ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ10/06/2025 at 9:46 AM
ନୂଆଦିଲ୍ଲୀ: ୱେଷ୍ଟଇଣ୍ଡିଜ ବ୍ୟାଟ୍ସମ୍ୟାନ୍ ନିକୋଲାସ୍ ପୁରନ୍ ୧୦ ଜୁନ୍ ୨୦୨୫ରେ ଅନ୍ତର୍ଜାତୀୟ କ୍ରିକେଟରୁ ଅବସର ଘୋଷଣା କରିଛନ୍ତି। ମାତ୍ର ୨୯ ବର୍ଷ ବୟସରେ ସେ ଏହି ନିଷ୍ପତ୍ତି ନେଇଛନ୍ତି। ସେ ଏକ ଭାବପ୍ରବଣ ନୋଟ୍ ସେୟାର କରି ଏ ବିଷୟରେ ସୂଚନା ଦେଇଥିଲେ।
ନିକୋଲାସ୍ ପୁରନ୍ କହିଛନ୍ତି ଯେ ସେ ଅବସର ନେବା ପୂର୍ବରୁ ବହୁତ ଚିନ୍ତା କରିଥିଲେ। ତା’ପରେ ଭାରୀ ହୃଦୟରେ ନିଷ୍ପତ୍ତି ନେଇଥିଲେ ଯେ ଏବେ ସମୟ ଆସିଯାଇଛି। ସେ ଲେଖିଛନ୍ତି, “ଆମେ ଭଲ ପାଉଥିବା ଏହି ଖେଳ ଆମକୁ ବହୁତ ଖୁସି ଦେଇଛି ଏବଂ ଜାରି ରଖିବ। ସ୍ମୃତି କେବେ ଭୁଲି ହେବ ନାହିଁ ଏବଂ ୱେଷ୍ଟଇଣ୍ଡିଜ୍ ଲୋକଙ୍କ ପ୍ରତିନିଧିତ୍ୱ କରିବାର ସୁଯୋଗ। ମରୁନ୍ ପୋଷାକ ପିନ୍ଧିବା, ଜାତୀୟ ସଙ୍ଗୀତ ପାଇଁ ଠିଆ ହେବା ଏବଂ ପ୍ରତିଥର ମୁଁ ପଡ଼ିଆରେ ପାଦ ଦେବା ସମୟରେ ମୋର ୧୦୦ ପ୍ରତିଶତ ଦେବା। ଏହା ମୋ ପାଇଁ କ’ଣ ଅର୍ଥ ରଖେ ତାହା ଶବ୍ଦରେ ବର୍ଣ୍ଣନା କରିବା କଷ୍ଟକର। ଅଧିନାୟକ ଭାବରେ ଦଳକୁ ନେତୃତ୍ୱ ନେବା ମୋ ପାଇଁ ସର୍ବଦା ସମ୍ମାନର ବିଷୟ ହେବ।”
ପୁରନ୍ ୨୦୧୬ରେ ତାଙ୍କର ଟି୨୦ ଅନ୍ତର୍ଜାତୀୟ ଡେବ୍ୟୁ କରିଥିଲେ। ୩ ବର୍ଷ ପରେ ୨୦୧୯ରେ ସେ ତାଙ୍କର ଏକଦିବସୀୟ ଡେବ୍ୟୁ କରିଥିଲେ। ସେ ୱେଷ୍ଟଇଣ୍ଡିଜ୍ ପାଇଁ କେବେ ଟେଷ୍ଟ ଖେଳି ନଥିଲେ। ତାଙ୍କ ଅନ୍ତର୍ଜାତୀୟ କ୍ୟାରିୟରରେ ପୂରନ ୬୧ଟି ODI ଏବଂ ୧୦୬ଟି T20 ମ୍ୟାଚ୍ ଖେଳିଥିଲେ। ଯେଉଁଥିରେ ସେ ଯଥାକ୍ରମେ ୧୯୮୩ ଏବଂ ୨୨୭୫ ରନ୍ କରିଥିଲେ।
ତାଙ୍କ ODI କ୍ୟାରିୟରରେ ପୂରନ ୩ଟି ଶତକ ଏବଂ ୧୧ଟି ଅର୍ଦ୍ଧଶତକ ମାରିଥିଲେ। ତାଙ୍କର T20 ଆନ୍ତର୍ଜାତୀୟରେ ୧୩ଟି ଅର୍ଦ୍ଧଶତକ ଅଛି। ୧୯ ଡିସେମ୍ବର ୨୦୨୪ରେ ବାଂଲାଦେଶ ବିପକ୍ଷରେ T20 ମ୍ୟାଚ୍ ପୂରନଙ୍କ ଶେଷ ଅନ୍ତର୍ଜାତୀୟ ମ୍ୟାଚ୍ ପ୍ରମାଣିତ ହୋଇଥିଲା।