ଆଇସିୟୁରେ ଥିଲେ ଜେଜେ ମା; ପଡ଼ିଆରେ ଇତିହାସ ରଚୁଥିଲେ ନାତୁଣୀ…
ନୂଆଦିଲ୍ଲୀ: ନଭେମ୍ବର ୨ ରାତିରେ ଭାରତୀୟ ମହିଳା କ୍ରିକେଟ୍ ଦଳ ଏକ ଇତିହାସ ସୃଷ୍ଟି କରିଛି। ଯାହାକୁ ନେଇ ସବୁଠି ଚର୍ଚ୍ଚା ହେଉଛି। ତିନି ଥର ମହିଳା ବିଶ୍ୱକପ୍ ଫାଇନାଲରେ ପହଞ୍ଚି ଅଳ୍ପକେ ବିଶ୍ୱ ଚାମ୍ପିଅନ ହେବାରୁ ବଞ୍ଚିତ ହୋଇଥିବା ଟିମ୍ ଇଣ୍ଡିଆ ଏଥର ସୁଯୋଗ ହାତଛଡ଼ା କରିନାହିଁ। ହରମନପ୍ରୀତ କୌର ଏବଂ ତାଙ୍କ ଦଳ ଦକ୍ଷିଣ ଆଫ୍ରିକା ବିପକ୍ଷରେ ବିଶ୍ୱକପ୍ ଫାଇନାଲରେ ଚମତ୍କାର ପ୍ରଦର୍ଶନ କରି ୫୨ ରନର ବିଜୟ ହାସଲ କରି ପ୍ରଥମ ଟାଇଟଲ ଜିତିଥିଲେ। ଏହା ୧୯୭୩ ମସିହାରେ ପ୍ରଥମ ଥର ପାଇଁ ଖେଳାଯାଇଥିବା ମହିଳା ବିଶ୍ୱକପ୍ ଜିତିବା ପାଇଁ ଟିମ୍ ଇଣ୍ଡିଆର ୫୨ ବର୍ଷର ପ୍ରତୀକ୍ଷାର ମଧ୍ୟ ଅନ୍ତ ଘଟାଇଥିଲା।
ଟିମ୍ ଇଣ୍ଡିଆର ବିଜୟରେ ଅନେକ ଖେଳାଳି ଗୁରୁତ୍ୱପୂର୍ଣ୍ଣ ଅବଦାନ ଦେଇଥିଲେ। ଭାରତୀୟ ମହିଳା ଦଳ ଇତିହାସ ରଚିବା ପରେ ଅମନଜୋତ କୌରଙ୍କ ପିତା ଏକ ଆଶ୍ଚର୍ଯ୍ୟଜନକ ସତ୍ୟ ପ୍ରକାଶ କରିଛନ୍ତି ଯାହା ଆପଣଙ୍କୁ ଭାବପ୍ରବଣ ଏବଂ ଆଶ୍ଚର୍ଯ୍ୟ କରିଦେବ। ସେ ଟୁର୍ଣ୍ଣାମେଣ୍ଟ ସମୟରେ ତାଙ୍କ ପରିବାରର ସମ୍ମୁଖୀନ ହୋଇଥିବା ସଙ୍କଟର ବିବରଣୀ ଏବଂ ଦେଶ ପାଇଁ ଖେଳୁଥିବା ଅମନଜୋତଙ୍କଠାରୁ ତାଙ୍କ ପରିବାର ଏହାକୁ କିପରି ଗୁପ୍ତ ରଖିଥିଲା ସେ ବିଷୟରେ ସେୟାର କରିଛନ୍ତି। ଅମନଜୋତଙ୍କ ବାପା ଭୂପିନ୍ଦର ସିଂହ ପ୍ରକାଶ କରିଛନ୍ତି ଯେ ତାଙ୍କ ମାଆ ଅର୍ଥାତ୍ ଅମନଜୋତଙ୍କ ଜେଜେମା, ଟୁର୍ଣ୍ଣାମେଣ୍ଟ ସମୟରେ ହୃଦଘାତର ଶିକାର ହୋଇଥିଲେ। ସେମାନେ ଭାରତୀୟ ଅଲରାଉଣ୍ଡରଙ୍କୁ ଏ ବିଷୟରେ ନ ଜଣାଇବାକୁ ନିଷ୍ପତ୍ତି ନେଇଥିଲେ ଯାହାଫଳରେ ସେ ବିଶ୍ୱକପରେ ପ୍ରଦର୍ଶନ ଉପରେ ଧ୍ୟାନ ଦେଇପାରିବେ।
ଗଣମାଧ୍ୟମ ସହିତ କଥାବାର୍ତ୍ତା କରି ସେ କହିଛନ୍ତି, “ମୋ ମାଆ ଭଗବତୀ ଓ ତାଙ୍କ ନାତୁଣୀ ଅମନଜୋତଙ୍କ ସହିତ ବହୁତ ଘନିଷ୍ଠ ସମ୍ପର୍କ ରହିଛି। ଅମନଜୋତ ମୋହାଲିର ରାସ୍ତାରେ ଏବଂ ଫେଜ୍ ୫ ରେ ଆମ ଘର ପାଖରେ ଥିବା ପାର୍କରେ କ୍ରିକେଟ୍ ଖେଳିବା ଆରମ୍ଭ କରିବା ଦିନଠାରୁ ତାଙ୍କ ଜେଜେମା ତାଙ୍କ ସହିତ ଅଛନ୍ତି। ଭୂପିନ୍ଦର ଆହୁରି ମଧ୍ୟ କହିଛନ୍ତି, “ଗତ ମାସରେ ତାଙ୍କ ଜେଜେମା ହୃଦଘାତର ଶିକାର ହୋଇଥିଲେ, କିନ୍ତୁ ଆମେ ଏ ବିଷୟରେ ଅମନଜୋତଙ୍କୁ କହି ନଥିଲୁ। ତାଙ୍କୁ କିଛି ଦିନ ପାଇଁ ହସ୍ପିଟାଲରେ ଚିକିତ୍ସା କରାଯାଇଥିଲା। ଏତେ ଚାପପୂର୍ଣ୍ଣ ସମୟରେ ବିଶ୍ୱକପ୍ ବିଜୟ ନିଶ୍ଚିତ ଭାବରେ ଆମ ପାଇଁ ଏକ ଗୌରବମୟ କଥା।”
