Delhi Metro Seat Dispute: ବୟସ୍କଙ୍କ ସିଟ୍କୁ ନେଇ ବିବାଦ, ପବନ ଶର୍ମାଙ୍କ ମୃତ୍ୟୁ ମାମଲାରେ ପୂର୍ବତନ IAS ଅଧିକାରୀ ଓ ପୁଅ ଗିରଫ
ନୂଆଦିଲ୍ଲୀ: ଦିଲ୍ଲୀ ମେଟ୍ରୋରେ ବୟସ୍କଙ୍କ ପାଇଁ ଉଦ୍ଦିଷ୍ଟ ସିଟ୍କୁ ନେଇ ହୋଇଥିବା ବିବାଦରୁ ଜଣେ ୪୮ ବର୍ଷୀୟ ବ୍ୟକ୍ତିଙ୍କ ମୃତ୍ୟୁ ହୋଇଛି | ମୃତକଙ୍କ ନାମ ପବନ ଶର୍ମା। ଅକ୍ଟୋବର ୮ରେ ସେ ନିଜ ୬୫ ବର୍ଷୀୟ ମା’ ଦୁର୍ଗା ଦେବୀଙ୍କ ସହ ଗୁରୁଗ୍ରାମରୁ ଯମୁନା ବିହାର ଯାଉଥିଲେ। ପୋଲିସରେ ଦାଖଲ ହୋଇଥିବା ଅଭିଯୋଗ ଅନୁସାରେ, ମଣ୍ଡି ହାଉସ୍ ମେଟ୍ରୋ ଷ୍ଟେସନରେ ପୂର୍ବତନ IAS ଅଧିକାରୀ ସଞ୍ଜୟ ପ୍ରତାପ ସିଂହ ଓ ତାଙ୍କ ପୁଅ ସିଦ୍ଧାର୍ଥ ସିଂହ ଟ୍ରେନ୍ରେ ଚଢ଼ିଥିଲେ। ସେମାନେ ବୟସ୍କଙ୍କ ପାଇଁ ଉଦ୍ଦିଷ୍ଟ ସିଟ୍ରୁ ପବନଙ୍କୁ ଉଠିବାକୁ କହିଥିବା ବେଳେ, ସେ ସିଟ୍ ଛାଡ଼ିବା ପରେ ମଧ୍ୟ ଉଭୟଙ୍କ ସହ ତାଙ୍କର ଯୁକ୍ତିତର୍କ ହୋଇଥିବା ଅଭିଯୋଗ ହୋଇଛି।
ଅଭିଯୋଗ ଅନୁସାରେ, ଯୁକ୍ତିତର୍କ ସମୟରେ ସଞ୍ଜୟ ପ୍ରତାପ ସିଂହ ପବନଙ୍କୁ ଚାପୁଡ଼ା ମାରିଥିବା ବେଳେ ତାଙ୍କ ପୁଅ ଛାତିରେ ମୁଥ ମାରିଥିଲେ। ପରେ ସୁପ୍ରିମକୋର୍ଟ ମେଟ୍ରୋ ଷ୍ଟେସନରେ ଓହ୍ଲାଇବା ସମୟରେ ପବନ ଅଚେତ ହୋଇ ପଡ଼ିଥିଲେ। ମେଟ୍ରୋ କର୍ମଚାରୀମାନେ ତାଙ୍କୁ ଆମ୍ବୁଲାନ୍ସରେ ଲୋକ ନାୟକ ଜୟପ୍ରକାଶ ହସ୍ପିଟାଲକୁ ନେଇଥିଲେ, ଯେଉଁଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ପବନଙ୍କ ମା’ଙ୍କ ଅଭିଯୋଗ ଆଧାରରେ ଅକ୍ଟୋବର ୯ରେ ପୋଲିସ ଭାରତୀୟ ନ୍ୟାୟ ସଂହିତାର ଧାରା ୧୦୫ ଏବଂ ୩(୫) ଅନୁସାରେ ମାମଲା ରୁଜୁ କରିଥିଲା।
ପୋଲିସ ସଞ୍ଜୟ ପ୍ରତାପ ସିଂହ ଓ ତାଙ୍କ ପୁଅ ସିଦ୍ଧାର୍ଥ ସିଂହଙ୍କୁ ଗିରଫ କରିଛି। ସଞ୍ଜୟ ପ୍ରତାପ ସିଂହ ଜଣେ ଅବସରପ୍ରାପ୍ତ IAS ଅଧିକାରୀ ହୋଇଥିବା ବେଳେ ତାଙ୍କ ପୁଅ ପେସାରେ ଜଣେ ଓକିଲ ବୋଲି ରିପୋର୍ଟରେ କୁହାଯାଇଛି। ଘଟଣା କିପରି ଘଟିଲା ଏବଂ ପବନଙ୍କ ମୃତ୍ୟୁରେ କେଉଁ ପରିସ୍ଥିତି ଦାୟୀ, ତାହା ଜାଣିବା ପାଇଁ ପୋଲିସ ତଦନ୍ତ କରୁଛି। ଏହି ଘଟଣା ମେଟ୍ରୋ ଭଳି ସାର୍ବଜନୀନ ସ୍ଥାନରେ ଛୋଟ ବିବାଦ କିପରି ଗମ୍ଭୀର ରୂପ ନେଇପାରେ, ତାହାକୁ ନେଇ ଚିନ୍ତା ବଢ଼ାଇଛି।
