ଓଡ଼ିଶା ଡଟ୍ ନ୍ୟୁଜ୍

4/04/2025 at 8:34 AM

ବାରିପଦା: ରାଗିଂ । ନାଁ ଶୁଣିଲେ ନ୍ୟୁ କମର ଅର୍ଥାତ ଜୁନିୟର ଛାତ୍ରଙ୍କ ମଧ୍ୟରେ କୋକୁଆ ଭୟ ଖେଳିଯାଏ । ବିଶେଷ କରି କଲେଜ ଓ ବିଶ୍ବବିଦ୍ୟାଳୟରେ ରାଗିଂ ହୋଇଥାଏ । ହେଲେ ସ୍କୁଲରେ ସିନିୟର ଛାତ୍ର ଜୁନିୟରଙ୍କୁ ରାଗିଂ କରିବା କେବେ ଶୁଣିଛନ୍ତି କି ? ଆମେ ଆଜି ଯେଉଁ ବିଷୟରେ କହିବାକୁ ଯାଉଛି, ସେଥିରୁ ଅନୁମାନ କରିବେ ରାଜ୍ୟରେ ସ୍କୁଲ ଶିକ୍ଷାରେ ରାଗିଂ କେମିତି ନିଜର କାୟା ମେଲାଉଛି । କାରଣ ଆମେ ଯେଉଁ ଖବର ଦେବାକୁ ଯାଉଛୁ ସେଥିରେ ଜଣେ ଷଷ୍ଠ ଶ୍ରେଣୀରେ ପଢୁଥିବା ଛାତ୍ର ହଷ୍ଟେଲରେ ରାଗିଂର ଶିକାର ହୋଇଛନ୍ତି । ଆଉ ତାଙ୍କୁ ନିଜ ସ୍କୁଲ ହଷ୍ଟେଲରେ ରହୁଥିବା କିଛି ନବମ ଶ୍ରେଣୀ ପିଲା ରାଗିଂ କରିଛନ୍ତି । ନିର୍ଯାତନା ଏତେ ଭୟଙ୍କର ଥିଲା ଯେ ଏହାକୁ ରାଗିଂ କହିଲେ ଭୁଲ ହେବ । କାରଣ ପିଲାର ଦେହରେ ଥିବା ଆଘାତର ଚିହ୍ନ କହୁଛି, ଭଗବାନଙ୍କ କୃପାରୁ ସେଦିନ ସେ ପିଲା ରାକ୍ଷସ ପାଲଟି ଯାଇଥିବା ସିନିୟରଙ୍କ କବଳରୁ ବଞ୍ଚି ଯାଇଛି । ନହେଲେ, ସିନିୟରମାନେ ତ ତାକୁ ରାଗିଂ ନାଁରେ ହତ୍ୟା କରିବାକୁ ପୂରା ଯୋଜନା କରି ଦେଇଥିବା ଅଭିଯୋଗ ହୋଇଛି ।

ଏମିତି ଖବର ମୟୂରଭଞ୍ଜ ଖୁଣ୍ଟା ଥାନା ଅଞ୍ଚଳର ହଷ୍ଟେଲରୁ ଆସିଛି । ଘଟଣା ଗତ ଫେବ୍ରୁଆରୀରେ ଘଟିଛି । ହେଲେ ରାଗିଂ କରିଥିବା ନବମ ଶ୍ରେଣୀର ଛାତ୍ରମାନେ ଛୁରୀ ଦେଖାଇ ଷଷ୍ଠ ଶ୍ରେଣୀର ପୀଡ଼ିତ ଛାତ୍ରଙ୍କୁ ଜୀବନରୁ ମାରି ଦେବାକୁ ଧମକ ଦେଇଥିବାରୁ ସେ ପରିବାର ଲୋକଙ୍କୁ ଜଣାଇ ନଥିଲେ । ସ୍କୁଲ ଖୋଲିବା ପରେ ପିଲାଟି ହଷ୍ଟେଲ ଯିବାକୁ ରାଜି ନହେବାରୁ ପରିବାର ଲୋକେ ପଚରାଉଚରା କରିବା ପରେ ସତ ବାହାରକୁ ଆସିଛି । ଏନେଇ ପରିବାର ଲୋକେ ଖୁଣ୍ଟା ଥାନାରେ ଅଭିଯୋଗ କରିଛନ୍ତି । ଅନ୍ୟପକ୍ଷେ ସ୍କୁଲ କର୍ତ୍ତୃପକ୍ଷ ଘଟଣାକୁ ନେଇ ଜଣାଇ ନଥିବାରୁ ପରିବାର ଲୋକେ ଅସନ୍ତୋଷ ଝାଡ଼ିଛନ୍ତି ।

