ଓଡ଼ିଶା ଡଟ୍ ନ୍ୟୁଜ୍

13/06/2024 at 1:20 PM

ଆନନ୍ଦପୁର: ନିର୍ବାଚନ ସରି ମୁଖ୍ୟମନ୍ତ୍ରୀ ଶପଥ ନେଇ ସାରିଲେଣି । ହେଲେ ରାଜ୍ୟରେ ନିର୍ବାଚନ ପରବର୍ତ୍ତୀ ହିଂସା ଥମିବାର ନାଁ ନେଉନି । ବିଜେଡି କର୍ମୀଙ୍କ ଆକ୍ରମଣରେ ୫ ଜଣ ବିଜେପି କର୍ମୀ ଗୁରୁତର ଆହତ ହୋଇଛନ୍ତି । ଘଟଣା ଘଟିଛି କେନ୍ଦୁଝର ଜିଲ୍ଲା ଆନନ୍ଦପୁର ନିର୍ବାଚନ ମଣ୍ଡଳୀର ଧନୁଜୟପୁର ଗାଁରେ । ଆହତଙ୍କୁ ଆଗରପଡା ଡ଼ାକ୍ତରଖାନାରେ ଭର୍ତ୍ତି କରାଯାଇଛି ।

ଆହତ ବିଜେପି କର୍ମୀମାନେ ହେଲେ ବିଶ୍ୱଜିତ ରାଉତ, ନାରାୟଣ ସାମଲ, ଅଶୋକ ଜେନା, ଗାଙ୍ଗୁଲି ବିରୁଆ ଏବଂ ଦୁର୍ଯ୍ୟୋଧନ ସାମଲ । ବିଶ୍ୱଜିତଙ୍କ ହାତ, ମୁଣ୍ଡ, ପିଠିରେ ଗଭୀର କ୍ଷତ ହୋଇଥିବା ବେଳେ ଗାଙ୍ଗୁଳିଙ୍କ ମୁଣ୍ଡ ଓ ପିଠି, ଅଶୋକଙ୍କ ମୁଣ୍ଡରେ ଗଭୀର କ୍ଷତ ହୋଇଛି । ସେହିପରି ଦୁର୍ଯ୍ୟୋଧନ ଶରୀରରେ ଧନୁତୀର ପଶିଯାଇଛି । ତାଙ୍କ ଅବସ୍ଥା ଗୁରୁତର ରହିଛି ।

ରାଜ୍ୟରେ ବିଜେପି ସରକାର ଗଠନ ପରେ ଧନୁଜୟପୁରଠାରେ ବିଜେପି କର୍ମୀମାନେ ବାଣ ଫୁଟାଇ ଖୁସି ମନାଉଥିଲେ। ଏହି ସମୟରେ ବିଜେଡିର କିଛି ସମର୍ଥକମାନେ ପହଞ୍ଚି ଏପରି କରିବାକୁ ବାରଣ କରିଥିଲେ । ଏହାକୁ ନେଇ ଉଭୟ ପକ୍ଷ ମଧ୍ୟରେ ବଚସା ହୋଇଥିଲା । ପରେ ବିଜେଡି କର୍ମୀମାନେ କତା ଓ ଧନୁତୀରରେ ବିଜେପି କର୍ମୀଙ୍କୁ ଆକ୍ରମଣ କରିଥିଲେ । ଆହତମାନଙ୍କୁ ପ୍ରଥମେ ଆଗରପଡ଼ା ଡାକ୍ତରଖାନାରେ ଭର୍ତ୍ତି କରାଯାଇଥିଲା । ଜଣଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ କଟକ ସ୍ଥାନାନ୍ତର କରାଯାଇଛି।