ଟିଟିଲାଗଡ଼ରେ ପ୍ରଶାସନର ନିଷ୍କ୍ରିୟତା ବିରୋଧରେ ନିଆରା ପ୍ରତିବାଦ: ମଦୁଆଙ୍କୁ ଫୁଲମାଳ, ଚାଖନା ଓ ପାଣି ପାଉଚ୍ ଦେଇ ସ୍ୱାଗତ କଲେ ମହିଳା ଓ ସ୍ଥାନୀୟ ବାସିନ୍ଦା ।
ବଲାଙ୍ଗୀର,୧୦।୭: ବିଦ୍ୟାଳୟ ନିକଟରେ ଖୋଲିଥିବା ମଦ ଦୋକାନକୁ ବନ୍ଦ କରିବା ପାଇଁ ବାରମ୍ବାର ପ୍ରଶାସନକୁ ଗୁହାରି କରି ବିଫଳ ହେବା ପରେ, ଏବେ ଏକ ନିଆରା ତଥା ବ୍ୟଙ୍ଗାତ୍ମକ ପ୍ରତିବାଦର ପନ୍ଥା ଆପଣେଇଛନ୍ତି ସ୍ଥାନୀୟ ଜନସାଧାରଣ। ଟିଟିଲାଗଡ଼ ସହରର ହାଇସ୍କୁଲ ପଡ଼ା ଅଞ୍ଚଳରେ ଏଭଳି ଏକ ଚାଞ୍ଚଲ୍ୟକର ତଥା ଅଭିନବ ବିକ୍ଷୋଭ ଦେଖିବାକୁ ମିଳିଛି, ଯେଉଁଠାରେ ମହିଳା ଓ ପୁରୁଷମାନେ ଏକାଠି ହୋଇ ମଦ ଦୋକାନ ସମ୍ମୁଖରେ ଧାରଣାରେ ବସିଛନ୍ତି।
ଅଞ୍ଚଳବାସୀଙ୍କ ଅଭିଯୋଗ ଅନୁଯାୟୀ, ଶିକ୍ଷାନୁଷ୍ଠାନ ଏବଂ ଆବାସିକ ଅଞ୍ଚଳ ନିକଟରେ ଚାଲୁଥିବା ଏହି ମଦ ଦୋକାନ ଯୋଗୁଁ ସ୍ଥାନୀୟ ପରିବେଶ ସମ୍ପୂର୍ଣ୍ଣ ରୂପେ ଦୂଷିତ ହେଉଛି। ପୂର୍ବରୁ ଏହାକୁ ବନ୍ଦ କରିବା ପାଇଁ ଟିଟିଲାଗଡ଼ ଉପଜିଲ୍ଲାପାଳ, ଅବକାରୀ ବିଭାଗ ଏବଂ ଏସ.ଡି.ପି.ଓ. (SDPO) ଙ୍କ ଉପସ୍ଥିତିରେ ମିଳିତ ବୈଠକ ଅନୁଷ୍ଠିତ ହୋଇଥିଲେ ମଧ୍ୟ ପ୍ରଶାସନ ଏପର୍ଯ୍ୟନ୍ତ କୌଣସି ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିନାହିଁ। ପ୍ରଶାସନର ଏହି ଉଦାସୀନତା ଓ ନିଷ୍କ୍ରିୟତା ବିରୋଧରେ ଜନସାଧାରଣ ଏବେ ଗାନ୍ଧୀବାଦୀ ତଥା ବ୍ୟଙ୍ଗାତ୍ମକ ଶୈଳୀରେ ନିଜର ଆକ୍ରୋଶ ପ୍ରକାଶ କରିଛନ୍ତି।
ପ୍ରତିବାଦ ସ୍ଥଳରେ ଏକ ଭିନ୍ନ ଦୃଶ୍ୟ ଦେଖିବାକୁ ମିଳିଛି। ଆନ୍ଦୋଳନକାରୀମାନେ ହାତରେ ଫୁଲମାଳ, କାଚ ଗ୍ଲାସ୍, ପାଣି ବୋତଲ ଏବଂ ମଦ ସହ ବ୍ୟବହାର ହେଉଥିବା ବିଭିନ୍ନ ଚାଖନା ଧରି ବସିଛନ୍ତି। ସ୍ଥାନୀୟ ଜଣେ ବ୍ୟକ୍ତି କ୍ଷୋଭର ସହ ପ୍ରକାଶ କରିଛନ୍ତି ଯେ, “ଯଦି ସରକାର ଓ ପ୍ରଶାସନ ଆମ ଅନୁରୋଧ ଶୁଣି ମଦ ଦୋକାନ ବନ୍ଦ କରୁନାହାନ୍ତି, ତେବେ ଆମେ ବାଧ୍ୟ ହୋଇ ଏଠାକୁ ଆସୁଥିବା ସମସ୍ତ ମଦୁଆଙ୍କୁ ଫୁଲମାଳ, ଗ୍ଲାସ୍ ଓ ଚାଖନା ଦେଇ ସ୍ୱାଗତ କରିବୁ। ସେମାନେ ଆସନ୍ତୁ, ମଦ ପିଇ ଆମ ପଡ଼ାକୁ ନଷ୍ଟ କରନ୍ତୁ, ବୋଧହୁଏ ଏହା ଦେଖି ସରକାରଙ୍କ କାନରେ କିଛି ପଶିବ।”
ଏହି ଆନ୍ଦୋଳନରେ ସ୍ଥାନୀୟ ମହିଳାମାନେ ପ୍ରମୁଖ ଭୂମିକା ଗ୍ରହଣ କରିଛନ୍ତି। ମଦ ଦୋକାନ ସମ୍ମୁଖରେ ଅସ୍ଥାୟୀ ଭାବେ ବସି ସେମାନେ ହାତରେ ପାଣି ପାଉଚ୍ ଧରି ବିକ୍ଷୋଭ ପ୍ରଦର୍ଶନ କରୁଛନ୍ତି। ଜଣେ ଆନ୍ଦୋଳନକାରୀ ମହିଳା ଗଣମାଧ୍ୟମକୁ କହିଛନ୍ତି, “ଆମେ ପୂର୍ବରୁ ବହୁତ ବିରୋଧ କରିଛୁ, କିନ୍ତୁ କୌଣସି ସୁଫଳ ମିଳିଲା ନାହିଁ। ତେଣୁ ଆମେ ଏବେ ମଦ କିଣିବାକୁ ଆସୁଥିବା ଗ୍ରାହକମାନଙ୍କୁ ସ୍ୱାଗତ କରିବା ପାଇଁ ପାଣି ପାଉଚ୍ ଓ ମାଳ ଧରି ବସିଛୁ।”
ଏହି ନିଆରା ପ୍ରତିବାଦ ଏବେ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି। ଶିକ୍ଷାନୁଷ୍ଠାନର ସୁରକ୍ଷା ଓ ସାମାଜିକ ସୁସ୍ଥ ପରିବେଶକୁ ଦୃଷ୍ଟିରେ ରଖି ପ୍ରଶାସନ କେବେ ଚେତିବ ଏବଂ ଏହି ଜନବିରୋଧୀ ମଦ ଦୋକାନ ଉପରେ କେବେ ତାଲା ପଡ଼ିବ, ତାହା ଦେଖିବାକୁ ବାକି ରହିଲା।
