ଓଡ଼ିଶା ଡଟ୍ ନ୍ୟୁଜ୍4/04/2025 at 9:17 AM
ନୂଆଦିଲ୍ଲୀ: ମହାକାଶ ବିଜ୍ଞାନରେ ପୁଣି ଜଣେ ଭାରତୀୟଙ୍କୁ ନେଇ ଚର୍ଚ୍ଚା । ଆଉ ସେ ହେଲେ ଗ୍ରୁପ୍ କ୍ୟାପଟେନ ଶୁଭ୍ରାଯଶୁ ଶୁକ୍ଲା । ୱିଙ୍ଗ କମାଣ୍ଡର ରାକେଶ ଶର୍ମାଙ୍କ ପରେ ମହାକାଶ ଯିବା ପାଇଁ ଦ୍ଵିତୀୟ ଭାରତୀୟ ଭାବେ ସେ ସୁଯୋଗ ପାଇଛନ୍ତି । ଆସନ୍ତା ମାସ ଇଣ୍ଟରନ୍ୟାସନାଲ ସ୍ପେଶ ଷ୍ଟେସନକୁ ଯାଇପାରନ୍ତି ପ୍ରଥମ ଭାରତୀୟ ମହାକାଶଚାରୀ ଶୁଭାଂଶୁ ଶୁକ୍ଳା । ମେ’ ମାସରେ ଆକ୍ସିଅମ୍-୪ ମିଶନ ଲଞ୍ଚ୍ ହୋଇପାରେ । ଏଥିରେ ମିଶନ୍ ପାଇଲଟ୍ ବନିବେ ଗ୍ରୁପ୍ କ୍ୟାପଟେନ୍ ଶୁଭାଂଶୁ ଶୁକ୍ଳା । ରାକେଶ ଶର୍ମାଙ୍କ ପରେ ଦ୍ବିତୀୟ ଭାରତୀୟ ଭାବେ ମହାକାଶକୁ ଯାଉଥିଲେ ମଧ୍ୟ ପ୍ରଥମ ଭାରତୀୟ ଭାବେ ଆନ୍ତର୍ଜାତୀୟ ମହାକାଶ କେନ୍ଦ୍ରକୁ ଯାଇ ଇତିହାସ ରଚିବେ ଲକ୍ଷ୍ନୌର ଶୁଭାଂଶୁ ଶୁକ୍ଳା ।
ସ୍ପେଶ୍-ଏକ୍ସର କ୍ରୁ ଡ୍ରାଗନ୍ ସ୍ପେଶକ୍ରାଫ୍ଟରେ ତାଙ୍କ ସହିତ ମିଶନ୍ କମାଣ୍ଡର୍ ତଥା ପୂର୍ବତନ ନାସା ଆଷ୍ଟ୍ରୋନଟ୍ ପେଗି ହ୍ବିଟସନ୍ ଏବଂ ପୋଲାଣ୍ଡ ଓ ହଙ୍ଗେରିର ଜଣେ ଲେଖାଏଁ ମହାକାଶଚାରୀ ମହାକାଶ କେନ୍ଦ୍ର (ISS)କୁ ଯାଇ ସେଠାରେ ୧୪ ଦିନ ରହିବେ ।
ମହାକାଶ ବିଜ୍ଞାନୀଙ୍କ କହିବା ଅନୁସାରେ ଶୁଭାଂଶୁ ଯେଉଁ ଅଭିଜ୍ଞତା ହାସଲ କରିବେ ସେହି ଅଭିଜ୍ଞତା ଦ୍ୱାରା ଭାରତ ମହାକାଶ ବିଜ୍ଞାନ କ୍ଷେତ୍ରରେ ଆହୁରି ଆଗକୁ ଯାଇପାରିବ । ଦୀର୍ଘ ୪୦ ବର୍ଷ ପରେ ଭାରତକୁ ଏହି ସୁଯୋଗ ମିଳିଛି । ଭାରତର ଗଗନଯାନ ମିଶନରେ ସାମିଲ ହେବାକୁ ଥିବା ୪ ଗଗନଯାତ୍ରୀଙ୍କ ମଧ୍ୟରୁ ଜଣେ ହେଉଛନ୍ତି ଶୁଭାଂଶୁ ଶୁକ୍ଳା । ଶୁଭାଂଶୁ ଶୁକ୍ଳା ଇସ୍ରୋ (ISRO)ର ମିଶନ ଗଗନଯାନ ପାଇଁ ମଧ୍ୟ ତାଲିମ ନେଉଛନ୍ତି । ଆକ୍ସିଅମ୍-୪ ମିଶନରେ ସେ ଯେଉଁ ପ୍ରଶିକ୍ଷଣ ଓ ଅଭିଜ୍ଞତା ହାସଲ କରିବେ, ଗଗନଯାନ ମିଶନ ପାଇଁ ଖୁବ୍ ଉପାଦେୟ ସାବ୍ୟସ୍ତହେବ ବୋଲି ଆଶା କରାଯାଉଛି । ଗ୍ରୁପ୍ କ୍ୟାପଟେନ୍ ଶୁଭାଂଶୁ ଶୁକ୍ଳା କହିଥିଲେ ‘ମୁଁ ମହାକାଶ କେନ୍ଦ୍ରରେ ଥିବା ସମୟରେ କିଛି ଯୋଗ ଆସନ କରିବି । ଏହାଦ୍ଵାରା ଆମେ ଶାରୀରିକ ଓ ମାନସିକ ଭାବରେ ସୁସ୍ଥ ରହି ପାରିବା ।’