ୟୁଟ୍ୟୁବ, ଓଟିଟି ପାଇଁ ଲାଗିଲା କଟକଣା; ଆଧାର କାର୍ଡ ନଥିଲେ ଦେଖିପାରିବନି ଆଡଲ୍ଟ କଣ୍ଟେଣ୍ଟ
ନୂଆଦିଲ୍ଲୀ; ୨୯|୧୧: ଆଜିକାଲି ୟୁଟ୍ୟୁବ୍ ଓ ବିଭିନ୍ନ OTT ପ୍ଲାଟଫର୍ମଗୁଡିକରେ ଅନେକ ଆଡଲ୍ଟ କଣ୍ଟେଣ୍ଟ/ ଶୋ’ ଆସୁଛି । ତାହା ସମସ୍ତେ ଦେଖିବାକୁ ମଧ୍ୟ ପସନ୍ଦ କରୁଛନ୍ତି | ବାହାରକୁ ଯାଇ ଦେଖିବା ବଦଳରେ ଏବେ ଲୋକେ ଘରେ ରହି ଅନଲାଇନ ମାଧ୍ୟମରେ ଶୋ ଦେଖିବାକୁ ପସନ୍ଦ କରୁଛନ୍ତି | ସ୍ମାର୍ଟଫୋନ ବ୍ୟବହାର ବଢିବା ସହିତ OTT ରେ ଶୋ ଦେଖିବା ମଧ୍ୟ ସହଜ ହୋଇଗଲାଣି| ଏଥିରେ ବଡ ଲୋକଙ୍କଠୁ ଆରମ୍ଭ କରି ଛୋଟ ପିଲାଙ୍କ ପଯ୍ୟନ୍ତ ସମସ୍ତେ ଏହି ପ୍ଲାଟଫର୍ମ ଗୁଡିକୁ ବ୍ୟବହାର କରୁଛନ୍ତି| କିନ୍ତୁ ସ୍ମାର୍ଟଫୋନର ସୁବିଧା ଥିବାରୁ ପିଲାମାନେ ବି ଏସବୁ କଣ୍ଟେଣ୍ଟ ଦେଖୁଛନ୍ତି ଓ ବାଟବଣା ହେଉଛନ୍ତି। ଯାହାକୁ ନେଇ ଚିନ୍ତା ପ୍ରକାଶ କରିଛନ୍ତି ସୁପ୍ରିମକୋର୍ଟ।
ତେବେ ଏ ସବୁକୁ ନେଇ ସୁପ୍ରିମକୋର୍ଟ କିଛି ନୂଆ ନିୟମ ଜାରି କରିଛନ୍ତି | ଜାତୀୟ ଗଣମାଧ୍ୟମ ରିପୋର୍ଟ ଅନୁସାରେ ସୁପ୍ରିମକୋର୍ଟ କହିଛନ୍ତି ଯେ, କୌଣସି ଆଡଲ୍ଟ ବା ଅଶ୍ଳୀଳ ବିଷୟବସ୍ତୁ ଦେଖିବାକୁ ହେଲେ ଆଧାର ଭେରିଫିକେସନ ବାଧ୍ୟତାମୂଳକ ହେବା ଉଚିତ୍ । କେବଳ ଫିଲ୍ମ କିମ୍ବା ଶୋ’ ଚାଲିବା ଆଗରୁ ଚେତାବନୀ ଦେବା ଯଥେଷ୍ଟ ହେବ ନାହିଁ । କାରଣ ଚେତାବନୀ ପଢିବା ବେଳକୁ ଶୋ ଆରମ୍ଭ ହୋଇଯାଉଛି । ତେଣୁ ଆଧାର ଭେରିଫିକେସନ ରହିବା ନିହାତି ଆବଶ୍ୟକ| ଏହା କରିବା ଦ୍ୱାରା ଦର୍ଶକଙ୍କ ବୟସ ଜଣାପଡିବ ।
କଣ୍ଟେଟ 18+ ହୋଇଥିଲେ ପିଲାମାନେ ଏହାକୁ ଦେଖିପାରିବେ ନାହିଁ। ଛୋଟ ପିଲାମାନଙ୍କୁ ଏସବୁ ଅଶ୍ଳୀଳତାରୁ ଦୂରେଇ ରଖାଯାଇପାରିବ। ଏହି ନିୟମ ପରୀକ୍ଷାମୂଳକ ଭାବେ ଲାଗୁ କରାଯାଇପାରିବ ବୋଲି ପରାମର୍ଶ ଦେଇଛନ୍ତି ଦେଶର ପ୍ରଧାନ ବିଚାରପତି ଜଷ୍ଟିସ୍ ସୂର୍ଯ୍ୟକାନ୍ତ। ଏଥିସହିତ ଅନଲାଇନ କଣ୍ଟେଣ୍ଟଗୁଡିକୁ କଣ୍ଟ୍ରୋଲ କରିବା ପାଇଁ ଏକ ସ୍ୱାୟତ୍ତ ରେଗୁଲେଟାରୀ ବଡି ଦରକାର ବୋଲି କହିଛନ୍ତି । ଷ୍ଟାଣ୍ଡ-ଅପ୍ କମେଡିଆନ ସମୟ ରୈନା ଓ ପଡକାଷ୍ଟର ରଣବୀର ଆହ୍ଲାବାଦିଆଙ୍କ ମାମଲାର ଶୁଣାଣି ବେଳେ ଏହା କହିଛନ୍ତି ସୁପ୍ରିମକୋର୍ଟ। ସୁପ୍ରିମକୋର୍ଟ ଆହୁରି ମଧ୍ୟ କହିଛନ୍ତି ଯେ ଅଭିବ୍ୟକ୍ତିର ସ୍ୱାଧିନତା ଅର୍ଥ ଏୟା ନୁହେଁ ଯେ ନିଜ ମନମାନୀ କରିବା। କିଛି ବି ଅଶ୍ଲୀଳ କିମ୍ବା ବିବାଦୀୟ ଟିପ୍ପଣୀ ଦେବା ନୁହେଁ ବୋଲି ବି କହିଛନ୍ତି । ସମୟଙ୍କ ଶୋ’ରେ ବାପାମାଆଙ୍କୁ ନେଇ ଏକ ଅଶ୍ଳୀଳ କମେଣ୍ଟ କରାଯାଇଥିଲା । ଏନେଇ ବିବାଦ ତେଜିବା ସହ କୋର୍ଟରେ ପହଞ୍ଚିଥିଲା ମାମଲା ।
ଏଠି ପ୍ରଶ୍ନ ଉଠୁଛି, କ’ଣ ସୁପ୍ରିମକୋର୍ଟଙ୍କ ପରାମର୍ଶ ମାନିବେ ସରକାର ? କଣ ଆଡଲ୍ଟ କଣ୍ଟେଣ୍ଟକୁ ନେଇ ଆସିବ କି ନୂଆ ନିୟମ ?
