ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ27/06/2024 at 1:48 PM
ନୂଆଦିଲ୍ଲୀ: ଆଜି ଟି-୨୦ ବିଶ୍ୱକପର ଦ୍ୱିତୀୟ ସେମି ଫାଇନାଲରେ ମୁହାଁମୁହିଁ ହେବେ ଦୁଇ ଶକ୍ତିଶାଳୀ ଦଳ ଭାରତ ଓ ଇଂଲଣ୍ଡ । ଏହି ହାଇଭୋଲଟେଜ୍ ମ୍ୟାଚ୍ ଗୁଏନାର ପ୍ରୋଭିଡେନ୍ସ ଷ୍ଟାଡିୟମରେ ଭାରତୀୟ ସମୟ ରାତି ୮ଟାରେ ଖେଳାଯିବ । ଗତ ୨୦୨୨ ଟି-୨୦ ବିଶ୍ୱକପର ସେମି ଫାଇନାଲରେ ଇଂଲଣ୍ଡ ଭାରତକୁ ଶୋଚନୀୟ ଭାବେ ପରାସ୍ତ କରି ଟୁର୍ଣ୍ଣାମେଣ୍ଟରୁ ବାହାର କରି ଦେଇଥିଲା । ଆଉ ଏବେ ଉକ୍ତ ପରାଜୟର ପ୍ରତିଶୋଧ ନେବା ପାଇଁ ରୋହିତ ବାହିନୀଙ୍କ ନିକଟରେ ସୁବର୍ଣ୍ଣ ସୁଯୋଗ ରହିଛି । ଆଉ ଗତ ଏକ ଦଶନ୍ଧି ଧରି ନକଆଉଟରେ ପରାଜିତ ହେଉଥିବା ଭାରତୀୟ ଦଳକୁ ଏହି ଟ୍ୟାଗ ହଟାଇବାକୁ ପଡିବ ।
ଗତ ଯେବେ ଦୁଇ ଦଳ ମଧ୍ୟରେ ସେମି ଫାଇନାଲ୍ ମ୍ୟାଚ୍ ଖେଳା ଯାଇଥିଲା, ସେହି ସମୟରେ ଭାରତକୁ ୧୦ ୱିକେଟ୍ରେ ହରାଇଥିଲା ଇଂଲଣ୍ଡ । ଏବେ ପ୍ରୋଭିଡେନ୍ସ ଷ୍ଟାଡିୟମରେ ସମ୍ଭାବିତ ପରିସ୍ଥିତିକୁ ଦେଖି କାଗଜ କଲମରେ ଭାରତୀୟ ଦଳ ମଜବୁତ ଲାଗୁଛି ଏବଂ ପ୍ରତିଶୋଧ ନେବା ପାଇଁ ମଧ୍ୟ ପ୍ରସ୍ତୁତ । ଏହି ପିଚ୍ ସ୍ପିନ ଉପଯୋଗୀ ହୋଇଥିବାରୁ ଭାରତର କୁଲଦୀପ ଯାଦବ ଓ ଇଂଲଣ୍ଡର ଆଦିଲ ରଶିଦଙ୍କ ଉପରେ ସଭିଙ୍କ ନଜର ରହିବ ।
ଜୁନ ୮ ପରେ ଏହି ଷ୍ଟାଡିୟମରେ କୌଣସି ମ୍ୟାଚ୍ ଖେଳା ଯାଇ ନାହିଁ । ତେଣୁ ଏହି ହାଇଭୋଲଟେଜ୍ ମ୍ୟାଚ୍ ପାଇଁ ପିଚ୍ ପ୍ରସ୍ତୁତ କରିବାକୁ ପିଚ୍ କ୍ୟୁରେଟରଙ୍କ ପାଖରେ ଅତିରିକ୍ତ ସମୟ ମିଳିଛି । ଭାରତ ଓ ଇଂଲଣ୍ଡ ଦମଦାର ପ୍ରଦର୍ଶନ କରି ସେମିରେ ପହଞ୍ଚିଛି । କିନ୍ତୁ ଇଂଲଣ୍ଡ ପରାଜୟର ସ୍ୱାଦ ଚାଖିଥିବା ବେଳେ ଭାରତ ଏ ପର୍ଯ୍ୟନ୍ତ ଅପରାଜୟ ରହିଛି । ତେବେ ଭାରତ ସର୍ବଦା ସେମି ଫାଇନାଲରେ ଅତ୍ୟଧିକ ଚାପରେ ଅନେକ ତ୍ରୁଟି କରି ଆସିଛି ।
