ରାଜାରାମ ଷଡଙ୍ଗୀ23/02/2025 at 8:25 PM
ସମ୍ବଲପୁର:ଆଗକୁ ରବି ଧାନ କିଣା ପାଇଁ ଚାଷୀ ପଞ୍ଜିକରଣ ହେବାକୁ ଯାଉଛି I କିନ୍ତୁ ଏହି ସମୟରେ ସମବାୟ ସମିତି କର୍ମଚାରୀମାନେ କାର୍ଯ୍ୟବନ୍ଦ ଆନ୍ଦୋଳନ କରିବା ପାଇଁ ସଜବାଜ ହେଉଛନ୍ତି I ପଶ୍ଚିମ ଓଡିଶା ପ୍ରାଥମିକ ଓ ବୃହଦାକାର କୃଷି ସମବାୟ ସମିତି କର୍ମଚାରୀ ସଙ୍ଘର ଏକ ମହତ୍ତ୍ୱପୂର୍ଣ୍ଣ ବୈଠକ ସଙ୍ଘର ସଭାପତି ତଥା ପୂର୍ବତନ ରେଙ୍ଗାଲି ବିଧାୟକ ଶ୍ରୀ ନାଉରୀ ନାୟକଙ୍କ ସଭାପତିତ୍ୱରେ ସମ୍ବଲପୁରର ହୋଟେଲ ହରିଜିତ ରେସିଡେନ୍ସିଠାରେ ଅନୁଷ୍ଠିତ ହୋଇ ଯାଇଅଛି I ଏହି ବୈଠକରେ ସମବାୟ କର୍ମଚାରୀଙ୍କ ବିଭିନ୍ନ ସମସ୍ୟାମାନଙ୍କ ଉପରେ ଆଲୋଚନା କରାଯାଇଥିଲା I ମୁଖ୍ୟତଃ କର୍ମଚାରୀମାନଙ୍କୁ ସପ୍ତମ ବେତନ ହାରରେ ଦରମା ଦେବା ଉପରେ ଆଲୋଚନା କରାଯାଇଥିଲା I ସପ୍ତମ ବେତନ ହାରରେ ଦରମା ନେଇ ନିବନ୍ଧକ, ସମବାୟ ସମିତି ସମୂହ, ଓଡିଶା ଗତ ତା.୨୭/୦୨/୨୦୨୫ ରେ ପତ୍ର ସଂଖ୍ୟ.୨୭୩୯ରେ କେବଳ ଅଡିଟ କେଟେଗୋରୀ-ଏ ଶ୍ରେଣୀର ସମବାୟ ସମିତିର କର୍ମଚାରୀମାନେ ସପ୍ତମ ବେତନ ହାରରେ ଦରମା ନେବା ପାଇଁ ଉପ-ନିବନ୍ଧକ, ସମବାୟ ସମିତି ସମୂହମାନଙ୍କୁ ନିର୍ଦ୍ଦେଶ ଦେଇଅଛନ୍ତି I ଏହି ପତ୍ରଉପରେ ସଙ୍ଘର ସଦସ୍ୟମାନେ ଅଦ୍ୟ ବୈଠକରେ କ୍ଷୋଭ ପ୍ରକାଶ କରିଥିଲେ I ଗତ ବର୍ଷ ମାର୍ଚ୍ଚ ମାସରେ ସମବାୟ ସମିତି କର୍ମଚାରୀଙ୍କ କାର୍ଯ୍ୟ ବନ୍ଦ ଆନ୍ଦୋଳନ ସମୟରେ ସରକାର କର୍ମଚାରୀମାନଙ୍କ ବିଭିନ୍ନ ଦାବୀମାନଙ୍କ ଉପରେ ସକାରାତ୍ମକ ବିଚାର କରିବେ ବୋଲି ପ୍ରତିଶୃତି ଦେଇଥିବାରୁ କର୍ମଚାରୀମାନେ କାର୍ଯ୍ୟବନ୍ଦ ଆନ୍ଦୋଳନକୁ ସ୍ଥଗିତ ରଖିଥିଲେ I ଏହି ଘଟଣାକୁ ବର୍ତମାନ ଏକ ବର୍ଷ ପୂରିବାକୁ ଯାଉଅଛି, କିନ୍ତୁ ସରକାର କର୍ମଚାରୀଙ୍କ ବିଭିନ୍ନ ଦାବୀ ଉପରେ କୌଣସି ପଦକ୍ଷେପ ଗ୍ରହଣ କରି ନାହାନ୍ତି I ଯଦି ସରକାର ସଙ୍ଘର ଦାବୀମାନଙ୍କ ଉପରେ ଯଥାଶୀଘ୍ର କିଛି ସକାରାତ୍ମକ କାର୍ଯ୍ୟପନ୍ଥା ଗ୍ରହଣ ନ କରନ୍ତି, ତେବେ ଆଗକୁ ସଙ୍ଘ ଆନ୍ଦୋଳନ ମୁହାଁ ହୋଇପାରେ ବୋଲି ଅଦ୍ୟ ବୈଠକରେ ନିଷ୍ପତ୍ତି ଗ୍ରହଣ କରାଯାଇଥିଲା I ଆସନ୍ତା ତା.୨୭/୦୨/୨୦୨୫ ଦିନ ସଙ୍ଘ ପଶ୍ଚିମ ଓଡିଶାର ସମସ୍ତ ଉପ ନିବନ୍ଧକ ସମବାୟ ସମିତି ସମୂହଙ୍କ କାର୍ଯ୍ୟାଳୟ ସମ୍ମୁଖରେ ରେ ଶାନ୍ତି ପୂର୍ଣ୍ଣ ଧାରଣା ଦେବା ପାଇଁ ବୈଠକରେ ନିଷ୍ପତ୍ତି ଗ୍ରହଣ କରାଯାଇଛି।