୧୦ ବର୍ଷର ପିଲାମାନେ ନିଜେ ପରିଚାଳନା କରିପାରିବେ ବ୍ୟାଙ୍କ୍ ଆକାଉଣ୍ଟ: ଆରବିଆଇ
ନୂଆଦିଲ୍ଲୀ: ଆରବିଆଇର ନୂତନ ନିୟମ ଅନୁଯାୟୀ ଏବେ ୧୦ ବର୍ଷ ଏବଂ ତା’ଠାରୁ ଅଧିକ ବୟସର ପିଲାମାନେ ନିଜେ ସେମାନଙ୍କର ସଞ୍ଚୟ ଏବଂ ଏଫଡି ଆକାଉଣ୍ଟ ଖୋଲିପାରିବେ ଏବଂ ପରିଚାଳନା ମଧ୍ୟ କରିପାରିବେ। ଏହି ନିୟମ RBI ଦ୍ୱାରା ୨୧ ଏପ୍ରିଲ ୨୦୨୫ରେ ଜାରି କରାଯାଇଛି। ୧୦ ବର୍ଷରୁ ଅଧିକ ବୟସର ପିଲାମାନଙ୍କୁ ସେମାନଙ୍କର ସଞ୍ଚୟ ଏବଂ FD ଆକାଉଣ୍ଟ ଖୋଲିବା ଏବଂ ପରିଚାଳନା କରିବାକୁ ଅନୁମତି ଦେବାକୁ ଆରବିଆଇ ଦ୍ୱାରା ବ୍ୟାଙ୍କଗୁଡ଼ିକୁ ନିର୍ଦ୍ଦେଶ ଦିଆଯାଇଛି। ତଥାପି ବ୍ୟାଙ୍କଗୁଡ଼ିକ କିଛି ସୀମା ସ୍ଥିର କରିବେ।
ଏହି ନିୟମ ପିଲାମାନଙ୍କୁ ବ୍ୟାଙ୍କିଂ ବ୍ୟବସ୍ଥା ସହିତ ଯୋଡ଼ିବା ପାଇଁ ଏକ ବଡ଼ ପଦକ୍ଷେପ। ୧୦ ବର୍ଷରୁ କମ୍ ବୟସର ପିଲାମାନଙ୍କ ପାଇଁ ମଧ୍ୟ ଆକାଉଣ୍ଟ ଖୋଲାଯାଇପାରିବ କିନ୍ତୁ ଏହା ସେମାନଙ୍କ ପିତାମାତା କିମ୍ବା ଆଇନଗତ ଅଭିଭାବକଙ୍କ ଦ୍ୱାରା ପରିଚାଳିତ ହେବ। ଆରବିଆଇ ତାଙ୍କର ୧୯୭୬ ମସିହାର ପୁରୁଣା ନିୟମକୁ ପୁନରାବୃତ୍ତି କରିଛି ଯେଉଁଥିରେ ମାଆଙ୍କୁ ମଧ୍ୟ ଅଭିଭାବକ ହେବାର ଅନୁମତି ଦିଆଯାଇଛି। ୧୦ ବର୍ଷ କିମ୍ବା ତା’ଠାରୁ ଅଧିକ ବୟସର ପିଲାମାନେ ନିଜେ ସେମାନଙ୍କର ଆକାଉଣ୍ଟ ପରିଚାଳନା କରିପାରିବେ। କିନ୍ତୁ ବ୍ୟାଙ୍କଗୁଡ଼ିକ ସେମାନଙ୍କ ନିୟମ ଅନୁଯାୟୀ କିଛି ସୀମା ସ୍ଥିର କରିବେ, ଯେପରିକି କେତେ ଟଙ୍କା ଜମା କିମ୍ବା ଉଠାଯାଇପାରିବ।
ଏହି ନିୟମଗୁଡ଼ିକ ପିଲା ଏବଂ ସେମାନଙ୍କ ପିତାମାତାଙ୍କୁ ସ୍ପଷ୍ଟ ଭାବରେ ବୁଝାଇ ଦିଆଯିବ। ପିଲାଟି ୧୮ ବର୍ଷ ବୟସର ହେଲେ, ବ୍ୟାଙ୍କକୁ ତାଙ୍କଠାରୁ ନୂତନ ଦସ୍ତଖତ ନେବାକୁ ପଡିବ। ଯଦି ଆକାଉଣ୍ଟଟି ଜଣେ ଅଭିଭାବକଙ୍କ ଦ୍ୱାରା ପରିଚାଳିତ ହେଉଥିଲା, ତେବେ ବାଲାନ୍ସ ନିଶ୍ଚିତ କରାଯିବ। ଏହି ନିୟମ ସମସ୍ତ ବାଣିଜ୍ୟିକ ବ୍ୟାଙ୍କ, ସହରାଞ୍ଚଳ ସମବାୟ ବ୍ୟାଙ୍କ, ରାଜ୍ୟ ସମବାୟ ବ୍ୟାଙ୍କ ଏବଂ ଜିଲ୍ଲା କେନ୍ଦ୍ରୀୟ ସମବାୟ ବ୍ୟାଙ୍କ ପାଇଁ ପ୍ରଯୁଜ୍ୟ ହେବ।
ବ୍ୟାଙ୍କଗୁଡ଼ିକୁ ୧ ଜୁଲାଇ, ୨୦୨୫ ସୁଦ୍ଧା ସେମାନଙ୍କର ନିୟମଗୁଡ଼ିକୁ ଅପଡେଟ୍ କରିବାକୁ ପଡିବ। ଏହି ପଦକ୍ଷେପ ପିଲାମାନଙ୍କୁ ଛୋଟ ବୟସରୁ ଟଙ୍କା ସଞ୍ଚୟ ଏବଂ ପରିଚାଳନା କରିବାରେ ସାହାଯ୍ୟ କରିବ। ଯାହାଫଳରେ ସେମାନେ ବ୍ୟାଙ୍କିଙ୍ଗ ବ୍ୟବସ୍ଥାକୁ ସଠିକ୍ ବୁଝିପାରିବେ ଏବଂ ଆର୍ଥିକ ଦାୟିତ୍ୱ ଶିଖିପାରିବେ ବୋଲି ଆରବିଆଇ ପକ୍ଷରୁ କୁହାଯାଇଛି।