ଦୁଇ ଦଳ ମଧ୍ୟରେ ଅଦ୍ୟାବଧି ମୋଟ୍ ୨୩ଟି ଟି-୨୦ ମ୍ୟାଚ୍ ଖେଳା ଯାଇଛି । ଏଥିରୁ ଭାରତ ୧୨ ଏବଂ ଇଂଲଣ୍ଡ ୧୧ଟି ମ୍ୟାଚ୍ ଜିତିଛି । ଅର୍ଥାତ ଦୁଇ ଦଳ ବରାବର ସ୍ଥିତିରେ ରହିଛନ୍ତି । ଆଜିର ମ୍ୟାଚରେ ଭାରତୀୟ ଦଳର ତାରକା ବ୍ୟାଟର ବିରାଟ କୋହଲିଙ୍କଠୁ ବଡ ଇନିଂସ ଆଶା କରାଯାଉଛି । କାରଣ ସେ ଏ ପର୍ଯ୍ୟନ୍ତ ଟୁର୍ଣ୍ଣାମେଣ୍ଟରେ ନିଜର ଖ୍ୟାତି ଅନୁସାରେ ବ୍ୟାଟିଂ କରିବାରେ ବିଫଳ ହୋଇଛନ୍ତି । ରୋହିତଙ୍କଠୁ କ୍ରିକେଟ୍ ପ୍ରେମୀ ଆଉ ଏକ ବିସ୍ଫୋରକ ଇନିଂସ ଆଶା ରଖିଛନ୍ତି ।
ଭାରତ ଏହି ମ୍ୟାଚରେ ବିନା ପରିବର୍ତ୍ତନରେ ମଇଦାନକୁ ଓହ୍ଲାଇପାରେ । ତେବେ ଦଳ ପାଖରେ ଲେଗ୍ ସ୍ପିନର ୟୁଜବେନ୍ଦ୍ର ଚହଲ ରହିଛନ୍ତି । ଯିଏ ଇଂଲଣ୍ଡର ଫିଲ୍ ସଲ୍ଟ, ଜୋସ୍ ବଟଲର, ହ୍ୟାରି ବ୍ରୁକ ଓ ଜୋନି ବେୟାରଷ୍ଟୋଙ୍କ ପରି ଡାହାଣହାତୀ ବ୍ୟାଟରଙ୍କ ବିପକ୍ଷରେ ଉପଯୋଗୀ ସାବ୍ୟସ୍ତ ହୋଇ ପାରନ୍ତି ।
ଚହଲଙ୍କୁ ଏ ପର୍ଯ୍ୟନ୍ତ ଖେଳିବାକୁ ସୁଯୋଗ ମିଳିନି ଏବଂ ଆଗକୁ ଏହା ମଧ୍ୟ ଜାରି ରହିପାରେ । କାରଣ ଭାରତ ପାଖରେ ରବୀନ୍ଦ୍ର ଜାଡେଜା, ଅକ୍ଷର ପଟେଲ ଓ କୁଲଦୀପ ଯାଦବଙ୍କ ପରି ସ୍ପିନ ବୋଲର ଅଛନ୍ତି । ତେବେ ଆଜିର ମ୍ୟାଚରେ ରୋହିତ ଶର୍ମା ଓ ବିରାଟ କୋହଲିଙ୍କୁ ହଇରାଣରେ ପକାଇ ପାରନ୍ତି ଜୋଫ୍ରା ଆର୍ଚର । ଏମାନଙ୍କ ମଧ୍ୟରେ ଆଜି କଡା ଟକ୍କର ଦେଖିବାକୁ ମିଳିପାରେ ।