ରାଜାରାମ ଷଡଙ୍ଗୀ

5/04/2024 at 6:45 PM

ସମ୍ବଲପୁର,(ରାଜାରାମ ଷଡଙ୍ଗୀ ): ସମ୍ବଲପୁର ଜିଲ୍ଲାର ୪ ବିଧାନସଭା ଆସନରେ ବିଜେପି ତାର ପ୍ରାର୍ଥୀ ଦେଇ ଓଲ୍ଲେଇ ସାରିଲାଣି ନିର୍ବାଚନୀ ମୈଦାନକୁ।ହେଲେ ବିଜେପିର ମୁଖ୍ୟ ପ୍ରତିଦ୍ବନ୍ଦ୍ବୀ ବିଜେଡି ତାର ପ୍ରାର୍ଥୀ କରିପାରିନି ଫାଇନାଲ୍ ।କୁହାଯାଉଛି ଅକଲରେ ପଡିଛି ବିଜେଡି।ଆଉ ବିଳମ୍ଭ ଯୋଗୁଁ ଦାଣ୍ଡରେ ପଡି ହାଟରେ ଗଜୁଛି ବିଜେଡିର ଗୋଷ୍ଠୀ କନ୍ଦଳ।ସମ୍ବଲପୁର ଆସନରେ ୨ ଗୋଷ୍ଠୀର ବଳ କଷାକଷି ରେ ତୃତୀୟ ପକ୍ଷବି ଆସିଲେଣି ପଶି।ଗତକାଲି ଏଭଳି ଦୃଶ୍ୟ ସାମ୍ନାକୁ ଆସିଛି। ଡାକ୍ତର ଇଂଜିନିୟର ୨ ଗୋଷ୍ଠୀ ଭିତରେ ଆଉ ଜଣେ ଇଂଜିନିୟରଙ୍କ ସମର୍ଥକ ରାସ୍ତାକୁ ଓଲ୍ଲେଇ ଟିକଟ ଦାବି କଲେଣି। ସମ୍ବଲପୁର ଆସନରୁ ଡା.ରାସେଶ୍ବରୀ ପାଣିଗ୍ରାହୀ ଓ ଇଂ.ରୋହୀତ ପୂଝାରୀ ନିଜ ନିଜ ପ୍ରାର୍ଥୀ ପାଇଁ ଦଳବଳ ସହ ଅନବରତ କସରତରେ ଲାଗିଥିବା ବେଳେ ଦୀର୍ଘ ବର୍ଷ ଧରି ବିଧାୟକ ସ୍ୱପ୍ନ ଦେଖୁଥିବା ବିଜେଡିର ପୁର୍ବତନ ଜିଲ୍ଲା ସଭାପତି ଇଂ.ସିଦ୍ଧର୍ଥ ଦାସ ମଧ୍ୟ ପଛରେ ପଡିନାହାଁନ୍ତି।ଗତକାଲି ତାଙ୍କ ପାଇଁ ମଧ୍ୟ ଦାବି ଉଠିଛି।ଏମିତିରେ ଆହୁରି ଅନେକ ଏହି ଆଶାୟୀ ତାଲିକାରେ ରହିଛନ୍ତି।ଆଶାୟୀଙ୍କୁ ମ୍ୟାନେଜ କରିବାରେ ବିଜେଡି କିନ୍ତୁ ବିଫଳ ହୋଇଛି। ବିଜେଡିର ସଂଗଠନ ସଂପାଦକ ତଥା ସମ୍ବଲପୁର ପର୍ଯ୍ୟବେକ୍ଷକ ପ୍ରଣବ ପ୍ରକାଶ ଦାଶ ଓରଫ ବବି ଭାଇ ସମ୍ବଲପୁର ଲୋକସଭା ଆସନରେ ପ୍ରାର୍ଥୀ ହୋଇ ଥିବାରୁ ଅତି ସୁରୁଖୁରୁରେ ଏହାର ସରଳ ସମାଧାନ ହେବ ବୋଲି ଆଶା କରାଯାଉଥିଲା।କିନ୍ତୁ ବର୍ତ୍ତମାନ ଏହା ବିଷମରେ ପରିଣତ ହୋଇଛି।ଲାଗି ରହିଥିବା ଏହି ଗୋଷ୍ଠୀ କନ୍ଦଳ ବବି ଭାଇଙ୍କ ଉପରେ ଭାରି ପଡିବ ନାହିଁତ ? କାହିଁ ସେଭଳି ଅନୁମାନ କରାଯାଉଛି। କାରଣ ଜିଲ୍ଲା ସାରା ୪ ବିଧାନସଭା ଆସନରେ ପ୍ରାର୍ଥୀଙ୍କ ଭାଗ୍ୟ ସର୍ଭେ ରିପୋର୍ଟରେ ଝୁଲୁଥିବା କୁହାଯାଉଛି।ସମ୍ବଲପୁର ଲୋକସଭାରେ ହେଭିୱେଟ ବିଜେପିର ଧର୍ମେନ୍ଦ୍ର ପ୍ରଧାନ ଓ ବିଜେଡିର ପ୍ରଣବ ପ୍ରକାଶ ଦାଶ ମଧ୍ୟରେ ହେଉଥିବାରୁ ସାରା ଭୋଟରଙ୍କ ଆଖି ନିଜ ବିଧାନସଭା ଆସନ ଉପରେ।
