ରାଜାରାମ ଷଡଙ୍ଗୀ

30/08/2025 at 9:48 PM

ସମ୍ବଲପୁର:ସମ୍ବଲପୁର ମହାନଗର ନିଗମ ରେ ଶନିବାର ସମଲେଶ୍ୱରୀ ମନ୍ଦିର ପରିସର, ନଦୀ ତଟ ପଠାରେ ସ୍ୱାୟତ୍ତ ଶାସନ ଦିବସ ପାଳନ ଅବସରରେ “ପଥ ଉତ୍ସବ – ୨୦୨୫” କାର୍ଯ୍ୟକ୍ରମ ଆୟୋଜିତ ହୋଇଯାଇଛି।“ଆମ ସହର, ଆମ ରାସ୍ତା, ଆମ ଉତ୍ସବ” ଉପରେ ଆଧାରିତ ଏହି ଉତ୍ସବ ମାଧ୍ୟମରେ ସ୍ଥାନୀୟ ସ୍ୱଶାସନକୁ ସୁଦୃଢ କରିବା ସହ ସହର କୁ ସଫାସୁତୁରା ରଖିବା ନିମନ୍ତେ ସହରବାସୀଙ୍କୁ ସଚେତନ କରିବା ପାଇଁ ପ୍ରୟାସ କରାଯାଇଥିଲା।ଏହି ଉତ୍ସବରେ ସହରବାସୀ, ଶିକ୍ଷାର୍ଥୀ, କଳାକାର, ସାମାଜିକ ସଂଗଠନ ଓ ବିଭିନ୍ନ ବର୍ଗର ଲୋକ ଅଂଶଗ୍ରହଣ କରିଥିଲେ।

ଉତ୍ସବ ପରିପ୍ରେକ୍ଷୀରେ ଅନ-ଦ-ସ୍ପଟ ପୋଷ୍ଟର ମେକିଂ ପ୍ରତିଯୋଗୀତା, ସ୍ୱାସ୍ଥ୍ୟ ଶିବିର, ଯୋଗ, ଜୁମ୍ବା ଆଦି ଆୟୋଜିତ ହୋଇଥିଲା। ଯାହାର ବିଷୟଗୁଡ଼ିକ ଥିଲା – “ସମ୍ବଲପୁର ତେବେ ଓ ଏବେ “ମୋ ସ୍ୱପ୍ନର ସ୍ୱଚ୍ଛ ଓ ସବୁଜ ସମ୍ବଲପୁର”, ଓ “ସମ୍ବଲପୁରର ସ୍ଥାନୀୟ ସମସ୍ୟା ଓ ଏହାର ସମାଧାନ”। ସହରର ବହୁ ଶିକ୍ଷାର୍ଥୀ ଏହି ପ୍ରତିଯୋଗିତାରେ ନିଜ ନିଜର ସୃଜନଶୀଳତା ପ୍ରଦର୍ଶନ କରିଥିଲେ।ଏହାପରେ ସ୍ୱତନ୍ତ୍ର ପ୍ରତିଭାଶାଳୀ କଳାକାର ମାନଙ୍କ ଦ୍ଵାରା ସଙ୍ଗୀତ, ନୃତ୍ୟ, ଓ ବିଭିନ୍ନ ସାହିତ୍ୟ-ସାଂସ୍କୃତିକ କାର୍ଯ୍ୟକ୍ରମ ହୋଇଥିଲା। ସନ୍ଧ୍ୟା ରେ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମରେ ପଥ ଉତ୍ସବ ଦର୍ଶକ ଙ୍କ ମନ ମୋହିଥିଲା।

