ଓଡ଼ିଶା ଡଟ୍ ନ୍ୟୁଜ୍

25/06/2024 at 11:50 AM

କନ୍ଧମାଳ: ଯୁବତୀଙ୍କୁ ଭଲ ପାଇଲେ । ମିଠା ମିଠା କଥା କହିବା ସହ ସଂସାର ଗଢ଼ିବାର ସ୍ବପ୍ନ ଦେଖାଇ ଶାରିରୀକ ସମ୍ପର୍କ ରଖିଲେ । ଆଉ ବିବାହ ସମୟ ଆସିବା ପରେ ଧରାଛୁଆଁ ଦେଲେ ନାହିଁ । କନ୍ଧମାଳ ଜିଲ୍ଲା ଫିରିଙ୍ଗିଆ ଥାନା ଅଞ୍ଚଳରୁ ଆସିଛି ଏମିତି ଏକ ଲଭ-ସେକ୍ସ-ଧୋକା ଅଭିଯୋଗ । ଏତଲା ପରେ ରସିକିଆ ପ୍ରେମିକଙ୍କୁ ବାନ୍ଧିଛି ପୋଲିସ । ଗିରଫ ଅଭିଯୁକ୍ତ ହେଲେ ପ୍ରିୟରଞ୍ଜନ ଦିଗାଲ । ତାଙ୍କ ଘର ପବିଙ୍ଗିଆ ଗ୍ରାମରେ ।

ଫିରିଙ୍ଗିଆ ବଜାରରେ ପ୍ରିୟରଞ୍ଜନଙ୍କର ଗୋଟିଏ Online Service Center ରହିଛି । ଯୁବତୀଙ୍କ ସହ ତାଙ୍କର ସେହିଠାରେ ଦେଖା ହୋଇଥିଲା । ପରେ ଉଭୟଙ୍କ ମଧ୍ୟରେ ସଂପର୍କ ବଢ଼ିଥିଲା । ବିବାହର ପ୍ରତିଶ୍ରୁତି ଦେଇ ପ୍ରିୟରଞ୍ଜନ ଯୁବତୀଙ୍କ ସହ ଶାରିରୀକ ସମ୍ପର୍କ ରଖିଥିଲେ । ଫଳରେ ଯୁବତୀ ଜଣଙ୍କ ଗର୍ଭବତୀ ହୋଇଥିଲେ ।

ଯୁବତୀ ଏ ସମ୍ପର୍କରେ ପ୍ରିୟରଞ୍ଜନଙ୍କୁ ଜଣାଇବା ସହ ବିବାହ କରିବାକୁ କହିଥିଲେ । ହେଲେ ପ୍ରିୟରଞ୍ଜନ ବିଭିନ୍ନ ବାହାନା କରି ବିବାହ କଥାକୁ ଟାଳି ଦେବା ସହିତ ଯୁବତୀକୁ ମେଡ଼ିସିନ ଦେଇ ଗର୍ଭପାତ କରାଇଥିଲେ । ଗର୍ଭପାତ କରିବାର କିଛି ଦିନ ପରେ ଆଉ ପ୍ରିୟରଞ୍ଜନଙ୍କ ଦେଖା ମିଳି ନଥିଲା । ପରେ ଯୁବତୀ ଜଣଙ୍କ ଥାନାରେ ଦ୍ୱାରସ୍ଥ ହୋଇଥିଲେ । ପୋଲିସ ଘଟଣାର ତଦନ୍ତ କରି ପ୍ରିୟରଞ୍ଜନଙ୍କୁ ଗିରଫ କରିଛି ।