନା ମିଳୁଛି ।
ଆଜି ଦିନ ପ୍ରାୟ ୧୦ଟା ସମୟରେ ହଠାତ୍ ସୁଟକେସ ଶୋ’ରୁମରେ ନିଆଁ ଲାଗିଯାଇଥିଲା । ଶୋ’ରୁମ ତଳ ମହଲାରେ ଥିବା ବେଳେ ଉପର ମହଲା ଗୋଦାମରେ ରହିଥିଲା । ନିଆଁ ସୁଟକେସ ଶୋ’ରୁମରେ ଲାଗିବା ପରେ ଉପର ମହଲାକୁ ବ୍ୟାପି ଯାଇଥିଲା ।
ଅଧିକ ଧୁଆଁ ବାହାରୁଥିବାରୁ ନିଆଁକୁ ଆୟତ୍ତ କରିବାକୁ ଅଗ୍ନିଶମ ବାହିନୀ କର୍ମଚାରୀଙ୍କୁ ସମସ୍ୟା ହେଉଛି । ସେହିପରି ସୁଟକେସ ଶୋ’ରୁମ ନିକଟରେ ଥିବା କପଡ଼ା ଦୋକାନକୁ ନିଆଁ ବ୍ୟାପି ଯାଇଛି । ଅନ୍ୟପକ୍ଷରେ ପବନ ହେଉଥିବାରୁ ନିଆଁ ଶୀଘ୍ର ଚାରିଆଡକୁ ବ୍ୟାପୀ ଯାଉଥିବା ଜଣାଯାଇଛି । ନିଆଁ ଲିଭାଇବା କାର୍ଯ୍ୟରେ ୨ଟି ଅଗ୍ନିଶମ ବାହିନୀ ଗାଡ଼ି ଲାଗିଛନ୍ତି । ନିଆଁ କିପରି ଲାଗିଲା ତାହାର କାରଣ ଜଣାପଡ଼ିନାହିଁ । ସର୍ଟସର୍କିଟରୁ ନିଆଁ ଲାଗିଥିବା ସନ୍ଦେହ କରାଯାଉଛି ।