ସମ୍ବଲପୁର ପରି ରେଢାଖୋଲରେ ମଧ୍ୟ ବିଧାୟକ ଇଂ.ରୋହୀତଙ୍କ ଦାବି ରହିଛି। ସମ୍ବଲପୁର ନହେଲେ ରେଢାଖୋଲ ଆସନ ଦେବାକୁ ଦଳବଳ ସହ ସେ ଲବି ରଖିଛନ୍ତି।ଏପଟେ ରେଢାଖୋଲର ପୁର୍ବତନ ବିଧାୟକ ପ୍ରଶନ୍ନ ଆଚାର୍ଯ୍ୟ ମଧ୍ୟ ରେଢାଖୋଲ ପାଇଁ ଆଶାୟୀ।ସେପଟେ କିନ୍ତୁ ସ୍ଥାନୀୟ ନେତା ଏଭଳି ଆଶାୟୀଙ୍କ ଉପରେ ଆଉ ଭରସା କରି ପାରୁନାହାଁନ୍ତି।ନାକଟିେଉଲରୁ ରେଢାଖୋଲ ଯୁଯୋମୁରା ମାନେଶ୍ୱର ଯାଏ କେବଳ ଦଳ କାହିଁ ସାଧାରଣ ଜନତା ମଧ୍ୟ ସ୍ଥାନୀୟ ନେତୃତ୍ୱ ଉପରେ ଏକଜୁଟ୍ ହୋଇଛନ୍ତି। ଆମଦାନି ନେତାଙ୍କ ପାଇଁ ରେଢାଖୋଲ କ୍ରମଶଃ ରାଜନୈତିକ ଶୂନ୍ୟତା ଆଡକୁ ଗତି କରୁଥିବା ଯୋଗୁଁ ବାହାର ନେତା ଉପରେ ନିର୍ବାଚନ ମଣ୍ଡଳୀର ଆଉ ଭରସା ପାଉନି।ରେଙ୍ଗାଲିରେ ଅବଶ୍ୟ ଧନକଉଦା ଜିଲ୍ଲାପରିଷଦ ସଭ୍ୟ ସୁଦର୍ଶନ ହରିପାଲଙ୍କୁ ବିଜେଡି ପ୍ରାର୍ଥୀ କରି ଗୋଟିଏ ପାଦ ଆଗକୁ ବଢ଼ିଛି। ପଡୋଶି କୁଚିଣ୍ଡା ଆସନରେ ବର୍ତ୍ତମାନ ବିଜେଡିର କିଶୋର ନାଏକ ଷ୍ଟାର୍ଣ୍ଣଙ୍ଗ ବିଧାୟକ ଥାଇବି ଆଶାୟୀଙ୍କ ଲମ୍ବାଧାଡି ଭିତରେ ଦଳଡିଆଁର ବି ଦାବି ଉଠିଲାଣି ।୪ ବିଧାନସଭା ଆସନରେ ପ୍ରାର୍ଥୀକୁ ନେଇ ଚାଲିଛି ଟଣାଟଣି।ଆଶାୟୀଙ୍କ ଚିନ୍ତାବି ବଢ଼ାଇଛି ଏହି ଟଣା ଓଟରା। ବିଜେଡି ଦଳର ସଭାପତି,ଉପ ସଭାପତି,ସାଧାରଣ ସଂପାଦକ,ସଂପାଦକ, ସଂଯୋଜକ,ଉପଦେଷ୍ଟା ସହିତ ଯୁବ,ଛାତ୍ର, ମହିଳା ଭଳି ବହୁ ୱିଙ୍ଗର ଏତେ ନେତା ଥାଇବି ସମନ୍ୱୟତାର ଏତେ ଅଭାବ କାହିଁକି ଏହା କାହାକୁ ଅଛପା ନାହିଁ।କ୍ଷମତା ପାଇଁ ମାଳମାଳ ନେତା ସିନା କିନ୍ତୁ ନେତୃତ୍ୱ ଶୂନ୍ୟ ସମ୍ବଲପୁର ଜିଲ୍ଲାକୁ ରାଜ୍ୟ ସଂଗଠନ ସଂପାଦକ ତଥା ଜିଲ୍ଲା ପର୍ଯ୍ୟବେକ୍ଷକ ପ୍ରଣବ ପ୍ରକାଶ ନିଜ ଲୋକସଭା ଆସନକୁ କେମିତି ମ୍ୟାନେଜ କରିବେ ତାହାବି ଏକ ବଡ ଚିନ୍ତା।ଏଭଳି ଚିନ୍ତା ଭିତରେ କିନ୍ତୁ ୪ ବିଧାନସଭା ଆସନର ପ୍ରାର୍ଥୀକୁ ନେଇ ବିଜେଡିର ଭବିଷ୍ୟତ ନିର୍ଭର କରୁଛି।ଅଭିମାନ,ସ୍ୱାଭିମାନ,ସଚେତନତା,ଭାଇ ଭାଗ ଭଳି ବିଭିନ୍ନ କାରଣ ଓ ପରିସ୍ଥିତିକୁ ନେଇ ଭୋଟରବି ଖୁବ ଆଗରେ।ବର୍ତ୍ତମାନର ପରିସ୍ଥିତିରେ କଂଗ୍ରେସକୁ ମଧ୍ୟ ଏତେ ଦୂର୍ବଳ ଭାବିବା ଠିକ୍ ହେବନାହିଁ ।ଅବଶ୍ୟ ଯୋ ଜିତେ ଓ୍ୱେ ସିକନ୍ଦର୍ ହୋଇପାରନ୍ତି କିନ୍ତୁ ଏହି ନିର୍ବାଚନରେ ବହୁ ସ୍ଥାନରେ ସ୍ୱାଧିନ ପ୍ରାର୍ଥୀ ଛିଡା ହୋଇ ରାଜନୈତିକ ଗୋଟିଚାଳନାରେ ସମିକରଣ ବଦଳି ନଯିବ ତାକୁବି ଅସ୍ୱୀକାର କରିବା ଠିକ୍ ହେବ ନାହିଁ।