ସୌମିତ୍ରି ମେହେର

21/06/2024 at 8:21 PM

ବୀରମହାରାଜପୁର : (ସୌମିତ୍ରି ମେହେର)
ସୁବର୍ଣ୍ଣପୁର ଜିଲ୍ଲା ଉଲୁଣ୍ଡା ବ୍ଲକ ଅନ୍ତର୍ଗତ କୋଟ୍ ସମଲେଇ ସ୍ଥିତ ପାତାଳୀ ଶ୍ରୀକ୍ଷେତ୍ର ରେ ମହାପ୍ରଭୁ ଶ୍ରୀ ଜଗନ୍ନାଥଙ୍କ ପବିତ୍ର ସ୍ନାନଯାତ୍ରା ପାଇଁ ନୀତି ନିର୍ଦ୍ଧାରଣ ସ୍ଥିର ହୋଇଛି I ଆସନ୍ତାକାଲି 22 ତାରିଖ ଶନିବାର ସକାଳ 5 ଟl ସମୟରେ ମଙ୍ଗଳ ଆଳତି ଅନୁଷ୍ଠିତ ହେବ I ସକାଳ 9 ଘ. ରୁ ଧାଡ଼ି ପହଣ୍ଡିରେ ଠାକୁର ସ୍ନାନ ମଣ୍ଡପ କୁ ବିଜେ କରିବେ I ପୂର୍ବାହ୍ନ 11 ଘ. ରୁ ଶ୍ରୀ ଜୀଉ ମାନଙ୍କ ମହାସ୍ନାନ ଆରମ୍ଭ ହେବ l ସୁବର୍ଣ୍ଣ କୂଅ ର 108 ଗରା ସୁବାସିତ ଜଳରେ ଠାକୁରଙ୍କ ସ୍ନାନ ରୀତି ସମାପନ ହେବ I ଅପରାହ୍ନ ଗୋଟାଏ ରୁ ମହାପ୍ରଭୁଙ୍କ ଗଜାନନ ବେଶ ଅନୁଷ୍ଠିତ ହେବ ବୋଲି ମନ୍ଦିର କମିଟି ପକ୍ଷରୁ ସୂଚନା ଦିଆଯାଇଛି I ଅପରାହ୍ନ 4 ଟl ସମୟରେ ଠାକୁରଙ୍କ ଅଣସର ବିଜେ ଅନୁଷ୍ଠିତ ହେବ I ପୁରୀ ଶ୍ରୀମନ୍ଦିରର ରୀତିନୀତି ଅନୁସାରେ ଏଠାରେ ସମସ୍ତ ପୂଜା କାର୍ଯ୍ୟ ଅୟୋଜିତ ହେଉଥିବା ବେଳେ ସ୍ନାନପୂର୍ଣ୍ଣିମା ଦିନ ଜିଲ୍ଲା ତଥା ଜିଲ୍ଲା ବାହାରୁ ବହୁ ଶ୍ରଦ୍ଧାଳୁ ଭକ୍ତଙ୍କ ସମାଗମ ହେବା ଅନୁମାନ କରାଯାଉଛି I