ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ

1/06/2025 at 5:19 AM

ଜଳ ବଣ୍ଟନକୁ ନେଇ ଭାରତ ଏବଂ ପାକିସ୍ତାନ ମଧ୍ୟରେ ଉତ୍ତେଜନାପୂର୍ଣ୍ଣ ପରିସ୍ଥିତି ମଧ୍ୟରେ, ଚୀନ୍ ପକ୍ଷରୁ ଏକ ବଡ଼ ମନ୍ତବ୍ୟ ଆସିଛି । ବେଜିଂସ୍ଥିତ ସେଣ୍ଟର ଫର୍ ଚାଇନା ଆଣ୍ଡ୍ ଗ୍ଲୋବାଲାଇଜେସନ୍ର ଉପାଧ୍ୟକ୍ଷ ଭିକ୍ଟର ଜିକାଇ ଗାଓ ବ୍ରହ୍ମପୁତ୍ର ନଦୀରେ ଭାରତକୁ ପ୍ରବାହିତ ହେଉଥିବା ପାଣିକୁ ବନ୍ଦ କରିବା ପାଇଁ ସଙ୍କେତ ଦେଇଛନ୍ତି।

ସିନ୍ଧୁ ଜଳ ଚୁକ୍ତିନାମା ଉପରେ ଭାରତ ନିଜର ମତକୁ ନେଇ ଅସନ୍ତୋଷ ପ୍ରକାଶ କରି ଭିକ୍ଟର କହିଛନ୍ତି ଯେ, ତୁମେ ଅନ୍ୟମାନଙ୍କ ସହିତ ଏପରି ବ୍ୟବହାର କରିବା ଉଚିତ୍ ନୁହେଁ ଯେପରି ତୁମେ ଚାହୁଁନାହଁ ଯେ, ଅନ୍ୟମାନେ ତୁମ ସହିତ ବ୍ୟବହାର କରନ୍ତୁ। ଗାଓ ନାଲି ଆଖି ଦେଖାଇ ସ୍ପଷ୍ଟ ଭାବରେ ସୂଚାଇ ଦେଇଛନ୍ତି ଯେ, ଯଦି ତାଙ୍କ ବନ୍ଧୁ ପାକିସ୍ତାନକୁ ପାଣି ଯୋଗାଣ ବନ୍ଦ କରାଯାଏ, ତେବେ ଚୀନ୍ ମଧ୍ୟ ଭାରତକୁ ପାଣି ଯୋଗାଣ ବନ୍ଦ କରିବା ଉପରେ ବିଚାର କରିବ।

ଇଣ୍ଡିଆ ଟୁଡେ ସହିତ ଏକ ସାକ୍ଷାତକାରରେ ଭିକ୍ଟର ଗାଓ ବ୍ରହ୍ମପୁତ୍ର ନଦୀ ଉପରେ ଚୀନ୍ର ରଣନୈତିକ ହସ୍ତକ୍ଷେପ ଉପରେ ଆଲୋକପାତ କରିଥିଲେ , ଯାହା ଭାରତର ଜଳ ସୁରକ୍ଷା ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ପହଲଗାମରେ ଆତଙ୍କବାଦୀ ଆକ୍ରମଣ ପରେ, ଭାରତ ପାକିସ୍ତାନ ସହିତ ସିନ୍ଧୁ ଜଳ ଚୁକ୍ତି (ଆଇଡବ୍ଲୁଟି) ସ୍ଥଗିତ ରଖିବାକୁ ନିଷ୍ପତ୍ତି ନେଇଥିଲା। ଏହା ଉପରେ ଗାଓ କହିଛନ୍ତି ଯେ, ଯେପରି ଭାରତରୁ ନଦୀ ପ୍ରବାହିତ ହୋଇ ପାକିସ୍ତାନକୁ ଯାଉଛି, ସେହିପରି ଚୀନ୍ରୁ ନଦୀଗୁଡ଼ିକ ପ୍ରବାହିତ ହୋଇ ଭାରତକୁ ଆସୁଛନ୍ତି।

