ଓଡ଼ିଶା ଡଟ୍ ନ୍ୟୁଜ୍3/04/2025 at 8:52 AM
ଭୁବନେଶ୍ବର: ଆଇନର ସୂତା ଖିଅରେ ଛନ୍ଦି ହେବାରେ ଲାଗିଛି କିଟ୍ ବିଶ୍ବ ବିଦ୍ୟାଳୟ । ନେପାଳୀ ଛାତ୍ରୀଙ୍କ ମୃତ୍ୟୁକୁ ନେଇ ସାରା ଦେଶ ସମେତ ବିଶ୍ବରେ ବିବାଦକୁ ଆସିଥିବା କିଟ୍ ଏବେ ଆଉ ଜଣେ ଛାତ୍ରଙ୍କ ମୃତ୍ୟୁ ପାଇଁ ଅଡୁଆରେ ପଡିଛି । ଛାତ୍ର ଅବର୍ଣ୍ଣ ମୁଖାର୍ଜୀଙ୍କ ମୃତ୍ୟୁକୁ ନେଇ କିଟି୍ ବିରୋଧରେ ତାଙ୍କ ବାପା ଆଣିଛନ୍ତି ସଙ୍ଗୀନ ଅଭିଯୋଗ । ପୁଅ ମୃତ୍ୟୁ ପାଇଁ କିଟ୍ ମ୍ୟାନେଜମେଣ୍ଟର ଅବହେଳାକୁ ଦାୟୀ କରିଛନ୍ତି ଅବର୍ଣ୍ଣଙ୍କ ବାପା । ଏମିତିକି ପୁଅ ଆତ୍ମହତ୍ୟା କରିନି ବରଂ ତା’ସହ ଆଉ କିଛି ଅଘଟଣ ଘଟିଥାଇ ପାରେ ବୋଲି ଆଶଙ୍କା କରିଛନ୍ତି ଅର୍ଣ୍ଣବଙ୍କ ବାପା । ତେବେ ଏନେଇ କିଟ୍ କର୍ତ୍ତୃପକ୍ଷ ମୁହଁ ଖୋଲି ନଥିଲାବେଳେ ଏ ମାମଲା ବି ଏନଏଚଆରସିରେ ପହଞ୍ଚିଲାଣି ।
ଦୁଇମାସ ଭିତରେ କିଟରେ ଦୁଇଟି ବଡ଼ ଅଘଟଣ । କ୍ୟାମ୍ପସ ଭିତରେ ନେପାଳୀ ଛାତ୍ରୀଙ୍କ ମୃତ୍ୟୁ ଓ କ୍ୟାମ୍ପସ ବାହାରୁ ସନ୍ଦେହଜନକ ଅବସ୍ଥାରେ ପଶ୍ଚିମବଙ୍ଗ ଛାତ୍ରଙ୍କ ମୃତଦେହ ଉଦ୍ଧାରକୁ ନେଇ ଆଇନ ଜାଲରେ ଛନ୍ଦି ହେବାରେ ଲାଗିଛି ଟିକ୍ । ଭୁବନେଶ୍ବର ମଞ୍ଚେଶ୍ବରର ଏକ ନିର୍ମାଣାଧୀନ କୋଠା ତଳୁ ଗତ ସୋମବାର ରାତିରେ ବିଟେକ୍ ତୃତୀୟ ବର୍ଷର ଛାତ୍ର ଅର୍ଣ୍ଣବଙ୍କ ମୃତଦେହ ମିଳିବା ଘଟଣାରେ ଗତକାଲି କିଟ୍ ବିରୋଧରେ ସଙ୍ଗୀନ ଅଭିଯୋଗ ଆଣିଛନ୍ତି ତାଙ୍କ ବାପା ଜଗଦୀଶ ମୁଖାର୍ଜୀ । କହିଛନ୍ତି କିଟ୍ କର୍ତ୍ତୃପକ୍ଷଙ୍କ ଅବହେଳା ପୁଅ ଜୀବନ ନେଇଛି । ପୁଅ ଆତ୍ମହତ୍ୟା କରିନି ବରଂ ତା ସହ ଅନ୍ୟ କିଛି ଅଘଟଣ ଘଟିଥାଇପାରେ ।
ସେ କହିଛନ୍ତି, ହଷ୍ଟେଲ ୱାଡେନଙ୍କ କଥା ଓ ଘଟଣାବଳୀ ମଧ୍ୟରେ ତାଳମେଳ ରହୁନି । ହଷ୍ଟେଲ ଦାୟିତ୍ବରେ ଛାଡ଼ିଥିବା ପୁଅର ମୃତଦେହ ୧୫ କିମି ଦୂରରୁ କେମିତି ମିଳିଲା ବୋଲି ସେ ପ୍ରଶ୍ନ କରିଛନ୍ତି । ଦୀର୍ଘ ସମୟ ଧରି ହଷ୍ଟେଲରେ ଅନୁପସ୍ଥିତି ସଂପର୍କରେ କର୍ତ୍ତୃପକ୍ଷ ଜାଣିଥିଲେ କି ନାହିଁ, ଯଦି ଜାଣିଥିଲେ କାହିଁକି ଏ ବାବଦରେ ଆମକୁ କାହିଁକି ଜଣାଇଲେ ନାହିଁ ବୋଲି ପ୍ରଶ୍ନ କରିଛନ୍ତି ଜଗଦୀଶ । କେବଳ ସେତିକି ନୁହେଁ, ଅର୍ଣ୍ଣବଙ୍କ ମୃତଦେହ ଚିହ୍ନଟ ପାଇଁ ଆସିଥିଲା ବେଳେ ନା କିଟ୍ କର୍ତ୍ତୃପକ୍ଷ ତାଙ୍କୁ ଦେଖା କରିଛନ୍ତି, ନା ଆଶ୍ବାସନା ଦେଇଛନ୍ତି ବୋଲି କ୍ଷୋଭ ପ୍ରକାଶ କରିଛନ୍ତି ଜଗଦୀଶ । ଏହାର ତଦନ୍ତ କରି ସତ ବାହାର କରାଯାଉ ବୋଲି ସେ ଦାବି କରିଛନ୍ତି ।
ଏବେ ପ୍ରଶ୍ନ ଉଠୁଛି, କେଉଁ ପରିସ୍ଥିତିରେ ହେଲା ଅର୍ଣ୍ଣବଙ୍କ ମୃତ୍ୟୁ ? ଆତ୍ମହତ୍ୟା, ହତ୍ୟା ନା ଆଉ କିଛି କାରଣ ? ବାପାଙ୍କ ଅଭିଯୋଗ ଆଧାରରେ ମଞ୍ଚେଶ୍ବର ପୋଲିସ ଆରମ୍ଭ କରିଛି ତଦନ୍ତ ମାଜିଷ୍ଟ୍ରେଟଙ୍କ ଉପସ୍ଥିତିରେ ଗତକାଲି ଶବ ବ୍ୟବଚ୍ଛେଦ କରାଯିବା ସହ ଭିଡିଓଗ୍ରାଫି କରାଯାଇଛି । ପୋଲିସ ଏକାଧିକ ସିସିଟିଭି ଯାଞ୍ଚ କରିବା ସହିତ ଘଟଣା ସଂପର୍କରେ କିଟର ଏକାଧିକ ଅଧିକାରୀଙ୍କୁ ଜେରା କରିଥିବା ଜଣାପଡ଼ିଛି । ପୋଷ୍ଟମର୍ଟମ ରିପୋର୍ଟ ଆସିବା ପରେ ମୃତ୍ୟୁର ପ୍ରକୃତ କାରଣ ସ୍ପଷ୍ଟ ହେବ ବୋଲି ପୋଲିସ୍ କହିଛି ।
ସେପଟେ ନେପାଳୀ ଛାତ୍ରୀ ଆତ୍ମହତ୍ୟା ମାମଲା ଭଳି, ଅର୍ଣ୍ଣବ ମୃତ୍ୟୁ ମାମଲା ବି ଜାତୀୟ ମାନାବାଧିକାର କମିଶନଙ୍କ ପାଖରେ ପହଞ୍ଚିଛି । ମଞ୍ଚେଶ୍ବର ଥାନାଞ୍ଚଳର ଏକ ନିର୍ମାଣାଧୀନ କୋଠା ତଳୁ ଅର୍ଣ୍ଣବଙ୍କ ମୃତଦେହ ମିଳିବା ବହୁ ସନ୍ଦେହକୁ ଜନ୍ମାଇଥିବାରୁ ଏହାର ଉପଯୁକ୍ତ ତଦନ୍ତ ସହ ଦୋଷୀ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ପାଇଁ ଏନଏଚଆରସିରେ ଦାବି ହୋଇଛି। ଏନେଇ ଡିସିପି, ପୋଲିସ ଡିଜି ଏବଂ କିଟ୍ କର୍ତ୍ତୃପକ୍ଷଙ୍କୁ ପକ୍ଷଭୁକ୍ତ କରିଛନ୍ତି ଆବେଦନକାରୀ ।
ପୂର୍ବରୁ ନେପାଳୀ ଛାତ୍ରୀ ଆତ୍ମହତ୍ୟା ଘଟଣାରେ ଏନଏଚଆରସି କିଟ୍ କର୍ତ୍ତୃପକ୍ଷଙ୍କୁ ସଂପୂର୍ଣ୍ଣ ଦାୟୀ କରିବା ସହ କର୍ତ୍ତୃପକ୍ଷଙ୍କ ବିରୋଧରେ ଆବେଟମେଣ୍ଟ ଟୁ ସୁଇସାଇଡ୍ ଭଳି ସଂଗୀନ ଧାରାରରେ ମାମଲା ରୁଜୁ କରିବାକୁ ପୋଲିସ୍ କମିଶନରଙ୍କୁ ସୁପାରିଶ କରିଥିଲେ । ଆଉ ଏବେ ଅର୍ଣ୍ଣବଙ୍କ ସନ୍ଦେହଜନକ ମୃତ୍ୟୁ ମାମଲାରେ ଏନଏଚଆରସି କି ପଦକ୍ଷେପ ନେଉଛନ୍ତି ତା ଉପରେ ସମସ୍ତଙ୍କ ନଜର ରହିଛି ।