ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ1/05/2025 at 12:43 PM
ନୂଆଦିଲ୍ଲୀ: IPL ୨୦୨୫ର ୪୯ ତମ ମ୍ୟାଚ୍ରେ ପଞ୍ଜାବ କିଙ୍ଗସର ଖେଳାଳି ଧୋନିଙ୍କ ଯୋଦ୍ଧାମାନଙ୍କୁ ପରାସ୍ତ କରିଥିଲେ। ଚେନ୍ନାଇର ଏମଏ ଚିଦାମ୍ବରମ ଷ୍ଟାଡିୟମରେ ଖେଳାଯାଇଥିବା ମ୍ୟାଚ୍ରେ ଶ୍ରେୟସ ଆୟରଙ୍କ ପଞ୍ଜାବ କିଙ୍ଗସ୍ ଚେନ୍ନାଇ ସୁପର କିଙ୍ଗସ୍କୁ ୪ ୱିକେଟ୍ରେ ପରାସ୍ତ କରିଛି।
ଚଳିତ ସିଜନରେ ଘରୋଇ ଗ୍ରାଉଣ୍ଡରେ ଏହା ଚେନ୍ନାଇର ୫ମ ପରାଜୟ। ଏହା ସହିତ CSK ମଧ୍ୟ IPL ୨୦୨୫ର ପ୍ରଥମ ଦଳ ଯିଏକି ପ୍ଲେଅଫ୍ ଦୌଡ଼ରୁ ବାଦ ପଡ଼ିଛି। ପଞ୍ଜାବର ଷ୍ଟାର ସ୍ପିନର ୟୁଜଭେନ୍ଦ୍ର ଚହଲ ମ୍ୟାଚ୍ରେ ହ୍ୟାଟ୍ରିକ୍ ନେଇଥିଲେ, କିନ୍ତୁ ଏହା ସତ୍ତ୍ୱେ ତାଙ୍କୁ ପ୍ଲେୟାର ଅଫ୍ ଦି ମ୍ୟାଚ୍ ପୁରସ୍କାର ମିଳିନଥିଲା। ତାଙ୍କ ସାଥୀ ଖେଳାଳି ଏହି ପୁରସ୍କାର ଛଡ଼ାଇ ନେଇଥିଲେ।
ଚହଲ ଏହି ହ୍ୟାଟ୍ରିକ୍ ନେଇ ଇତିହାସ ରଚିଛନ୍ତି। ସେ ଚେନ୍ନାଇ ସୁପର କିଙ୍ଗସ୍ ବିପକ୍ଷରେ ଆଇପିଏଲରେ ଏହି କୃତିତ୍ୱ ହାସଲ କରିବାରେ ପ୍ରଥମ ବୋଲର ହୋଇଛନ୍ତି। ଏହା ବ୍ୟତୀତ ଚହଲ ଅମିତ ମିଶ୍ରା ଏବଂ ଯୁବରାଜ ସିଂହଙ୍କ ପରେ IPLରେ ଗୋଟିଏରୁ ଅଧିକ ହ୍ୟାଟ୍ରିକ୍ ନେବାରେ ତୃତୀୟ ବୋଲର ହୋଇଛନ୍ତି। ଏହା ବ୍ୟତୀତ ସେ ପଞ୍ଜାବ କିଙ୍ଗସ୍ ପାଇଁ ଏହି ସଫଳତା ହାସଲ କରିବାରେ ଚତୁର୍ଥ ବୋଲର ମଧ୍ୟ ହୋଇଥିଲେ।
ତେବେ ହ୍ୟାଟ୍ରିକ୍ ନେବା ସତ୍ତ୍ୱେ ୟୁଜଭେନ୍ଦ୍ର ଚହଲଙ୍କୁ ପ୍ଲେୟାର ଅଫ୍ ଦି ମ୍ୟାଚ୍ ପୁରସ୍କାର (POTM)ମିଳିନଥିଲା। ଚହଲ ଚମତ୍କାର ବୋଲିଂ କରିଥିଲେ ଏବଂ ମ୍ୟାଚ୍ରେ ୩ ଓଭରରେ ୪ ୱିକେଟ୍ ନେଇଥିଲେ ଏବଂ ଏହି ପୁରସ୍କାର ଜିତିବା ପାଇଁ ନିଜର ଦାବିଦାର ଜାହିର କରିଥିଲେ। ତଥାପି ତାଙ୍କର ଜଣେ ସାଥୀ ଖେଳାଳି ଦ୍ୱିତୀୟ ଇନିଂସରେ ଚମତ୍କାର ବ୍ୟାଟିଂ କରି ଚହଲଙ୍କଠାରୁ ପୁରସ୍କାର ଛଡ଼ାଇ ନେଇଥିଲେ।
ରନ ଚେଜ୍ ସମୟରେ ମ୍ୟାଚ୍ ବିଜୟୀ ଇନିଂସ ପାଇଁ ପଞ୍ଜାବ କିଙ୍ଗସର ଅଧିନାୟକ ଶ୍ରେୟସ ଆୟରଙ୍କୁ ପ୍ଲେୟାର ଅଫ୍ ଦି ମ୍ୟାଚ୍ ବିବେଚିତ କରାଯାଇଥିଲା। ଆୟର ୭୨ ରନର ଇନିଂସ ଖେଳି ଚେନ୍ନାଇଠାରୁ ବିଜୟ ଛଡ଼ାଇ ଆଣିବାରେ ସବୁଠାରୁ ବଡ଼ ଭୂମିକା ଗ୍ରହଣ କରିଥିଲେ। ୪୧ ବଲ୍ ର ତାଙ୍କ ଇନିଂସରେ, ଆୟର ୫ ଚୌକା ଏବଂ ୪ ଛକା ମାରିଥିଲେ। ଏହି ସମୟ ମଧ୍ୟରେ ତାଙ୍କର ଷ୍ଟ୍ରାଇକ୍ ରେଟ୍ ୧୭୫ ଥିଲା। ଆୟର ପ୍ରଭସିମରନ୍ ସିଂହ (୫୪) ଏବଂ ତା’ପରେ ଶଶାଙ୍କ ସିଂହ (୨୩)ଙ୍କ ସହ ଭାଗୀଦାରି କରି ପଞ୍ଜାବର ବିଜୟର ମୂଳଦୁଆ ପକାଇଥିଲେ। ପଞ୍ଜାବ କିଙ୍ଗ୍ସ ଚେନ୍ନାଇ ଦ୍ୱାରା ଦିଆଯାଇଥିବା ଟାର୍ଗେଟକୁ ଦୁଇ ବଲ୍ ବାକି ଥାଇ ୧୯୪ ରନ୍ କରି ହାସଲ କରିଥିଲା।