ଅଭିଯୋଗ ଅନୁସାରେ, ଫେବ୍ରୁଆରୀରେ କିଛି ନବମ ଶ୍ରେଣୀ ଛାତ୍ର ହଷ୍ଟେଲ ଛାତ ଉପରେ ମଦ ପିଉଥିଲେ । ପୀଡ଼ିତ ଛାତ୍ର ଏହା ଦେଖିବା ପରେ ପ୍ରଧାନ ଶିକ୍ଷକଙ୍କୁ ଜଣାଇଥିଲେ । ପିଲାଟିର ଭୁଲ ହେଲା, ସେ ଏ ଘଟଣା ସାରଙ୍କୁ ଜଣାଇଦେଲେ । ମଦ ଘଟଣାର କିଛିଦିନ ପରେ ସମ୍ପୃକ୍ତ ଛାତ୍ରମାନେ ପିଲାଟିକୁ ଉଠାଇ ନେଇ ହାତ ବନ୍ଧି ଦେଇ ଲୁହାରଡ଼ରେ ନିସ୍ତୁକ ମାଡ଼ ମାରିଥିଲେ । ଏହାସହ ବିଧା, ଗୋଇଠା ଯିଏ ଯାହା ପାରିଲା ମାରିଚାଲିଲେ । ସେତିକିରେ ସେମାନେ ଶାନ୍ତ ହୋଇ ନଥିଲେ, ବ୍ଲେଡରେ ପିଲାର ବାମ ହାତକୁ ୪ରୁ ୫ ଜାଗା କାଟି ଦେଇଥିଲେ । ଏହାପରେ ଉକ୍ତ କଟା ସ୍ଥାନରେ ଲୁଣ ବି ଘସିଥିଲେ । ଏତେ ସବୁ ପରେ ଛୁରୀ ଦେଖାଇ, କାହାକୁ କିଛି କହିଲେ ଜୀବନରୁ ମାରି ଦେବାକୁ ଧମକ ଦେଇଥିଲେ ।

ଗତ ଫେବ୍ରୁଆରୀରେ ଏହି ଘଟଣା ଘଟିଥିଲା । କିନ୍ତୁ, ସ୍କୁଲ କିମ୍ବା ହଷ୍ଟେଲ କର୍ତ୍ତୃପକ୍ଷ କେହି କିଛି ଜଣାଇ ନଥିବାରୁ ପ୍ରବଳ ଅସନ୍ତୋଷ ଝାଡ଼ିଛନ୍ତି ଅଭିଭାବକ । ରାଗିଂ ନେଇ ଖୁଣ୍ଟା ଥାନାରେ ଲିଖିତ ଅଭିଯୋଗ ପରେ ପୋଲିସ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭକ କରି ଦେଇଛି । ଏତେ ବଡ଼ ଘଟଣାକୁ ଫେବ୍ରୁଆରୀ ମାସରୁ କର୍ତ୍ତୃପକ୍ଷ କିଭଳି ଲୁଚାଇଥିଲେ ତାକୁ ନେଇ ଉଠିଛି ପ୍ରଶ୍ନ । ସେପଟେ ପ୍ରଧାନ ଶିକ୍ଷକ ଘଟଣା ବାବଦରେ ଛାତ୍ର ଜଣଙ୍କ ପୂର୍ବରୁ କିଛି ଜଣାଇ ନଥିବା ସଫେଇ ଦେଇଛନ୍ତି ।