ଓଡ଼ିଶା ଡଟ୍ ନ୍ୟୁଜ୍ ବ୍ୟୁରୋ

27/06/2024 at 2:40 PM

ନୂଆଦିଲ୍ଲୀ: ନିଟ୍ ପେପର ଲିକ୍ ମାମଲା ଓ ରେଜଲ୍ଟକୁ ନେଇ ବିବାଦ ଜାରି ରହିଛି । ଏହା ମଧ୍ୟରେ ମୁଖ୍ୟ ଅଭିଯୁକ୍ତ ଗଙ୍ଗାଧରକୁ ଗିରଫ କରିଛି ଉତ୍ତରାଖଣ୍ଡ ପୋଲିସ । ଏହି ସୂଚନା ଦେଇଛନ୍ତି ଖୋଦ୍ ଗଙ୍ଗାଧରଙ୍କ ପତ୍ନୀ । ଉତ୍ତରାଖଣ୍ଡ ପୋଲିସ ତାଙ୍କ ସ୍ୱାମୀଙ୍କୁ ନିଜ ହେପାଜତକୁ ନେଇଥିବା ସେ କହିଛନ୍ତି ।

ସେ ଜାତୀୟ ଗଣମାଧ୍ୟମ ସହ ଆଲୋଚନା ବେଳେ କହିଛନ୍ତି, ସ୍ୱାମୀଙ୍କୁ ଜୁନ ୨୫ ତାରିଖ ସକାଳ ୯ଟା ୩୦ରେ ପୋଲିସ ନେଇ ଯାଇଛି । ଏହା ପରଠୁ ତାଙ୍କ ସହ ମୋର ଯୋଗାଯୋଗ ହୋଇ ପାରି ନାହିଁ । ମୋତେ ଜଣା ନାହିଁ ସ୍ୱାମୀ ଏବେ କେଉଁଠି ଅଛନ୍ତି । ସେ ହିରୋ କମ୍ପାନୀରେ କର୍ମଚାରୀ ଭାବେ କାମ କରନ୍ତି । ଏହି ଘଟଣା ବିଷୟରେ ମୋତେ କିଛି ଜଣା ନାହିଁ ।

ଅଭିଯୋଗ ଅନୁସାରେ ଗଙ୍ଗାଧର ଗୁଣ୍ଡେ ବିହାରର କିଛି ଲୋକଙ୍କ ସଂପର୍କରେ ଥିଲା । ସେ ପେପର ଲିକ୍ କରାଇବାରେ ମୁଖ୍ୟ ଭୂମିକା ନିଭାଇଛି । ପେପର ଲିକ୍ ଘଟଣା ପୁରା ଦେଶକୁ ଦୋହଲାଇ ଦେଇଛି । ଅନେକ ଅଭିଯୁକ୍ତଙ୍କୁ ପୋଲିସ ଗିରଫ କରି ସାରିଲାଣି । ସିବିଆଇ ତଦନ୍ତ ଦାୟିତ୍ୱ ନିଜ ହାତକୁ ନେଇଛି । ବିଭିନ୍ନ ଦଳରେ ସିବିଆଇ ଚଢାଉ ଜାରି ରଖିଛି । କେନ୍ଦ୍ରୀୟ ଶିକ୍ଷା ମନ୍ତ୍ରଣାଳୟର ନିର୍ଦ୍ଦେଶରେ ସିବିଆଇ କେସ୍ ରୁଜୁ କରିବା ସହ ତଦନ୍ତ ଜୋରଦାର କରିଛି । ଏହି ମାମଲାରେ ବିରୋଧୀ ଶାସକ ବିଜେପିକୁ ଘେରିବାରେ ଲାଗିଛି । ରାଜନୀତି ଚରମରେ ପହଞ୍ଚିଛି ।