ରବୀନ୍ଦ୍ର ପ୍ରସାଦ ଦାନୀ8/12/2023 at 10:00 PM
ଜମନକିରା : ପ୍ରଭାସୁଣୀ ସଂରକ୍ଷିତ ଜଙ୍ଗଲକୁ ଶୁକ୍ରବାର ଜାଳେଣି କାଠ ସଂଗ୍ରହ ପାଇଁ ଯାଇଥିବା ସମୟରେ ଜଙ୍ଗଲି ଭାଲୁ ଆକ୍ରମଣରେ ବର୍ହାମୁଣ୍ଡି ଗ୍ରାମର ଦୁଇଜଣ ବ୍ଯକ୍ତି ଗୁରୁତର ଆହତ ହୋଇଛନ୍ତି।କୁଚିଣ୍ଡା ଉପଖଣ୍ଡ ମେଡିକାଲରେ ତାଙ୍କର ପ୍ରାଥମିକ ଚିକିତ୍ସା ପରେ ବୁର୍ଲା ଭିମସାର ମେଡିକାଲକୁ ସ୍ଥାନାନ୍ତରିତ କରାଯାଇଛି।ଆହତ ମାନେ ହେଲେ ଟିକିଲିପଡା ପଞ୍ଚାୟତ ବର୍ହାମୁଣ୍ଡି ଗ୍ରାମର ଜେରା କିଷାନ(୬୦) ଓ ପରେଶ ମାଝି (୫୮)।
ସୂଚନା ଅନୁଯାୟୀ ଜମନକିରା ଫରେଷ୍ଟ ସେକ୍ସନ ଅଧିନସ୍ଥ ପ୍ରଭାସୁଣୀ ସଂରକ୍ଷିତ ଜଙ୍ଗଲକୁ ଶୁକ୍ରବାର ଅପରାହ୍ନରେ ଜାଳେଣି କାଠ ସଂଗ୍ରହ ପାଇଁ ଜେରା ଓ ପରେଶ ଯାଇଥିଲେ।କାଠ ସଂଗ୍ରହ କରୁଥିବା ସମୟରେ ହଠାତ ଏକ ଜଙ୍ଗଲି ଭାଲୁ ଜେରା କିଷାନଙ୍କୁ ଆକ୍ରମଣ କରିଥିଲା।ଜେରା ଚିତ୍କାର କରିବାରୁ ପରେଶ ଦୌଡି ଆସି ଛଡାଇବାକୁ ଉଦ୍ୟମ କରିବା ବେଳେ ସେ ମଧ୍ଯ ଭାଲୁ ଆକ୍ରମଣର ଶିକାର ହୋଇଥିଲେ।ଭାଲୁ ଆକ୍ରମଣରେ ଜେରାଙ୍କ ଦୁଇ ଗୋଡ ଭାଙ୍ଗି ଯାଇଥିବା ବେଳେ ପରେଶଙ୍କ ଛାତି ଓ ଗୋଡରେ ଆଘାତ ଲାଗିଛି।ଖବରପାଇ ଫରେଷ୍ଟର ସୁନୀତା ନାୟକ ବର୍ହାମୁଣ୍ଡି ଗ୍ରାମକୁ ଯାଇ ଆହତ ଦ୍ବୟଙ୍କୁ ଚିକିତ୍ସା ପାଇଁ କୁଚିଣ୍ଡା ମେଡିକାଲକୁ ଆଣିଥିଲେ। ସରକାରଙ୍କ ବ୍ୟବସ୍ଥା ମୁତାବକ ଆହତ ଦ୍ବୟଙ୍କୂ ସହାୟତା କରାଯିବ ବୋଲି ଫରେଷ୍ଟର ଶ୍ରୀମତୀ ନାୟକ କହିଛନ୍ତି।