ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ

7/05/2025 at 5:40 AM

ଆତଙ୍କବାଦ ବିରୋଧରେ ଭାରତର ବଡ଼ ପ୍ରହାର। ମଙ୍ଗଳବାର ଅଧ ରାତିରେ ‘ଅପରେସନ୍ ସିନ୍ଦୂର’ ସଫଳ। ସିନ୍ଦୂରର ବଦ୍ଲା ସିନ୍ଦୂରରେ ନେଇଛି ସେନା। ଭାରତୀୟ ବାୟୁସେନା ପାକିସ୍ତାନ ଓ ପିଓକେର ୯ଟି ଆତଙ୍କବାଦୀ ଶିବିର ଉପରେ ଏୟାର ଷ୍ଟ୍ରାଇକ୍ କରିଛି । ମଙ୍ଗଳବାର ବିଳମ୍ବିତ ରାତି ପ୍ରାୟ ୧.୩୦ ମିନିଟରେ ଏହି ମିସାଇଲ୍ ଆଟାକ୍ ହୋଇଛି ।

ବିଶେଷ କରି ପାକିସ୍ତାନର ବାହାଓ୍ବଲପୁର, କୋଟଲି ଓ ମୁଜାଫରାବାଦ ଥିବା ୯ଟି ଆତଙ୍କୀ ଠିକଣାରେ ଷ୍ଟ୍ରାଇକ୍ ହୋଇଛି । ଏନେଇ ଭାରତୀୟ ସେନା ନିଜ ସୋସିଆଲ୍ ମିଡିଆ ପ୍ଲାଟଫର୍ମ ଏକ୍ସରେ ‘ଅପରେସନ ସିନ୍ଦୂର’ ପୋଷ୍ଟ କରି ସ୍ପଷ୍ଟ କରିଛି ।

ପ୍ରାରମ୍ଭିକ ସୂଚନା ଅନୁଯାୟୀ, ଭାରତୀୟ ବାୟୁସେନା ଏହି ଆତଙ୍କବାଦୀ ଶିବିର ଗୁଡ଼ିକୁ ଅତି ସଠିକ୍ ଓ ସତର୍କତାର ସହ ଟାର୍ଗେଟ କରିଛି । PIB ସୂଚନା ଦେଇଛି ଯେ ‘ଅପରେସନ୍ ସିନ୍ଦୂର’ ଅତ୍ୟନ୍ତ ରଣନୀତିକ ଭାବରେ ଯୋଜନା କରାଯାଇଥିଲା, ଯାହାଦ୍ୱାରା ଆତଙ୍କବାଦୀଙ୍କ କାର୍ଯ୍ୟକଳାପକୁ ଉଚିତ୍ ଜବାବ ଦିଆଯାଇଛି ।

ପ୍ରେସ ରିଲିଜ୍ରେ କୁହାଯାଇଛି, ଯେ ଏହି ଅପରେସନ୍ ସମୟରେ ପାକିସ୍ତାନର ସାମରିକ ଭିତ୍ତିଭୂମିକୁ ସ୍ପର୍ଶ କରାଯାଇନାହିଁ । ଏୟାର ଷ୍ଟ୍ରାଇକର ପ୍ରକୃତ ଉଦ୍ଦେଶ୍ୟ ହେଉଛି, ଆତଙ୍କବାଦର ମୂଳୋତ୍ପାଟନ କରିବା । ପଡ଼ୋଶୀ ଦେଶ ସହିତ ସଂଘର୍ଷ କରିବାର କୌଣସି ଉଦ୍ଦେଶ୍ୟ ନାହିଁ । ଭାରତର ପ୍ରାୟ ୨୪୪ ସ୍ଥାନରେ ହେବାକୁ ଥିବା ମକ୍ଡ୍ରିଲ୍ର କିଛି ଘଣ୍ଟା ପୂର୍ବରୁ ବାୟୁସେନା ଦ୍ୱାରା ଏହି ଆକ୍ରମଣ କରାଯାଇଥିଲା।

ପହଲଗାମ ଆତଙ୍କବାଦୀ ଆକ୍ରମଣ ପରେ ପ୍ରତିଶୋଧ ନିଆଁ ଜଳୁଥିଲା ଭାରତ । ଆକ୍ସନ ପାଇଁ ପ୍ରସ୍ତୁତ ହେଉଥିଲା ଭାରତୀୟ ସେନା । ତେବେ ପାକିସ୍ତାନ ଓ ପିଓକେରେ ୯ଟି ଆତଙ୍କବାଦୀ ଶିବିର ଧ୍ବଂସ କରି ଆତଙ୍କବାଦୀଙ୍କୁ ଦୃଢ଼ ଜବାବ ଦେଇଛି ଭାରତ । ପହଲଗାମ ଆତଙ୍କବାଦୀ ଆକ୍ରମଣରେ ପ୍ରାୟ ୨୬ଜଣ ନୀରିହ ପର୍ଯ୍ୟଟକଙ୍କ ଜୀବନ ଯାଇଥିଲା । ସେହିପରି ୧୭ଜଣ ଗୁରୁତର ଭାବେ ଆହତ ହୋଇଥିଲା ।