ରେଙ୍ଗାଲିରେ ପ୍ରଥମ ଥର ପାଇଁ ଭବ୍ୟ ‘ନୂଆଁଖାଇ ଜୁହାର ଭେଟ୍-୨୦୨୬’ ଅନୁଷ୍ଠିତ: ସମ୍ବଲପୁରୀ କଳା, ସଂସ୍କୃତି ଓ ହାସ୍ୟରସରେ ଝୁମିଲେ ହଜାର ହଜାର ଦର୍ଶକ
ଜମନକିରା : ସମ୍ବଲପୁର ଜିଲ୍ଲା ଅନ୍ତର୍ଗତ ରେଙ୍ଗାଲିର ମଙ୍ଗଳବାର ବଜାର ପ୍ରାଙ୍ଗଣସ୍ଥିତ ମୁକ୍ତାକାଶ ରଙ୍ଗମଞ୍ଚରେ ପ୍ରଥମ ଥର ପାଇଁ ମହାସମାରୋହରେ ଅନୁଷ୍ଠିତ ହୋଇଯାଇଛି ଐତିହାସିକ ‘ନୂଆଁଖାଇ ଜୁହାର ଭେଟ୍-୨୦୨୬’। ଆୟୋଜନ କମିଟିର ସଭାପତି ଅନ୍ତର୍ଯ୍ୟାମୀ ପାଣିଙ୍କ ପୌରୋହିତ୍ୟରେ ଆୟୋଜିତ ଏହି ମନୋଜ୍ଞ ଉତ୍ସବରେ ଆଞ୍ଚଳିକ ଭାଇଚାରା ଓ ଲୋକସଂସ୍କୃତିର ଅପୂର୍ବ ସମନ୍ୱୟ ଦେଖିବାକୁ ମିଳିଥିଲା।
ଏହି ଉତ୍ସବରେ ବିଶିଷ୍ଟ ସାହିତ୍ୟିକ ତଥା ଶିକ୍ଷାବିତ୍ ସୁବାସ ଚନ୍ଦ୍ର ନାୟକ ମୁଖ୍ୟବକ୍ତା ଭାବେ ଯୋଗଦେଇ ନୂଆଁଖାଇର ମହତ୍ତ୍ୱ ଉପରେ ଆଲୋକପାତ କରିଥିଲେ। ସେ କହିଥିଲେ ଯେ, କୃଷିଭିତ୍ତିକ ଗଣପର୍ବ ନୂଆଁଖାଇ କେବଳ ଏକ ଉତ୍ସବ ନୁହେଁ; ଏହା ଭ୍ରାତୃଭାବ, ସାମାଜିକ ଏକତା, ଗୁରୁଜନଙ୍କ ପ୍ରତି ସମ୍ମାନ ଏବଂ ସମ୍ବଲପୁରୀ ଅସ୍ମିତାକୁ ବିଶ୍ୱ ଦରବାରରେ ପହଞ୍ଚାଇବାର ମୁଖ୍ୟ ମାଧ୍ୟମ। ଏଥିସହ ବୀର ସୁରେନ୍ଦ୍ର ସାଏଙ୍କ ଅଦମ୍ୟ ବୀରତ୍ୱ ଓ ସଂଗ୍ରାମକୁ ସ୍ମରଣ କରି ପଶ୍ଚିମ ଓଡ଼ିଶା ବିକାଶ ପରିଷଦକୁ ଅଧିକ କ୍ରିୟାଶୀଳ ଓ ସୁଦୃଢ଼ କରିବା ଦିଗରେ ସେ ନିଜର ଦୃଢ଼ ମତ ଉପସ୍ଥାପନ କରିଥିଲେ।
ସମ୍ମାନିତ ଅତିଥି ଭାବରେ ରେଙ୍ଗାଲି ବିଧାୟକ ସୁଦର୍ଶନ ହରିପାଲ, ପୂର୍ବତନ ବିଧାୟକ ନାଉରୀ ନାଏକ, ଦୁର୍ଯ୍ୟୋଧନ ଗାର୍ଡିଆ, ରମେଶ ପଟୁଆ, ବ୍ଲକ ଅଧ୍ୟକ୍ଷ ସତ୍ୟନାରାୟଣ ଅଗ୍ରୱାଲ, ଆଦିତ୍ୟ ବିର୍ଲା ପ୍ରତିନିଧି ନିମାଇଁ ପଣ୍ଡା, ଅମରେଶ ପଣ୍ଡା ଏବଂ ରତନ ଲାଲ୍ ସିଂହ ପ୍ରମୁଖ ଉପସ୍ଥିତ ରହି କାର୍ଯ୍ୟକ୍ରମର ଶୋଭା ବଢ଼ାଇଥିଲେ। କମିଟି ତରଫରୁ ମୁଖ୍ୟବକ୍ତା ଶ୍ରୀ ନାୟକଙ୍କୁ ମାନପତ୍ର ଏବଂ ସମସ୍ତ ଅତିଥିବୃନ୍ଦଙ୍କୁ ସ୍ମାରକୀ ଟ୍ରଫି ତଥା ଉତ୍ତରୀୟ ଓ ପୁଷ୍ପଗୁଚ୍ଛ ପ୍ରଦାନ ପୂର୍ବକ ସମ୍ବର୍ଦ୍ଧିତ କରାଯାଇଥିଲା।
ସାଂସ୍କୃତିକ ଅଧିବେଶନରେ ତିନିଜଣ ପ୍ରତିଷ୍ଠିତ ହାସ୍ୟ କବି ସେମାନଙ୍କ ଶାଣିତ ବ୍ୟଙ୍ଗ କବିତା ପରିବେଷଣ କରି ଉପସ୍ଥିତ ପ୍ରାୟ ତିନି ହଜାରରୁ ଊର୍ଦ୍ଧ୍ୱ ଦର୍ଶକଙ୍କୁ ହସର ଖୋରାକ ଯୋଗାଇଥିଲେ। ପରବର୍ତ୍ତୀ ପର୍ଯ୍ୟାୟରେ ଜିଲ୍ଲା ତଥା ରାଜ୍ୟର ବିଭିନ୍ନ ପ୍ରାନ୍ତରୁ ଆସିଥିବା ଖ୍ୟାତନାମା କଳାକାରମାନଙ୍କ ଦ୍ୱାରା ପରିବେଷିତ ସମ୍ବଲପୁରୀ ଲୋକଗୀତ ଓ ମନମୁଗ୍ଧକର ନୃତ୍ୟ ଉପସ୍ଥିତ ଜନସାଧାରଣଙ୍କୁ ବିମୋହିତ କରିଦେଇଥିଲା। କାର୍ଯ୍ୟକ୍ରମର ଶେଷରେ ଅଧ୍ୟାପକ ନରେଶ ସାହୁ ସମସ୍ତଙ୍କୁ ଔପଚାରିକ ଧନ୍ୟବାଦ ଅର୍ପଣ କରିଥିଲେ।
