ଓଡ଼ିଶା ଡଟ୍ ନ୍ୟୁଜ୍

3/04/2025 at 9:41 AM

ଭୁବନେଶ୍ବର: ଗତକାଲି ସାରା ରାତି ଚାଲିଲା ବିଧାନସଭା । ଆଉ ଏଥିରେ ପାରିତ ହେଲା ଓଡ଼ିଶା ବିଶ୍ଵବିଦ୍ୟାଳୟ ସଂଶୋଧନ ବିଲ୍ । ସାଢେ ୧୨ ଘଣ୍ଟା ଅପରାହ୍ଣ ୪ଟାରୁ ଭୋର ୪ଟା ୩୦ମିନିଟ ପର୍ଯ୍ୟନ୍ତ ଜୋରଦାର ବିତର୍କ ପରେ ଏହା ପାରିତ ହୋଇଛି । ବିରୋଧୀ ବିଲକୁ ସିଲେକ୍ଟ କମିଟିକୁ ପଠାଇବାକୁ ଦାବି କରିଥିବ ବେଳେ ଶାସକ ଦଳ ପାରିତ ହେବା ନେଇ ଯୁକ୍ତି ବାଢିଥିଲେ ।

ମୂଳ ବିଲରେ ମୋଟ ୧୮ଟି କ୍ଲଜ ଓ ଗୋଟିଏ ଅନୁସୂଚୀ ରହିଛି । ବିରୋଧୀ ଦଳ ବିଧାୟକ ୧୨ଟି କ୍ଲଜରେ ସଂଶୋଧନ ପ୍ରସ୍ତାବ ରଖିଥିଲେ । ପ୍ରତ୍ୟେକ ସଂଶୋଧନ ପ୍ରସ୍ତାବ ଉପରେ ସରକାର ଉତ୍ତର ରଖିଥିଲେ । ଶେଷରେ ବିରୋଧୀ ସଦସ୍ୟଙ୍କ ସମସ୍ତ ସଂଶୋଧନ ପ୍ରସ୍ତାବ କାଟ ଖାଇଥିଲା । ଅନ୍ୟପଟେ ଆଜି ସକାଳେ ବିଧାନସଭାରେ ଆଲୋଚନା ପରେ ରାଜ୍ୟ ରାଜପଥ ପ୍ରାଧିକରଣ ବିଲ ୨୦୨୫ ମଧ୍ୟ ପାରିତ ହୋଇଯାଇଛି । 

ତେବେ ଆସନ୍ତୁ ଜାଣିବା କ’ଣ ରହିଛି ଓଡ଼ିଶା ବିଶ୍ବବିଦ୍ୟାଳୟ ସଂଶୋଧନ ବିଲ୍ ୨୦୨୪ରେ…

ବିଲ୍ ଅନୁସାରେ, ବିଶ୍ୱ ବିଦ୍ୟାଳୟକୁ ପୁଣି ଫେରିବ ସିନେଟ୍ ବ୍ୟବସ୍ଥା । କୂଳପତିଙ୍କ ଅବସରର ୬ ମାସ ପୂର୍ବରୁ ନୂଆ କୁଳପତି ନିଯୁକ୍ତି ପ୍ରକ୍ରିୟା ଆରମ୍ଭ ହେବ । ବିଶ୍ଵବିଦ୍ୟାଳୟର ପ୍ରଫେସର, ସହକାରୀ ପ୍ରଫେସର ନିଯୁକ୍ତ କରିବେ କୁଳପତି । କୁଳପତି ନିଯୁକ୍ତି କମିଟିରେ ରହିବେ ୩ ଜଣ ସଦସ୍ୟ । କୁଳାଧିପତିଙ୍କ ଦ୍ୱାରା ମନୋନୀତ ପ୍ରାର୍ଥୀ, ବିଶ୍ଵବିଦ୍ୟାଳୟ ଅନୁଦାନ ଆୟୋଗ ଅଧକ୍ଷଙ୍କ ମନୋନୀତ ପ୍ରାର୍ଥୀ ଏବଂ ସମ୍ପୃକ୍ତ ବିଶ୍ୱବିଦ୍ୟାଳୟର ସିଣ୍ଡିକେଟ ଦ୍ୱାରା ମନୋନୀତ ପ୍ରାର୍ଥୀ ରହିବେ ସଦସ୍ୟ ।

ସେହିପରି ବିଶ୍ଵବିଦ୍ୟାଳୟ ସିଣ୍ଡିକେଟ ଗଠନ କରାଯିବ । ଜଣେ ଯୁଗ୍ମ ସଚିବ ପାହ୍ୟାର ଅଧିକାରୀ, ଉଚ୍ଚଶିକ୍ଷା ବିଭାଗ ନିର୍ଦ୍ଦେଶକଙ୍କ ସହ ୧୭ ଜଣ ଶିକ୍ଷାବିତ୍ ଏଥିରେ ସଦସ୍ୟ ରହିବେ । କମିଟି ଦ୍ୱାରା ୩ଟି ନାମ ଚୟନ ପରେ ଦୁର୍ନୀତି ନିବାରଣ ବିଭାଗ ପକ୍ଷରୁ କୌଣସି ମାମଲା ନଥିବା ନେଇ ସ୍ପଷ୍ଟ କରାଯିବ । ଏହାସହ ୭୦ ବର୍ଷ ପର୍ଯ୍ୟନ୍ତ କୁଳପତିଙ୍କ କାର୍ଯ୍ୟକାଳ ବୃଦ୍ଧି କରାଯାଇଛି । ପୁନଃ ନିଯୁକ୍ତି ମାତ୍ର ଥରେ ପାଇ ପାରିବେ । କୁଳାଧିପତି ଚାହିଁଲେ ରାଜ୍ୟ ସରକାରଙ୍କ ସହ ଆଲୋଚନା କରି ଆଉ ଥରେ ସେହି ପ୍ରକ୍ରିୟାରେ ନିଯୁକ୍ତି ହୋଇପାରିବେ । କୁଳପତି ଛୁଟିରେ ଗଲେ ବରିଷ୍ଠ ପ୍ରଫେସର ଦାୟିତ୍ୱରେ ରହିବେ । କଳପତି କିଛି ପରିଚାଳନାରେ ତ୍ରୁଟି କଲେ କୁଳାଧିପତି କାରଣ ଦର୍ଶାଅ ନୋଟିସ ଜାରି କରିବେ । ନିର୍ଦ୍ଦେଶ ଜାରି ପୂର୍ବରୁ କୁଳାଧିପତି ରାଜ୍ୟ ସରକାରଙ୍କ ସହ ପରାମର୍ଶ କରିବେ । ନିଲମ୍ବନ ପୂର୍ବରୁ ଅଭିଯୋଗର ତଦନ୍ତ କରାଯିବ । କୁଳପତିଙ୍କ ନାଁ ରାଜ୍ୟପାଳଙ୍କ ପାଖକୁ ପଠାଯିବା ପୂର୍ବରୁ ଭିଜିଲାନ୍ସ ଯାଞ୍ଚ କରିବ । ଯାହାଦ୍ଵାରା ଚୟନ ପ୍ରକ୍ରିୟାରେ ସ୍ବଚ୍ଛତା ଆସିବ । ରେଜିଷ୍ଟାର ଓ କଣ୍ଟ୍ରୋଲର ଅଫ ଫାଇନାନ୍ସଙ୍କ କାର୍ଯ୍ୟକାଳ ୩ ବର୍ଷ ରହିବ ।