ଗାଓ ଭାରତକୁ ନାଲି ଆଖି ଦେଖାଇବା ସହିତ ସୂଚାଇ କରିଛନ୍ତି ଯେ, ଚୀନ୍ ନିଜର ବନ୍ଧୁ ପାକିସ୍ତାନକୁ ସମର୍ଥନ କରିବା ପାଇଁ ବ୍ରହ୍ମପୁତ୍ର ଜଳକୁ ଏକ ଅସ୍ତ୍ର ଭାବେ ବ୍ୟବହାର କରିପାରେ। ଭାରତକୁ ଏକ ମଧ୍ୟମ ରାଷ୍ଟ୍ର ଭାବରେ ଉଲ୍ଲେଖ କରି ସେ କହିଛନ୍ତି ଯେ, ଯଦି ଦିଲ୍ଲୀ ବିରୁଦ୍ଧରେ ସମାନ ପ୍ରତିଶୋଧମୂଳକ ପଦକ୍ଷେପ ନିଆଯାଏ, ତେବେ ଭାରତକୁ ଅନେକ ଗମ୍ଭୀର ଅସୁବିଧାର ସମ୍ମୁଖୀନ ହେବାକୁ ପଡ଼ିପାରେ।

ଭିକ୍ଟର ଗାଓଙ୍କ ମନ୍ତବ୍ୟ ଭାରତ ପାଇଁ ଚିନ୍ତାର କାରଣ ହୋଇପାରେ। ଚୀନ୍ ଭାରତ ସହିତ ବ୍ରହ୍ମପୁତ୍ର ଭଳି ନଦୀର ଜଳବିଜ୍ଞାନ ତଥ୍ୟ ବାଣ୍ଟିବା ବନ୍ଦ କରିଦେଇଛି ଏବଂ ଅନେକ ପ୍ରମୁଖ ବନ୍ଧ ନିର୍ମାଣ କରି ଜଳଧାରଣ କ୍ଷମତା ହାସଲ କରିଛି । ବ୍ରହ୍ମପୁତ୍ର ଉପରେ ଚୀନ୍ର କବଜା ଭାରତର ଉତ୍ତର-ପୂର୍ବ ଅଞ୍ଚଳରେ ଆର୍ଥିକ ଏବଂ ରଣନୈତିକ ବିପଦକୁ ବୃଦ୍ଧି କରୁଛି।

ଚଳିତ ବର୍ଷ ଜାନୁଆରିରେ, ଚୀନ୍ ଭାରତୀୟ ସୀମା ନିକଟରେ ବ୍ରହ୍ମପୁତ୍ର ନଦୀରେ ବିଶ୍ୱର ସର୍ବବୃହତ ଜଳବିଦ୍ୟୁତ ବନ୍ଧ ନିର୍ମାଣ ଯୋଜନାର ଉନ୍ମୋଚନ କରିଥିଲା। ଚୀନ୍ ଦାବି କରୁଛି ଯେ, ଏହି ପ୍ରକଳ୍ପ ନିମ୍ନଗାମୀ ଦେଶଗୁଡ଼ିକୁ କ୍ଷତି ପହଞ୍ଚାଇବ ନାହିଁ, କିନ୍ତୁ ଏହା ଭାରତର ଉତ୍ତର-ପୂର୍ବରେ ଭୂ-ରାଜନୈତିକ ଚିନ୍ତା ବଢ଼ାଇଛି। ଏହି ନଦୀବନ୍ଧ ଚୀନ୍ ପାଇଁ ରଣନୈତିକ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ। ଏହା ଭାରତର ଆଞ୍ଚଳିକ ପ୍ରଭାବକୁ ହ୍ରାସ କରିବା ନେଇ ଆଶଙ୍କା ସୃଷ୍ଟି ହୋଇଛି।

ବ୍ରହ୍ମପୁତ୍ର ନଦୀ ତିବ୍ଦତରେ ୟାରଲୁଙ୍ଗ ସାଙ୍ଗପୋ ନାମରେ ଜଣାଶୁଣା। ଏହା କୈଳାସ ପର୍ବତ ନିକଟରୁ ଉତ୍ପନ୍ନ ହୋଇ ଚୀନ୍, ଭାରତ ଏବଂ ବାଂଲାଦେଶ ଦେଇ ଗତି କରି ବଙ୍ଗୋପସାଗରରେ ପଡ଼ିଛି। ଏହି ନଦୀ ଭାରତର ଏକ ବିଶାଳ ଅଞ୍ଚଳରେ ଜଳସେଚନ ଏବଂ ଅନ୍ୟାନ୍ୟ ଉଦ୍ଦେଶ୍ୟ ପାଇଁ ଗୁରୁତ୍ୱପୂର୍ଣ୍ଣ। ବିଶେଷଜ୍ଞମାନେ କହିଛନ୍ତି ଯେ, ଭାରତ ଚୀନ୍ ଦେଇଥିବା ଧମକକୁ ହାଲୁକା ଭାବରେ ନେଇପାରିବ ନାହିଁ ଏବଂ ଏହାକୁ ଅଣଦେଖା କରିପାରିବ ନାହିଁ।