ଉକ୍ତ ଉତ୍ସବରେ ସମ୍ବଲପୁର ଜିଲ୍ଲାପାଳ ସିଦ୍ଧେଶ୍ଵର ବଳିରାମ ବୋନ୍ଦର, ସମ୍ବଲପୁର ଆରକ୍ଷୀ ଅଧିକ୍ଷକ ମୁକେଶ ଭାମୂ , ସମ୍ବଲପୁର ମହାନଗର ନିଗମ ର ଆୟୁକ୍ତ ରେହାନ ଖତ୍ରୀ, ଅତିରିକ୍ତ ଜିଲ୍ଲାପାଳ ଅଶୋକ କୁମାର ଭୋଇ ପ୍ରମୁଖ ଅତିଥି ଭାବେ ଯୋଗ ଦେଇଥିଲେ।

ସମ୍ବଲପୁର ଜିଲ୍ଲାପାଳ ସିଦ୍ଧେଶ୍ଵର ବଳିରାମ ବୋନ୍ଦର ସମ୍ବଲପୁର ସହର କୁ ସ୍ଵଚ୍ଛ, ସୁନ୍ଦର ଓ ସବୁଜ କରିବାପାଇଁ ପ୍ରଶାସନ ସହିତ ଜନସାଧାରଣ କୁ ମଧ୍ୟ ସହଯୋଗ କରିବାକୁ ଆହ୍ଵାନ ଦେଇଥିଲେ।୨୦୨୪-୨୦୨୫ ରେ ସ୍ବଚ୍ଛତା ରେ ସହର ମାନଙ୍କ ମଧ୍ୟରେ ସମ୍ବଲପୁର ୧୧୪ ଥିଲା, କିନ୍ତୁ ସମ୍ବଲପୁର କେମିତି ଶ୍ରେଷ୍ଠ ୨୫ ଟି ସହର ଭିତରେ ସ୍ଥାନ ପାଇବ, ସେଥିପାଇଁ ଆମକୁ ପ୍ରୟାସ କରିବାକୁ ପଡିବ ବୋଲି କହିଥିଲେ। ଏ ସମ୍ପର୍କରେ ଲୋକଙ୍କୁ ସଚେତନତା କରାଇ ଏହି ପ୍ରୟାସର ଭାଗୀଦାରିତା ଉପରେ ଗୁରୁତ୍ୱ ଦେଇଥିଲେ। ଭବିଷ୍ୟତରେ ବର୍ଜ୍ୟବସ୍ତୁ ପ୍ରକ୍ରିୟାକରଣ କାରଖାନା ସ୍ଥାପନ କରାଯିବାର ଯୋଜନା ଚାଲିଛି ବୋଲି ସେ ପ୍ରକାଶ କରିଥିଲେ।ସମ୍ବଲପୁର ଆରକ୍ଷୀ ଅଧିକ୍ଷକ ମୁକେଶ ଭାମୂ ସହର କୁ ସଫାସୁତୁରା ରଖିବାରେ ନିଜର ସାମାଜିକ ଦାୟିତ୍ଵ କୁ ସତ ପ୍ରତିଶତ ବହନ କରିବାପାଇଁ କହିଥିଲେ।
ସମ୍ବଲପୁର ମହାନଗର ନିଗମ ର ଆୟୁକ୍ତ ରେହାନ ଖତ୍ରୀ ସମ୍ବଲପୁର କୁ ସ୍ଵଚ୍ଛ ଓ ସୁସ୍ଥ ରଖିବାରେ ସାଧାରଣ ନାଗରିକ ମାନଙ୍କର ମଧ୍ୟ ମୁଖ୍ୟ ଭୂମିକା ରହିଛି ବୋଲି ସେ କହିଥିଲେ।ଉଭୟ ପ୍ରଶାସନ, ଜନ ସାଧାରଣ ଙ୍କ ଭାଗୀଦାରୀ ରେ ଏହି ପ୍ରୟାସ ସଫଳ ହୋଇପାରିବ ଏଣୁ ସ୍ୱଚ୍ଛତା ଉପରେ ଗୁରୁତ୍ୱ ଦେବାକୁ ସେ ଜନସାଧାରଣଙ୍କ ସହଯୋଗ ଲୋଡ଼ିଥିଲେ।